ސްރީލަންކާގެ ރޭލު މަސައްކަތްތެރިންގެ ޔޫނިއަނުން ފެށި އިހްތިޖާޖަކާ ހެދި 140 އަށް ވުރެ ގިނަ ދަތުރު ކެންސަލްކޮށްފި އެވެ.
އެ ޔޫނިއަންގެ ރައީސް ސުމެދާ ސޮމަރަތުނެ ވިދާޅުވީ އިހްތިޖާޖްގެ ބޭނުމަކީ މަސައްކަތަށް ދިޔުމަށް އުޅަނދުތަކަށް ބޭނުންވާ ތެޔޮ ނުލިބޭތީ ކަންބޮޑުވުން ފާޅުކުރުން ކަމަަށެވެ.
"ރޭލުގެ ހިދުމަތަކީ ޒަރޫރީ ހިދުމަތެއްގެ ގޮތުގައި ސަރުކާރުން ދެކޭ ނަމަ، އެ ހިދުމަތުގައި އުޅޭ މުވައްޒަފުން ވެސް އެ ކެޓަގަރީގެ ތެރޭގައި ހިމެނެން ޖެހޭނެ،" ސޮމަރަތުނެ ވިދާޅުވި އެވެ.
ރޭލުގެ ހިދުމަތް ދިނުމުގައި އުޅޭ ހުރިހާ މުވައްޒަަފުންނާ މެދު ހަމަހަމަކޮށް އަމަލު ނުކުރާ ނަމަ، ހުރިހާ ރޭލު ދަތުރުތައް ހުއްޓުމަކަށް އަންނަން މާ ގިނަ ދުވަހެއް ނުނަގާނެ ކަމަށް އޭނާ ވިދާޅުވި އެވެ.
ތެޔޮ ނެތުމުގެ ސަބަބުން ލަންކާ ސަަރުކާާރުން ނިންމާފަައި ވަނީ ހަމައެކަނި ޒަރޫރީ ހިދުމަތްތަކަށް ތެޔޮ ފޯރުކޮށްދިނުމަށެވެ. ނަމަވެސް ރޭލުގެ ހިދުމަތުގައި އުޅޭ ބަޔެއް މީހުން މަސައްކަތަަށް ނުކުތުމަށް ދަތުރު ކުރާނެ ގޮތް ހަމަޖައްސަން ޖެހެނީ އަމިއްލަ އަށެވެ.
އިހްތިޖާޖާ ގުޅިގެން ގިނަ ދަތުރުތަކެއް ކެންސަލްވެ، އާއްމުންނަށް އިތުރު ދަަތިތަކާ ކުރިމަތިވެފައިވާ އިރު، ރޭލުގެ ހިދުމަތްތަކާ ބެހޭ ޖެނެރަލް މެނޭޖަރު ހުށަހެޅުއްވި ބައެއް ކަންކަމަަށް ބަލަައި، ބުދަ ދުވަހު އިހްތިޖާޖް ނުކުރާނެ ކަމަށް މުވައްޒަފުން ބުނެ އެވެ.
