މި ހަފްތާ ބަންދާ ދިމާކޮށް ސްރީލަންކާގައި މުޒާހަރާ ކުރަން އުޅޭތީ ވެރިރަށް ކޮލޮމްބޯގައި އަނެއްކާ ވެސް ކާފިއު ހިންގަން ފަށައިފި އެވެ.
ފުލުހުން ބުނީ ހުކުރު ދުވަހުގެ ރޭ 09:00 އިން ފެށިގެން މުއްދަތެއް ނެތް ގޮތަށް ކާފިއު ހިންގާނެ ކަމަށެވެ. އެހެން ކަމުން އާއްމުން ބޭރަށް ނުކުމެ އުޅުން މަނާ ވާނެ އެވެ.
ހުކުރު ދުވަހު ވެސް ޔުނިވާސިޓީ ދަރިވަރުންގެ އެއްވުމެއް ރައީސްގެ ގެކޮޅު ކައިރީގައި އޮތް އިރު، އެ މުޒާހަރާ ރޫޅާލަން ފުލުހުން ކަރުނަ ގޭސް ޖަހައި، ބާރު ސްޕީޑުގައި ފެން ޖެހި އެވެ.
ސްރީ ލަންކާ ރައްޔިތުން މުޒާހަރާ ކުރަމުން ދަނީ ޑޮލަރު ހުސްވެ، ޒަރޫރީ ތަކެތި އިމްޕޯޓް ނުކުރެވި، ގައުމު ހާލުގައި ޖެހިފައި ވާތީ އެވެ.
ހާލަތު އެހާ ގޯސްވީ ރައީސް ގޮތަބަޔާ ރާޖަޕަކްސަގެ ގޯސް ނިންމެވުންތަކުގެ ސަބަބުން ކަމަށް ގިނަ ބަޔަކު ދެކެ އެވެ. މީގެ ކުރިން ބޭއްވި ބައެއް އެއްވުންތަކުގައި ބޮޑެތި ހަމަނުޖެހުން ހިނގި އެވެ.
"ތެޔޮ ހޯދަން ކިޔުގައި ތިބެ މީހުން ދަނީ މަރުވަމުން. ތިން އިރުގެ ކޮއްތު ވެސް ނުލިބޭ. މި ރައީސާއި ސަރުކާރުން މި ގައުމަށް ގެނެސްފަައިވާ ހާލަތަކީ މިއީ،" ހުކުރު ދުވަހު ޔުނިވާސިޓީ ދަރިވަރުންގެ މުޒާހަރާ ރޭވުމުގަައި އުޅުނު ވަސާންތަ މުޑަލިގެ ރޮއިޓާޒް ނޫހަށް ބުންޏެވެ.
"ރައީސާއި ބޮޑު ވަޒީރު މަގާމުން އިސްތިއުފާ ދެއްވަން ދެން އަހަރުމެން ހުއްޓައެއް ނުލާނަން،" މިދިޔަ މޭ މަހު ބޮޑު ވަޒީރު ކަމަށް ވަޑައިގެންނެވި ރަނިލް ވިކްރަމަސިންހައަށް އިޝާރާތްކޮށް އޭނާ ބުންޏެވެ.
ރައީސް ނެރުއްވި ބަޔާނެއްގައި ހުކުރު ދުވަހު ވިދާޅުވީ ބަޔަކު ރައްޔިތުންނަށް އޮޅުވާލަމުންދާ ކަމަށާއި ޒަރޫރީ ތަަކެތި ވަރަށް އަވަހަށް ލިބޭނެ ކަމަށެވެ.
"މި އޮތް ގޮންޖެހުން ގިނަ ހާލަތަށް ކާމިޔާބު ހައްލުތަކެއް ލިބެން ފަށާފަައި ވަނިކޮށް، އިދިކޮޅު ސިޔާސީ ގްރޫޕްތަކުން ރައްޔިތުންނަށް އޮޅުވާލަން ހިންގާ ހަރަކާތްތަކާ މެދު ކަންބޮޑުވެ، ދެރަވޭ،" އެ ބަޔާނުގައިވެ އެވެ.
ޔުނިވާސިޓީ ދަރިވަރުން ރާވާފަައި ވަނީ ހުކުރު ދުވަހުގެ ރޭ ރައީސްގެ ގެކޮޅު ކައިރީގައި މަޑުކޮށްގެން ތިބުމަށެވެ. ސިއްހީ މަސައްކަތްތެރިންނާއި، ދީނީ އެކި ފަރާތްތަކާއި، ޓްރޭޑް ޔޫނިއަންތަކާއި އިދިކޮޅު ސަޕޯޓަރުން އެ ތަނަށް ޖަމާވާން ހަމަޖެހިފައި އޮތީ ހޮނިހިރު ދުވަހުގެ ހެނދުނެވެ.
އެހެން ނަމަވެސް ފުލުހުން ބުނީ ހުކުރު ދުވަހުގެ ރޭ 09:00 އިން ފެށިގެން ކާާފިއު ހިންގާނެ ކަމަށާއި، ކާފިއުއާ ހިލާފުވާ ނަމަ ގާނޫނީ ފިޔަވަޅު އަޅާނެ ކަމަށެވެ.
ކޮލޮމްބޯގެ ސެކިއުރިޓީ ވަރުގަދަކޮށް 3،000 ފުލުހުންނާއި ޕެރެމިލިޓަރީ ނެރިފައިވާ އިރު، ބޮޑެތި އާއްމު އިމާރާތްތައް ކައިރީގައި ބެރިކޭޑް ޖަހައި ބަންދުކޮށްފައިވެ އެވެ.
ހޮނިހިރު ދުވަހު ބޭއްވުމަށް ތަައްޔާރުވާ މުޒާހަަރާގައި ލޭއޮހޮރުވުން ހިނގާނެ ކަމަށް ބެލެވޭތީ އދ. ގެ އިންސާާނީ ހައްގުތަކާ ބެހޭ ކޮމިޝަނަރުގެ ތަރުޖަމާނު ވަނީ ކަންބޮޑުވުން ފާާޅުކުރައްވާފަ އެވެ.
"ސަލާމަތީ ފއުޖުތަކުން މީގެ ކުރިން ވެސް އެއްވުންތަކުގައި ބޮޑެތި ހަތިޔާރު ބޭނުން ކުރި މަަންޒަރު ފެނުނު. އެހެންވީމާ، އެފަދަ ހާލަތެއް މެދުވެރިވިޔަ ނުދިނުމަށް އަޅުގަނޑުމެން ގޮވާލަން،" ރަވީނާ ޝަމްސަދާނީ ވިދާޅުވި އެވެ.
އެމެރިކާގެ ސަފީރު ޖޫލީ ޗުންގް ވެސް ވަނީ ސުލްހަވެރި މުޒާހަރާއަށް ހުރަސް ނޭޅުމަށް ފުލުހުންނާއި ސިފައިންނަށް ގޮވާލަައްވައިފަ އެވެ.
