ސްރީލަންކާގައި މިހާރު ހުރީ އެންމެ ދުވަހަކަށް ފުދޭ ވަރަށް ވުރެ ވެސް މަދު ތެޔޮ ކަމަށް ހަކަތައާ ބެހޭ މިނިސްޓަރު އާދީއްތަަ ދުވަހު ވިދާޅުވި އިރު، އާއްމު ދަތުރުފަތުރު ހުއްޓުމަކަށް އައިސްފި އެވެ.
ޕެޓްރޯލާއި ޑީސެލް ބޭނުންވާ އުޅނދުތަކުގެ ކިޔޫ ވެރިރަށް ކޮލޮމްބޯގައި އެތައް ކިލޯމީޓަރަކަށް ފެތުރިފައިވާ އިރު، ގިނަ ޕަމްޕް ސްޓޭޝަންތަކުން ތެޔޮ ހުސްވިތާ ދުވަަސްތަކެއް ވެއްޖެ އެވެ.
ހަކަތައާ ބެހޭ މިނިސްޓަރު ކަންޗަަނާ ވިޖެސޭކަރަ ވިދާޅުވީ ޕެޓްރޯލް ރިޒާާވްގައި ހުރީ 4،000 ޓަން ކަމަށެވެ. އެއީ އެންމެ ދުވަހަކަށް ފުދޭ ވަރަށް ވުރެ ވެސް މަދެވެ.
"އާ ޝިޕްމަންޓެއް އަންނާނެ ކަމަށް ބެލެވެނީ ޖުލައި 22 ނުވަތަ 23 ގައި،" ވިޖެސޭކަރަ ނޫސްވެރިންނަށް ވިދާޅުވި އެވެ.
"ސަަޕްލަޔަރުންނާ ވާހަކަ ދައްކައިފިން، އެކަމަކު ޖުލައި 22 ގެ ކުރިން އާ ސަޕްލައި އަންނާނެކަމުގެ އެއްވެސް ޔަގީންކަމެއް ނެތް."
މިދިޔަ ހަފްތާގައި ސްރީލަންކާއިން ވަނީ ދެ ހަފްތާއަށް އާއްމުންނަށް ތެޔޮ ވިއްކުން މެދުކަނޑާލާފަ އެވެ. އެއީ ޒަރޫރީ ހިދުމަތްތަކަށް ތެޔޮ ރައްކާ ކުރުމުގެ ގޮތުންނެވެ.
އާދީއްތަ ދުވަހު ގިނަ ފިހާރަތައް ބަންދުކޮށްފަައި ހުރި އިރު، ހޯމަ ދުވަހު ބޭންކްތަކާއި އޮފީސްތައް ހުޅުވުމުން ހާލަތު އިތުރަށް ގޯސްވާނެ ކަމަށް ބެލެވެ އެވެ.
އެއް ތަނުން އަނެއް ތަނަށް ދަތުރު ކުރެވޭނެ ގޮތެއް ނެތި ބަސްތަކާއި ރޭލުތަކުގެ ކެޕޭސިޓީއަށް ވުރެ އިތުރަށް މީހުން އުފުލާތާ މިހާރު ވެސް ދުވަސްތަކެއް ވެއްޖެ އެވެ.
ޕްރައިވެޓް ބަސްތައް ދުއްވުން ވަރަށް ބޮޑަަށް މަދުވެފަައިވާ އިރު، ހޯމަ ދުވަހުން ފެށިގެން އެއްކޮށް ހުއްޓާލަން ޖެހިދާނެ ކަމަށް ކުންފުނިތަކުން ބުނެ އެވެ.
އޭގެ އިތުރުން ޓުކްޓުކްތައް ވެސް ޕެޓްރޯލް ކިޔުގައި ފުނިޖެހިފައި ވާތީ، ދަތުރު ކުރުމަށް ޓުކްޓުކެއް ވެސް ނުލިބޭ ކަމަށް ރިޕޯޓުތައް ބުނެ އެވެ.
ޒަރޫރީ ނޫން ސަރުކާރުގެ ހިދުމަތްދޭ ތަންތަނާއި ސްކޫލްތައް ޖުލައި 10 އާ ހަމައަށް ބަންދުކޮށްފައިވާ އިރު، ޕެޓްރޯލް ސްޓޭޝަންތަކުގައި ދޭތެރެ ދޭތެރެއިން ދަނީ ހަމަނުޖެހުން ހިނގަމުންނެވެ.
