ފެދޫ ދާއިރާގެ ކުރީގެ މެންބަރު އަލްހާން ފަހުމީ އިސްވެ ހުންނަވައި ހިންގި ކިންގްސް ފޮރެކްސްގައި އިންވްޓުކުރި ފަރާތްތަކުގެ އެތައް މިލިއަން ރުފިޔާ އެއް "ގެއްލިއްޖެ" ކަމަށް، ކިންގްސް ކެޕިޓަލް ހޯލްޑިންސް އިން ބުނެފި އެވެ.
އެމްއެމްއޭ އިން ނުސީދާކޮށް ކިންގްސް ފޮރެކްސް އާ ދެކޮޅަށް ބަޔާން ނެރެ، ބީއެމްއެލްގައި ހުޅުވާފައިވާ ކިންގްސް ކެޕިޓަލް ހޯލްޑިންސްގެ އެކައުންޓްތައް ފްރީޒް ކުރީ، ކުޑަ މުއްދަތެއްގައި ބޮޑު ފައިދާއެއް ހޯދައިދޭނެ ކަމަށް ބުނެ މީހުންގެ އަތުން ފައިސާ ނަގައިގެން ބޮޑު ފްރޯޑެއް ހިންގަމުން އަންނަ ކަމަށް ތުހުމަތު ކޮށްފަ އެވެ.
މާޗު މަހު އެ ފިޔަވަޅު އެޅި ފަހުން ކިންގްސް ފޮރެކްސް އިން އިންވެސްޓަރުންނަށް ފައިސާ ދޫކޮށްފަ އެއް ނުވެ އެވެ. އެ ސްކީމުގައި ފަންސާސް މިލިއަނަށް ވުރެ ގިނަ ރުފިޔާ 1،600 އަށްވުރެ ގިނަފަރާތުން އިންވެސްޓު ކޮށްފައިވާ ކަމަށް ބެލެވެ އެވެ.
މީގެ އެއް ދުވަސް ކުރިން ކިންގްސްގެ ޓެލެގްރާމް ގްރޫޕުގައި ނެރުނު ބަޔާނެއްގައި ބުނީ އެ ކުންފުނީގެ އަގުވެއްޓޭ ގޮތަށް ޖިނާއީ ތުހުމަތުކޮށް، ފުލުހަށް މަނީ ލޯންޑަރިންގެ މައްސަލައެއް ވައްދާ، "ކުރި ގާނޫނާ ހިލާފު ކަންކަމުގެ ސަބަބުން" ވިޔަފާރި ހުއްޓި އޮންލައިންކޮށް ކޮށްފައި ހުރި އިންވެސްޓްމަންޓްތައް ހުއްޓި، އެފިލިއޭޓް ޓްރޭޑިން ޕާޓްނަރުގެ އެފިލިއޭޝަން ކެންސަލްވެ ވެފައިވާ ކަމަށެވެ.
".... ކުންފުނިން ޓްރޭޑްކުރަން ބޭނުންކުރި އެކައުންޓްތައް ވެސް ބަންދުވެ، ވިޔަފާރި އެކީ ހުއްޓި މިކުންފުންޏަށް ވަނީ އެތައް މިލިޔަން ރުފިޔާ, މިކުންފުނީގެ ޒިންމާގައި ހުރި ތިޔަ ބެފުޅުންގެ ފައިސާ, ގެއްލި ނުހަނު ބޮޑު ގެއްލުންވެފަ،" ކިންގްސް ގެ ބަޔާނުގައި ބުނެފައިވެ އެވެ.
ކިންގްސް އިން ކުރިން ބުނެފައި ވަނީ އިންވެސްޓަރުންނަށް ފައިސާ އަނބުރާ ދޭނެ ގޮތްތަކެއް ޖުލައި މަހުގެ ތެރޭގައި ހަމަޖައްސާނެ ކަމަށެވެ. އަދި މިފަހަރުގެ ބަޔާނުގައި ވެސް އެ ޔަގީންކަން ދީފައިވެ އެވެ.
ކިންގްސް ފޮރެކްސްގެ މައްސަލަ ތަހުގީގު ކުރަމުން އަންނައިރު، އަލްހާން ފަހުމީ އާ ގުޅުން ހުރި އިތުރު މައްސަލަ އެއްގައި އޭނާ އާއި އޭނާގެ އާއިލާ އިތުރު ތިން މީހަކު ބޭންކް އޮފް މޯލްޑިވްސް (ބީއެމްއެލް) އަށް ދައްކަން ޖެހޭ ކަމަށް ބޭންކުން ބުނާ 6.4 މިލިއަން ރުފިޔާ ނުދައްކާ އޮތުމުން އެ ފައިސާ ދެއްކުމަށް މިދިޔަ ހަފުތާގައި ސިވިލް ކޯޓުން ވަނީ ހުކުން ކޮށްފަ އެވެ.
