ސްރީލަންކާއަށް ކުރިމަތިވެފައިވާ ކާރިސާ ހައްލު ނުކުރެވޭ ނަމަ އާ ބޮޑު ވަޒީރު ރަނިލް ވިކްރަމަސިންހަ ވަގުތުން އިސްތިއުފާ ދެއްވުމަށް ގޮވާލައި، އެމަނިކުފާނުގެ ގެކޮޅު ބޭރުގައި ހޯމަ ދުވަހުގެ ރޭ މުޒާހަރާކޮށްފި އެވެ.
ބޮޑު ވަޒީރުގެ ގެކޮޅު ކައިރިއަށް ރަައްޔިތުން އެއްވާން ފެށީ ހޯމަ ދުވަހުގެ ރޭ 07:30 ހާއިރު އެވެ. އެ މީހުން ތިބީ ރަނިލްގެ އިސްތިއުފާއަށް ގޮވާލައި ބެނާތައް ހިފައިގެންނެވެ.
މުޒާހަަރާގެ ބައިވެރިންނަށް ބޮޑު ވަޒީރުގެ ގެކޮޅުގެ ގޯތި ތެރެއަށް ނުވަދެވޭނެ ގޮތަށް ހާއްސަ ސެކިއުރިޓީ ހަމަޖަައްސައި މަގުގައި ބެރިކޭޑް ޖަހާފައި ހުރި ކަމަށް ލަންކާގެ ނޫސްތަކުން ރިޕޯޓު ކުރި އެވެ.
ކުރީގެ ބޮޑު ވަޒީރު މަހިންދަ ރާޖަޕަކްސައާ ދެކޮޅަށް ބޭއްވި އެއްވުންތަކުގައި ބައެއް މީހުން ވަނީ ބޮޑު ވަޒީރުގެ ގެކޮޅުގެ ތެރެއަށް ވަންނަން ވެސް މަސައްކަތްކޮށްފަ އެވެ.
ރާޖަޕަކްސަ އިސްތިއުފާ ދެއްވުމުން، އެއްބައިވަންތަ ސަރުކާރެއްގެ ބޮޑު ވަޒީރުގެ ގޮތުގައި ރަނިލް އެ މަގާމަށް ވަޑައިގެންނެވީ މިދިޔަ މޭ މަހު އެވެ.
ނަމަވެސް އިގްތިސާދީ ހާލަތު އިތުރަށް ގޯސްވެ، ތެޔޮ ހުސްވެފައިވާ މައްސަލައިގައި ރައްޔިތުން ތިބީ ރުޅިގަދަވެފަ އެވެ. ބައެއް ޕަމްޕް ސްޓޭޝަންތަކުގައި ހަމަނުޖެހުން ވެސް ހިނގަމުންދެ އެވެ.
ޕެޓްރޯލް ކިޔުއެއްގައި ހުރި މީހެއްގެ ގައިގައި ސިފައިންގެ މީހަކު ކޮޅު ފައިން ޖަހާ މަންޒަރު ފެންނަަ ވީޑިއޯއެއް ހޯމަ ދުވަހު އާންމުވި އެވެ. އެ މައްސަލައާ ގުޅިގެން ސިފައިން ބުނީ ތަހުގީގެއް ފަށާފައިވާ ކަމަށެވެ.
