ޕެރިސް (ޖުލައި 5) - ފްރާންސްގެ ޕީއެސްޖީގެ ކޯޗަކަށް ކްރިސްޓޮފް ގަލްޓިއޭ ހަމަޖައްސައި، އެކަން އިއުލާނު ކުރުމަށް ޕީއެސްޖީން ތައްޔާރުވަމުންދާ ކަމަށް މީޑިއާ ރިޕޯޓްތަކުން ބުނެފި އެވެ.
ޕީއެސްޖީން ވަނީ މިއަދަށް ނޫސްވެރިންގެ ބައްދަލުވުމެއް ތާވަލްކޮށްފަ އެވެ. މި ބައްދަލުވުމާ ގުޅޭ އިތުރު މައުލޫމާތެއް ޕީއެސްޖީން ނުދިން ނަމަވެސް، މީޑިއާ ރިޕޯޓްތަކުން ބުނާ ގޮތުގައި މިއީ ގަލްޓިއޭ ،55، އެ ކްލަބާ ގުޅުނުކަން އިއުލާންކުރަން ބާއްވާ ނޫސްވެރިންގެ ބައްދަލުވުމެކެވެ.
އޭއެފްޕީން ސުވާލުކުރުމުން ވެސް، ޕީއެސްޖީން ގަލްޓިއޭ އެ ކްލަބާ ގުޅުނުކަން ކަށަވަރެއް ނުކޮށްދިނެވެ. އެހެން ނަމަވެސް، ޕީއެސްޖީ އޮފީހަށް ގަލްޓިއޭ ވަންނަނިކޮށް ފެންނަ ވީޑިއޯއެއް ފްރާންސްގެ ބައެއް މީޑިއާތަކުން ވަނީ ސޯޝަލް މީޑިއާގައި ހިއްސާކޮށްފަ އެވެ.
ޕީއެސްޖީން އާ ކޯޗެއް ހޯދަން މަސައްކަތް ކުރަމުންދާތާ ދުވަސްތަކެއް ވެއްޖެ އެވެ. އެހެން ނަމަވެސް، އެ ކްލަބުގެ ކޯޗަކަށް ހުރި، އާޖެންޓީނާގެ މައުރީސިއޯ ޕޮޗެޓީނިއޯ އާއި އޭނައާއެކު ތިބި ކޯޗިން ސްޓާފުން ކޮންޓުރެކްޓްގައި ތިބުމުން ވަކި ގޮތެއް އޮތީ ނުނިމި އެވެ.
ޕީއެސްޖީގައި 18 މަސް ދުވަސް ހޭދަކުުރުމަށް ފަހު، ޕޮޗެޓީނޯ އެ ކްލަބުން ވަކިވާކަން މިހާރު އޮތީ ކަށަވަރުވެފަ އެވެ. ޕީއެސްޖީގެ ކޯޗުކަމުން ޕޮޗެޓީނޯ ވަކިކުރަން ނިންމާފައިވާއިރު، އޭނާގެ ކޮންޓްރެކްޓްގައިވާ ބާކީ މުއްދަތަށް 21 މިލިއަން ޑޮލަރު ޕީއެސްޖީން ދައްކަން ޖެހޭނެ އެވެ. މިއީ ކޯޗިން ސްޓާފުންނާ އެކު ދައްކާ އަދަދެކެވެ.
އެންމެ ފަހުން ފްރާންސްގެ ނީސްގެ ކޯޗަކަށްހުރި ގަލްޓިއޭ އަކީ ފްރާންސްގެ ކްލަބު ފުޓްބޯޅައިގައި ފާއިތުވި 10 އަހަރުގެ ތެރޭގައި ފާހަގަކޮށްލެވޭ ނަމެކެވެ. ގަލްޓިއޭ ވަނީ ސެއިންޓް އެޓިއެން އާއި ލިލް އަށް ވެސް ކޯޗުކޮށްދީފަ އެވެ.
ލިލްއާ އެކު ގަލްޓިއޭ ވަނީ 2021 ވަނަ އަހަރު ފްރާންސް ލީގުގެ ޗެމްޕިއަންކަން ހޯދައިފަ އެވެ. ގަލްޓިއޭ އަށް އިނގިރޭސި ކްލަބްތަކުގެ ހުށަހެޅުންތަކެއް ލިބުނު ނަމަވެސް އޭނާ ފްރާންސް ފުޓްބޯޅައިގައި މަސައްކަތްކުރަން ބޭނުންވާތީ މަޑުކުރީ އެވެ.
ޕީއެސްޖީގެ ކޯޗަކަށް ގަލްޓިއޭ ހަމަޖެއްސުމަކީ، ބައެއް ފަރާތްތަކަށް ހައިރާންކަމެއް ލިބޭނެ ކަމެކެވެ. ގަލްޓިއޭ އަށް ވުރެ މަޝްހޫރު ކޯޗެއް ޕީއެސްޖީން ހަމަޖައްސާނެ ކަމަށް އޮތީ ބެލެވިފަ އެވެ. އެހެން ނަމަވެސް، ޕީއެސްޖީގެ ފުޓްބޯލް އެޑްވައިޒަރަކަށް ދާދި ފަހުން ހަމަޖެއްސި ލުއިސް ކެމްޕޯސް އަކީ ގަލްޓިއޭއާ އެކު ކުރިން ލިލްގައި މަސައްކަތްކުރި ފަރާތެކެވެ. ޕީއެސްޖީގެ ކޯޗަކަށް ގަލްޓިއޭ ހަމަޖެއްސުމުގައި، އެންމެ މުހިންމު ރޯލެއް އަދާކުރީ ކަމްޕޯސްކަމަށް ގަބޫލްކުރެވެ އެވެ.
ޕީއެސްޖީގެ ކޯޗުކަމަށް ޒިނެދިން ޒިދާން ގެންނަން ކުރި މަސައްކަތް ކާމިޔާބުނުވާނެ ކަމަށް ބެލެވެނީ ފްރާންސް ގައުމީ ޓީމާ ހަވާލުވާން އޭނާ މާ ބޮޑަށް ބޭނުންވެފައި ހުރުމެވެ.
