ޓްވިޓާގައިވާ ބައެއް ކޮންޓެންޓު ނެގުމަށް އިންޑިއާ ސަރުކާރުން އަންގާފައި ވާތީ، އެކަމާ ދެކޮޅަށް ޓްވިޓާއިން ކޯޓަށް މައްސަލަ ހުށަހަޅައިފި އެވެ.
ޓްވިޓާގެ ޕެޓިޝަން ހުށަހެޅީ ކަރްނާޓަކާގެ ހައި ކޯޓަށެވެ. ކޯޓަށް މައްސަލަ ގެންދިޔައީ ކޮންޓެންޓް ނަގަން އިންޑިއާ ސަރުކާރުން އެންގި ގިނަ އެންގުންތަކަށް އަމަލުނުކޮށް މަޑު ކުރުމަށް ފަހު އެވެ.
ނަމަވެސް ޖޫން މަހު ސަަރުކާރުން ފޮނުވި ސިޓީއެއްގައި ބުނީ އެންގުންތަކާ އެއް ގޮތަށް އަމަލު ނުކުރާ ނަމަ ޓްވިޓާއާާ މެދު "ސީރިއަސް ފިޔަވަަޅު" އަޅަން ޖެހޭނެ ކަމަށެވެ.
އިންޑިއާގައި 24 މިލިއަނަށް ވުރެ ގިނަ މީހުން ޓްވިޓާ ބޭނުން ކުރާ ކަމަށް ލަފާ ކުރެވެ އެވެ.
ބައެއް ކޮންޓެންޓު ނެގުމަށް އިންޑިއާ ސަރުކާާރުން ޓްވިޓާއަށް އަންގަމުން ދަނީ އެ ގައުމުގެ އިންފޮމޭޝަން ޓެކްނޮލޮޖީ ގާނޫނުގެ ދަށުންނެވެ. އެ ގާނޫނުގައިވާ ގޮތުން "ގައުމީ ސަލާމަތަށް ނުރައްކާވާ" ކަންކަމާއި އާއްމު މަސްލަހަތު ގެއްލޭ ކަންކަމުގައި ކޮންޓެންޓް ބްލޮކް ކުރުމުގެ ބާރު ސަރުކާރަށް އޮންނާނެ އެވެ.
އިންޑިއާ ސަރުކާރުން މީގެ ކުރިން ވަނީ ޓްވީޓްތައް ނެގުމަށާއި އެކައުންޓްތައް ބްލޮކް ކުރުން ފަދަ ފިޔަވަޅުތައް އެޅުމަށް ޓްވިޓާއަށް ތަަކުރާރުކޮށް އަންގާފަ އެވެ.
މިދިޔަ މޭ މަހު ވެރިރަށް ނިއު ދިއްލީގައި ހުންނަ ޓްވިޓާގެ އޮފީހަށް ފުލުހުން ވަނުމުން، އެ ކުންފުނުން ވަަނީ އިންޑިއާގައި ހިޔާލު ފާޅު ކުރުމުގެ މިނިވަންކަމުން ނެތެމުންދާ ކަމަަށް ބުނެ ކަންބޮޑުވުން ފާޅުކޮށްފަ އެވެ.
