ހުއްދަ ނެތި ހައްޖު ކުރަން އުޅުނު 300 އެއްހާ މީހުން ހައްޔަރުކޮށް ޖޫރިމަނާކޮށްފައިވާ ކަމަށް ސައުދީ އަރަބިއްޔާގެ އިދާރާތަކުން ބުނެފި އެވެ.
"ހައްޖުގެ އުސޫލާ ހިލާފުވި 288 މީހުން ހައްޔަރު ކުރި،" ހައްޖުގެ ސަަލާމަތީ ކަންކަން އިސްކޮށް ބަލަހައްޓާ ލެފްޓިނެންޓް ޖެނެރަލް މުހައްމަދު އަލް ބަސަަމީ ވިދާޅުވި އެވެ.
ހައްޔަރު ކުރި ކޮންމެ މީހަކު ޖޫރިމަނާއެއްގެ ގޮތުގައި 10،000 ސައުދީ ރިޔާލް ނުވަތަ 2،600 އެމެރިކާ ޑޮލަރު ދައްކަން ޖެހޭނެ އެވެ.
މި އަހަރުގެ ހައްޖުގެ އަޅުކަން ބުދަ ދުވަހު ފަަށާއިރު، މި އަހަރު ހުއްދަ ލިބިފައި ވަނީ ޖުމްލަ އެއް މިލިއަން މީހުންނަށެވެ. އޭގެ ތެރެއިން 850،000 މީހުންނަކީ އެހެން ގައުމުތަކުގެ ރައްޔިތުންނެވެ.
އިދާރާތަކުން ބުނީ މިދިޔަ އާދީއްތަ ދުވަހާ ހަމައަށް އެކި ގަައުމުތަކުން ޖުމްލަ 650،000 ހައްޖުވެރިން ސައުދީ އަރަބިއްޔާއަށް އެތެރެވެފައިވާ ކަމަށެވެ.
ދެހާސް ނަވާރަ ވަނަ އަހަރު 2.5 މިލިއަން މީހުން ހައްޖުގެ އަޅުކަން އަދާކުރި އެވެ. ނަމަވެސް ކޮވިޑާ ގުޅިގެން ހައްޖުގެ އަޅުކަން އަދާކުރެވޭ މީހުންގެ އަދަދު ވަރަށް ބޮޑަށް ލިމިޓްކުރި އެވެ.
އެގޮތުން 2020 ވަނަ އަހަރު ހައްޖުގެ އަޅުކަން އަދާ ކުރުމުގެ ފުރުސަތު ލިބުނީ އެންމެ 1000 މީހުންނަށެވެ. އޭގެ ފަހުން 2021 ވަނަ އަހަރު ވެކްސިން ފުރިހަމަކޮށްފައިވާ އުމުރުން 65 އަހަރުން ދަށުގެ 60،000 މީހުންނަށް އެ ފުރުސަތު ލިބުނެވެ.
މި އަހަރު އެއް މިލިއަން މީހުންނަށް އެ ފުރުސަތު ދޭން ނިންމި ނަމަވެސް ޝަރުތުތަކުގެ ތެރޭގައި ކޮވިޑް ވެކްސިން ޖަހާފައިވުމާއި އުމުރުން 65 އަހަރުން ދަށުގެ މީހަކަށްވުން ހިމެނެ އެވެ.
ހައްޖުގެ އަޅުކަމަށް އެހެން ގައުމުތަކުން ސައުދީ އަރަބިއްޔާއަށް ދަތުރު ކުރާ މީހުން 72 ގަޑިއިރު ހަމަނުވާ ނެގެޓިވް ޕީސީއާރް ނަތީޖާއެއް ހުށަހަޅަން ޖެހޭނެ އެވެ.
