މާލެ ސަރަަހައްދުން މާލޭގެ ރައްޔިތުންނަށް ގޯތި ދޫކުރަން ފަށާފައިވާ މަޝްރޫއާ ދެކޮޅަށް ރައްޔިތުންގެ މަޖިލީހުގެ އެއްވެސް މެންބަރަކު މަޖިލީހަށް މައްސަަލަ ހުށަނޭޅުމަށް ރައްޔިތުންގެ މަޖިލީހުގައި މާލޭގެ ދާއިރާއެއް ކަމުގައިވާ ގަލޮޅު ދެކުނު ދާއިރާ ތަމްސީލް ކުރައްވާ މެންބަރު މީކާއީލް އަހްމަދު ނަސީމް އެދިވަޑައިގެންފި އެވެ.
"ބިންވެރިޔާ-ގެދޮރުވެރިޔާ" ގެ ނަމުގައި މާލޭ ރައްޔިތުންނަށް ބަންޑާރަ ގޯތީގެ ގޮތުގައި ދޫކުރާ ގޯއްޗާއި ފްލެޓަށް އެދުމުގެ ފުރުސަތު މިހާރު ވަނީ ހުޅުވާލާފަ އެވެ. އެހެންނަމަވެސް ގޯތި ދިނުމާމެދު، ބައެއް މީހުން އަންނަނީ ގިނަ ކަންބޮޑުވުންތަކެއް ފާޅުކުރައްވަމުންނެވެ.
ރައްޔިތުންގެ މަޖިލީހުގެ ފޮނަދޫ ދާއިރާގެ މެންބަރު މޫސާ ސިރާޖް ވެސް ވަނީ އެއީ އެންމެ އިންސާފުވެރި ގޮތް ކަމަށް ގަބޫލު ނުކުރެއްވޭ ކަމަށް ވިދާޅުވެ މަޖިލީހަށް އޭގެ މައްސަލައެއް ހުށަހަޅުއްވައިފަ އެވެ.
"ދައުލަތުގެ ދަރަނި 100 ބިލިއަނަށް އަރައި ދަރަނި ނުދެއްކޭނެ ކަމުގެ ބަހުސް އިންތިހާއަށް ބޮޑުވެފައިވާ ހާލަތުގައި ހަތަރު ލައްކައެއްހާ މީހުންގެ އާބާދީގެ ތެރެއިން 5000 އާއިލާއަށް 48 ބިލިއަން ރުފިޔާގެ އަގުހުރި ބިން ހިލޭ ދިނުމަކީ ބޮޑު ބޭއިންސާފެއް ކަމުގައި އަޅުގަނޑު ދެކެން," ސަރުކާރު ހިންގާ މައި ޕާޓީ، އެމްޑީޕީގެ މެންބަރު ސިރާޖް ހުށަހަޅުއްވާފައިވާ މައްސަލާގައިވެ އެވެ.
މި ސިޓީގެ ފޮޓޯއަކާއެކު ސިރާޖް ކުރައްވާފައިވާ ޓްވީޓެއް ރީޓްވީޓް ކުރައްވައި މީކާއީލް ލިޔުއްވާފައިވަނީ އެމްޑީޕީގެ ފުރަތަމަ ސަރުކާރު އަދި ކުރީގެ ރައީސް މުހައްމަދު ނަޝީދުގެ ވެރިކަމުގައި މާލެ ސަރަހައްދުން ދިން 250 ގޯތި ފިޔަވައި، ފާއިތުވެދިޔަ 40 އަހަރު ވެސް މާލޭގެ ރައްޔިތަކަށް ގޯތި ދޫކޮށްފައި ނުވާ ކަމަށެވެ.
"މާލޭގެ ރައްޔިތުން މި މަޝްރޫއަށް އިންތިޒާރު ކުރަމުން އަންނަތާ އެތައް، އެތައް އަހަރެއް. އެ ރައްޔިތުންގެ ބޯހިޔާވަހިކަމަށް ހުރަސް އެޅޭނޭ އެއްވެސްކަމެއް ނުކުރުމަށް ވަރަށް އިހްތިރާމާއިއެކު ދަންނަވަން،" އެމްޑީޕީގެ މެންބަރު މީކާއީލް ކުރައްވާފައިވާ ޓްވީޓްގައިވެ އެވެ.
މީކާއީލް ވިދާޅުވީ މާލެ ސަރަހައްދުން ފެންނަ އުސް އިމާރާތްތަކުގެ މިލްކުވެރިންނަކީ މާލޭގެ މަދު އާއިލާތަކެއް ކަމަށެވެ. އާއިލާގެ ވާރުތައިން ވެސް މާލޭ ބިމަކުން ޖާގައެއް ނުލިބި ނުވަތަ ކުދިކުދި ތަންތަނުގައި ދިރިއުޅޭ ވަރަށް އާދައިގެ މީހުން މާލޭގައި ގިނަ ކަމަށް މިކާއީލް ވިދާޅުވި އެވެ.
"މުނިމާމަ ކާފަގެ ގޯތި ފޮތިފޮތި ކުރަމުން ގޮސް، އަށް ފޫޓު 10 ފޫޓު ކޮޓަރީގައި ކުރު އަތް މައްޗަށް ބޯލައިގެން ތިން ހަތަރު މީހުނާ އެކު ނިދާ، މާލޭ މީހުން މަދެއް ނޫން، އުސް އިމާރާތްތައް ނިސްބަތް ވަނީ މާލޭގެ މަދު، މުއްސަނދި އާއިލާތަކަށް؛ އެއީ މާލޭގެ އަގުލަބިއްޔަތުގެ ހާލަތެއް ނޫން،"
މާލެ ސަރަހައްދަށް އަމާޒުކޮށް ސަރުކާރުން ކުރިއަށް ގެންދާ އަދި ރާވާފައިވާ މަޝްރޫއުތަކުގެ ތަފްސީލު، ރައީސް އިބްރާހިމް މުހައްމަދު ސޯލިހު ދެއްވީ ރައްޔިތުންގެ މަޖިލިސް މިއަހަރަށް ހުޅުވަން މިދިޔަ އޭޕްރިލް މަހު ބޭއްވި ޖަލްސާގައި އިއްވެވި ރިޔާސީ ބަޔާނުގަ އެވެ.
އެގޮތުން، ހުޅުމާލޭން 1،000 ގޯތީގެ އިތުރުން، ގުޅީފަޅުން 2،000 ގޯއްޗާއި އަދި ގިރާވަރު ފަޅު ހިއްކާ އެ ބިމުން މަދުވެގެން 2,000 ގޯތި މާލޭ ރަށްވެހިންނަށް ދޭނެ ކަމަށް ރައީސް އެ ދުވަހު އިއުލާނުކުރެއްވި އެވެ. އެ 5،000 ގޯތީގެ ތެރެއިން ފުރަތަމަ ބުރުގައި ދޫކުރާނީ 3،000 ގޯއްޗެވެ.
