ދެ މަރުހަލާއަކަށް ބަހާލައިގެން ސިންގަޕޫރުގައި މުދަލާއި ހިދުމަތުގެ އަަގުން ނަގާ ޓެކްސް ނުވަތަ ޖީއެސްޓީގެ ރޭޓް ހަތް ޕަސެންޓުން ނުވަ ޕަސެންޓަށް މަތި ކުރަން ނިންމައިފި އެވެ.
އެގޮތުން ފުރަތަމަ މަރުހަލާގައި 2023 ވަނަ އަހަރުގެ ޖެނުއަަރީ އެއް ވަނަ ދުވަހުން ފެށިގެން ޖީއެސްޓީ ރޭޓް އަށް ޕަސެންޓަށް މަތި ކުރާނެ އެވެ. ދެ ވަނަ މަރުހަލާގައި 2024 ވަނަ އަހަރުގެ ޖެނުއަރީ އެއް ވަނަ ދުވަހުން ފެށިގެން ޖީއެސްޓީ ރޭޓް ނުވަ ޕަސެންޓަށް މަތި ކުރާނެ އެވެ.
މި އަހަރުގެ ކުރީކޮޅު ދައުލަތުގެ ބަޖެޓު ޕާލިމެންޓަށް ހުށަހަޅުއްވަމުން ފިނޭންސް މިނިސްޓަރު ލޯރެންސް ވޮންގް ވިދާޅުވީ ޖީއެސްޓީ މަތި ކުރުމުން ކުރާނެ އަސަރު ކުޑަ ކުރަން 2020 ވަނަ އަހަރު އިއުލާން ކުރި ހަ ބިލިއަން ޑޮލަރުގެ ޕެކޭޖްގައި އިތުރު 640 މިލިއަން ޑޮލަރު ހިމަނަން ނިންމާފައިވާ ކަމަށެވެ.
ސިންގަޕޫރުގައި ޖީއެސްޓީ މަތި ކުރުމުގެ ވާހަކަތައް ދައްކާތާ ގިނަ އަހަރުތަކެއް ވެއްޖެ އެވެ. ޖީއެސްޓީ ނުވަ ޕަސެންޓަށް މަތި ކުރުމުން ސިންގަޕޫރުގެ ޖީޑީޕީ ނުވަތަ އުފެއްދުންތެރިކަމުގެ 0.7 ޕަސެންޓް އާމްދަނީގެ ގޮތުގައި ދައުލަތަށް ލިބޭނެ ކަމަށް ލަފާކުރެވެ އެވެ. އެއީ 3.5 ބިލިއަން ޑޮލަރެވެ.
އެ ފައިސާ ހޭދަ ކުރާނީ ސިއްހީ ހިދުމަތާއި އުމުރުން ދުވަސްވީ މީހުންނަށް ފޯރުކޮށްދޭ ހިދުމަަތްތަކާއި އިޖުތިމާއީ ހިދުމަތްތައް ކުރިއަރުވަން ކަމަށް ސިންގަޕޫރުގެ ސަރުކާރުން ބުނެ އެވެ.
ހަމައެކަނި ޖީއެސްޓީ މަތިކޮށްގެން ސިއްހީ ހިދުމަތްތައް ހަރުދަނާ ނުކުރެވޭނެ ކަމަށް ފިނޭންސް މިނިސްޓަރު ވޮންގް ވިދާޅުވެފައިވެ އެވެ. އޭނާ ވިދާޅުވީ ޖީއެސްޓީގެ އިތުރުން ފަރުދުންގެ އާމްދަނީން ނަގާ ޓެކްސް އާއި މުދަލުން ނަގާ ޓެކްސް އާއި އުޅަނދުން ނަގާ ޓެކްސް ވެސް ބޮޑު ކުރަން ޖެހޭނެ ކަމަށެވެ.
ކޮވިޑް ބަލިމަޑުކަމާއި ޔޫކްރެއިން ހަނގުރާމައާ ހެދި ތަކެތީގެ އަގު އުފުލެމުންދާ ދަނޑިވަޅެއްގައި ޖީއެސްޓީ މަތި ކުރާތީ އާއްމުންގެ ކަންބޮޑުވުން ހުރި ނަމަވެސް، ނިންމުމަކާ ހަމައަށް ދިޔައީ ހާލަތު ރަނގަޅަށް ދިރާސާ ކުރުމށް ފަހު ކަމަށް އޭނާ ވިދާޅުވި އެވެ.
"އާާމްދަީ އަވަހަށް އިތުރު ކުރަން އެބަ ޖެހޭ. އެކަމަކު ތަކެތީގެ އަގު އުފުލެމުންދާ ދަނޑިވަޅެއްގައި ޖީއެސްޓީ މަތިވާތީ ރައްޔިތުންގެ ކަންބޮޑުވުންތަކެއް ހުންނާނެކަން ބަލައިގަންނަން،" ވޮންގް ވިދާޅުވި އެވެ.
އޭނާ ވިދާޅުވީ ޖީއެސްޓީ މަތި ކުރުން ދެ މަރުހަލާއަކަށް ބަހާލީ ރައްޔިތުންގެ ކަންބޮޑުވުންތަކަށް ބެލުމަށް ފަހު ކަމަށެވެ. ސިންގަޕޫރުގައި ޖީއެސްޓީ ރޭޓް ދެ ޕަސެންޓުން މަތި ކުރަން އުޅޭ ކަމަށް އެންމެ ފުރަތަމަ އިއުލާން ކުރީ 2018 ގަ އެވެ. ނަމަވެސް ކޮވިޑް ބަލިމަޑުކަމާ ހެދި އެކަން ފަސްކުރި އެވެ.
