ސްރީލަންކާއަށް ބޭނުންވާ ތެޔޮ ރަޝިއާއިން އެތެރެ ކުރަން ކްރެޑިޓް ފެސިލިޓީއެއް ފޯރުކޮށްދިނުމަށް ލަންކާގެ ރައީސް ގޮތަބަޔާ ރާޖަޕަކްސަ، ރަޝިއާގެ ރައީސް ލެޑިމިއަ ޕުޓިންއަށް ފޯނުން ގުޅުއްވައި އެދިވަޑައިގެންފި އެވެ.
މި ވަގުތު ލަންކާއިން ތެޔޮ ހުސްވެފައިވާ އިރު، އެންމެ އަވަހަށް އާ ޝިޕްމެންޓެއް ލިބޭނެ ކަމަށް ބެލެވެނީ މި މަހުގެ މެދު ތެރޭގަ އެވެ. ތެޔޮ ނެތުމުން އާއްމު ރައްޔިތުން އުޅެމުން ދަނީ ދަތި ހާލުގަ އެވެ.
ގޮތަބަޔާ ކުރެއްވި ޓްވީޓެއްގައި ވިދާޅުވީ ޕުޓިންއާ ފޯނުން ގުޅުއްވައި، ރަޝިއާއިން މިހާތަނަަށް ފޯރުކޮށްދީފައިވާ އެހީއަށް ޝުކުރު ދެންނެވި ކަމަށެވެ.
މިހާރު ކުރިމަތިވަމުންދާ އިގްތިސާާދީ ގޮންޖެހުންތަކުން އަރައިގަންނަން ތެޔޮ އިމްޕޯޓް ކުރަން ރަޝިއާގެ ކްރެޑިޓް ފެސިލިޓީއަކަށް އެދިވަޑައިގެންނެވި ކަމަށް ވެސް ވިދާޅުވި އެވެ.
"އޭގެ އިތުރުން އެއިރޯފްލޮޓް އޮޕަރޭޝަންތައް އަަލުން ސްރީލަންކާގައި ފެށުމަށް ވެސް އަޅުގަނޑު ވަރަށް އަދަބުވެރިކަމާ އެކު އެދުނިން. އަޅުގަނޑުމެންނަށް އެއްބަސްވެވުނު ގޮތުގައި ދެ ގައުމުގެ ގުޅުން ވަރުގަދަ ކުރަން ފަތުރުވެރިކަމާއި، ވިޔަފާރި އަދި ސަގާފީ ދާއިރާ ކުރިއެރުވުން މުހިއްމު،" ގޮތަބަޔާ ވިދާޅުވި އެވެ.
