ފާއިތުވީ ފަސް އަހަރުގެ ފުރަތަމަ ހަ މަހުގެ ތެރޭގައި، ކްރިމިނަލް ކޯޓުން އެންމެ ގިނަ މައްސަލަ ބަލާފައިވަނީ މި އަހަރުގެ ފުރަތަމަ ހަ މަހު ކަމަށް އެ ކޯޓުގެ ތަފާސްހިސާބުތަކުން ދައްކައިފި އެވެ.
ކްރިމިނަލް ކޯޓުން އާންމުކޮށްފައިވާ މި އަހަރުގެ ފުރަތަމަ ހަ މަސް ދުވަހުގެ ތަފާސްހިސާބުތަކުން ދައްކާ ގޮތުގައި، އެ ކޯޓަށް 404 މައްސަލަ ވަނީ ހުށަހެޅިފަ އެވެ. އޭގެ ތެރެއިން އެންމެ ގިނަ މައްސަލަ ހުށަހެޅިފައިވަނީ މެއި މަހު އެވެ.
މެއި މަހު 81 މައްސަލަ ހުށަހެޅުނުއިރު، ޖޫން މަހު 81 މައްސަލަ އަދި ފެބްރުއަރީ މަހު 77 މައްސަލަ ވަނީ ހުށަހެޅިފަ އެވެ. ދެން އެންމެ ގިނަ މައްސަލަ ހުށަހެޅުނު މާޗު މަހު 66 މައްސަލަ ހުށަހެޅުނުއިރު ޖެނުއަރީ މަހު 51 މައްސަލަ އަދި އޭޕްރިލް މަހު 41 މައްސަލަ ވަނީ ހުށަހެޅިފަ އެވެ.
މި އަހަރުގެ ފުރަތަމަ ހަ މަސް ތެރޭގައި ކްރިމިނަލް ކޯޓުން ވަނީ 548 މައްސަލަ ބަލައި ނިންމާފަ އެވެ. އޭގެ ތެރޭގައި ކްރިމިނަލް ކޯޓުގައި ނުނިމި ގިނަ ދުވަސްވެފައިވާ ގިނަ މައްސަލަތަކެއް ހިމެނެ އެވެ.
ކްރިމިނަލް ކޯޓުގެ ނުނިމި ދިގުލައިގެން ގޮސްފައިވާ މައްސަލަތައް ނިންމައި ބެކްލޮގް ހުސްކުރުމުގެ ގޮތުން ޖޫން މަހުން ފެށިގެން ތިން މަސް ދުވަހަށް ޝަރީއަތްތައް ތާވަލްކުރާ ވަގުތު އިތުރުކޮށްގެން ގިނަ މަސައްކަތްތަކެއް އަންނަނީ ކުރަމުންނެވެ.
އެއާއެކު މި އަހަރުގެ ފުރަތަމަ ހަ މަސް ދުވަހު، އެންމެ ގިނަ މައްސަލަ ނިންމާފައިވަނީ ވެސް ޖޫން މަހު އެވެ. ޖޫން މަހު ވަނީ 165 މައްސަލަ ނިންމާފަ އެވެ. އޭގެ ތެރެއިން 53 މައްސަލައަކީ ނުނިމި ގިނަ ދުވަސްވެފައި ހުރި މައްސަލަތައް ކަމަށް ކްރިމިނަލް ކޯޓުން ބުނެފައިވެ އެވެ.
ފުރަތަމަ ހަ މަސް ދުވަހުގެ ތެރޭގައި އެންމެ މަދުން މައްސަލަ ނިންމާފައިވަނީ ޖެނުއަރީ މަހު އެވެ. އެ މަހު 40 މައްސަލަ ނިންމާފައިވާއިރު، ފެބްރުއަރީ މަހު 110 މައްސަލަ، މާޗު މަހު 115 މައްސަލަ، އަދި އޭޕްރިލް މަހު 49 މައްސަލައިގެ އިތުރުން މެއި މަހު 69 މައްސަލަ ވަނީ ބަލައި ނިންމާފަ އެވެ.
ކްރިމިނަލް ކޯޓުން މި އަހަރުގެ ފުރަތަމަ ހަ މަސް ދުވަހު ނިންމާފައިވާ މައްސަލަތަކަކީ މިދިޔަ އަހަރުގެ އެ މުއްދަތާ އަޅާ ބަލާއިރު 51 ޕަސަންޓުގެ ކުރިއެރުމެކެވެ. އަދި، 2018 ވަނަ އަހަރުން ފެށިގެން މި މުއްދަތުގައި އެންމެ ގިނަ މައްސަލަ ނިންމާފައިވަނީ ވެސް މި އަހަރު އެވެ.
ކްރިމިނަލް ކޯޓުން 2019 ވަނަ އަހަރުން ފެށިގެން މަސައްކަތްކުރަމުން އަންނަނީ 2000 ވުރެ ގިނަ މައްސަލަތައް ހިމެނޭ ބެކްލޮގަކާ އެކު އެވެ.
އެވަރަށް މައްސަލަތައް ނުނިމި އޮތް އިރު އަހަރަކު އިތުރު 900 މައްސަލަ ހުށަހެޅެ އެވެ. އެހެންވީމާ އެކޯޓުން މަސައްކަތް ކުރަން ޖެހެނީ އަހަރަކު އިތުރަށް ހުށަހަޅާ މައްސަލަތަކާއި ކުރީގެ މައްސަލަތަކާ ވެސް އެކު އެވެ.
