އޮސްޓްރޭލިއާގެ އެންމެ ބޮޑު ސިޓީ، ސިޑްނީގެ ހުޅަނގު ދެކުނުގައި ފުރާނަައަށް ނުރައްކާވާ މިންވަރަށް ފެންބޮޑުވެދާނެތީ، އެތައް ހާސް ބަޔަކު ރައްކާތެރި ހިސާބުތަކަށް ބަދަލު ވާން އަންގައިފި އެވެ.
ނިއު ސައުތު ވޭލްސް ސްޓޭޓުގެ އިރުމަތީ އައްސޭރިފަށުގައި ނިއުކާސްލްއިން ފެށިގެން ބޭޓްމޭންސް ބޭޒް ސަރަހައްދާ ހަމައަށް ބޯކޮށް ވާރޭވެހި، ކޯރުތައް ބަންޑުންވެ، ފެންބޮޑުވުމާއި ބިންގަނޑު ކަނޑައިގެން ދިޔުމުގެ ނުރައްކާ ވަަނީ ބޮޑުވެފަ އެވެ. ބެލެވޭ ގޮތުގައި އާދީއްތަ ދުވަހުގެ ރޭ އިތުރަށް މޫސުން ގޯސްވާނެ އެވެ.
ނިއު ސައުތު ވޭލްސްގެ އެމެޖެންސީ ހިދުމަތްތަކާ ބެހޭ މިނިސްޓަރު ސްޓެފް ކުކް ވިދާޅުވީ ހާލަތު ދަނީ ވަރަށް އަވަހަށް ބަދަލުވަމުން ކަމަށާއި މީގެ ކުރިން ދުވަހަކު ވެސް ފެންބޮޑުނުވާ ހިސާބުތަކުގައި ފެންބޮޑުވުމުގެ ނުރައްކާ އެބަ އޮތް ކަމަށެވެ.
"މިއީ ފުރާނައަށް ނުރައްކާ އޮތް، ކުއްލި ހާލަތެއް،" ކުކް ވިދާޅުވި އެވެ.
މޫސުމާ ބެހޭ އިދާރާއިން ބުނީ ބައެއް ހިސާބުތަކަށް 350 މިލިމީޓަރުގެ ވާރޭވެހިފައިވާ ކަމަށާއި ނެޕިއަން އަދި ހޯކްސްބަރީ ކޯރުތައް ކައިރީގައި ފެންބޮޑުވުމުގެ ނުރައްކާ ބޮޑު ކަމަށެވެ.
ސިޑްނީގެ ހުޅަނގު ދެކުނުގައި އޮންނަ ކެމްޑެން އަަވަށް އޮތީ ފެނު އަޑީގައި ކަމަަށާއި ނޯތު ރިޗްމަންޑް އަދި ވިންޑްސާގައި ވެސް ފަހުގެ ތާރީހުގައި ފެންބޮޑުނުވާ މިންވަރަަށް ބޮޑުވާނެ ކަމަަށް މޫސުމާ ބެހޭ އިދާރާއިން ލަފާކުރެ އެވެ.
ފާއިތުވި 24 ގަޑިއިރުގެ ތެރޭގައި އެހީއަށް އެދި 2000 އަށް ވުރެ ގިނަ ކޯލް އެމެޖެންސީ ހިދުމަތްތަކަަށް ލިބިފައިވާ އިރު، ފެންގަނޑުގެ ތެރެއިން 29 މީހުން ސަލާމަތްކޮށްފައިވެ އެވެ.
އޮސްޓްރޭލިއާގެ ސަރުކާރުން ވަނީ މީހުން ސަލާމަތް ކުރުމުގެ މަސައްކަތަށް އެހީވުމަށް ނިއު ސަައުތު ވޭލްސްއަށް ދެ ހެލިކޮޕްޓަރާއި 100 ސިފައިން ފޮނުވާފަ އެވެ.
