ޖަޕާނުގެ ކުރީގެ ބޮޑުވަޒީރު ޝިންޒޯ އަބޭ މިއަދު ހެނދުނު ޕޯޑިއަމެއް ކައިރީގައި ވާހަކަ ދައްކަވަން ހުއްޓައި މީހަކު އޭނާގެ ހަށިކޮޅަށް ފަހަތުން ބަޑިޖަހައިފި އެވެ.
މި ވަގުތަށް އެނގެން ހުރި މައުލޫމާތަށް ބަލާއިރު، މީގެ ކުރިން ދެ ފަހަރެއްގެ މަތިން ޖަޕާނުގެ ބޮޑުވަޒީރުކަން ކުރައްވާފައިވާ އަބޭގެ ހަށިކޮޅަށް ޝޮޓްގަންއަކުން ބަޑިޖެހީ ފަހަތުން ކަމަށް ބެލެވެ އެވެ. އަދި ވައަތް ފަރާތުން މެޔަށް އަދި ކަރަށް ބަޑީގެ ވަޒަން އަރާފައިވާ ކަމަށް ބެލެވެ އެވެ.
އަބޭ, 67, ބިންމައްޗަށް ވެއްޓިވަޑައިގެންފައި ހުރި ފޮޓޯ އާންމުވެފައިވާއިރު ތުރުކުރައްވައިގެން ހުންނެވި ހުދު ގަމީހުގައި ލޭ ހުރިތަން ފެނެ އެވެ. ހާދިސާ ހިނގި ތަނުގައި އަވަސް ފަރުވާ ދިނުމަށްފަހު އަބޭ ވަނީ ވަގުތުން ހޮސްޕިޓަލަށް ގެންގޮސްފަ އެވެ.
ހާދިސާ ހިނގި ސަރަހައްދަށް އެންމެ އަވަހަށް ހާޒިރުވި ފަޔާ ޑިޕާޓްމަންޓުގެ ސެއިގޯ ޔަސުހާރާ ވިދާޅުވީ އަބޭގެ ހަށިކޮޅުން ވައިޓަލް ސައިންސް ނުވަތަ ހިތް، ތެޅުން، ނޭވާލުން، ވިންދު ހުރުން ފަދަ ދިރިހުރިކަމުގެ އެއްވެސް އަލާމާތެއް ނެތް ކަމަށެވެ.
ނިއުޔޯޓް ޓައިމްސް އިން ބުނެފައި ވަނީ ޖަޕާނުގެ ފުލުހުން އެ މައްސަލައިގައި ޓެޓްސޫޔާ ޔަމަގާމީ ނަމަކަށް ކިޔާ 42 އަހަރުގެ މީހެއް ހައްޔަރުކޮށްފައިވާ ކަމަށެވެ.
އަބޭ މިއަދު ހެނދުނު ބައިވެރިވެވަޑައިގެންފައި ވަނީ ޖަޕާނުގެ ގާނޫނު ހަދާ މަޖިލީހަށް ވާދަ ކުރައްވާ ކެއި ސޭޓޯ، 43، ގެ ކެމްޕެއިން ހަރަކާތެއްގަ އެވެ. އާންމުންގެ މެދުގައި މިހާރު ވެސް މަގުބޫލު އަބޭ ކެމްޕެއިން ކުރައްވަމުން ގެންދަނީ ލިބަރެލް ޑިމޮކްރެޓިކް ޕާޓީއަށެވެ.
އަބޭ ބޮޑުވަޒީރުކަން އެންމެ ފުރަތަމަ ކުރެއްވީ 2006 ފެށިގެން 2007 ވަނަ އަހަރާ ހަމައަށެވެ. އަދި ފަހުން 2012 ވަނަ އަހަރުން ފެށިގެން 2020 ވަނަ އަހަރާ ހަމައަށް ވެރިކަމުގައި ހުންނެވި އެވެ. އިސްތިއުފާ ދެއްވީ މަގާމުގައި ހުންނެވުމަށް ސިއްހީ ހާލަތު ތަންނުދޭ ކަމަށް ވިދާޅުވެ އެވެ.
އަބޭއަކީ ޖަޕާނުގެ މުއްސަނދި، ޖަޕާނުގެ ސިޔާސީ ދާއިރާގައި އިސް ރޯލެއް އަދާ ކުރެއްވި އާއިލާއެއްގެ ބޭފުޅެކެވެ. އޭނާގެ ބައްޕައަކީ ކުރީގެ ފޮރިން މިނިސްޓަރެކެވެ. އަދި އާއިލާގެ ބޭފުޅަކު ވަނީ ކުރީގައި ޖަޕާނުގެ ޕްރިމިއާގެ މަގާމުގެ ވެސް އަދާ ކުރައްވައިފަ އެވެ.
