ރާއްޖޭގެ ގިނަ ހިސާބުތަކަށް މޫސުން ގޯސްވެ، ބައެއް ރަށްތަކަށް އުދަ އެރުމުގެ ސަބަބުން ގައިން ގަޔަށް އަރާ ބަލިތައް ގިނަވެދަނެތީ ސަމާލުވުމަށް އިލްތިމާސްކޮށްފި އެވެ.
އައިޖީއެމްއެޗްގެ އެތެރެހަށީގެ ޑޮކްޓަރު، ޑރ. މުހައްމަދު އަލީގެ ޓްވިޓާގައި ވަނީ، ގައިން ގަޔަށް އަރާ ބަލިތައް ގިނަވެދަނެތީ އެކަމުން ރައްކާތެރިވުމަށް ކުރެވިދާނެ ކަންތައްތައް ހިއްސާކޮށް ދެއްވައިފަ އެވެ.
އޭނާ ވިދާޅުވީ އުދަ އެރުމުގެ ސަބަބުން ރަށު ތެރޭގައި ފެން ހެދި، އެންމެ އާންމުކޮށް ގިނަވެދާނެފަދަ ގައިން ގަޔަށް އަރާ ބައްޔަކީ ބޭރަށް ހިންގުން ކަމަށެވެ.
ބޭރަށްހިންގުމުން ރައްކާތެރިވުމަށް ކުރެވިދާނެ ކަންކަން:
- ކެއިން ބުއިމުގައި ސާފު ބޯފެން ބޭނުންކުރުން
- ކައްކާ ހިހޫކޮށްފައި ހުންނަ ބޯފެން ބޭނުން ކުރުން
- ކެއުމުގެ ކުރިންނާއި ފަހުންވެސް ރަނގަޅަށް ސައިބޯނި ލައިގެން އަތްދޮވުން
- ކެއުމަށް ބޭނުންކުރާ ތަށި ސަމުސާ ރަނގަޅަށް ދޮވެފައި ބޭނުންކުރުން
- ބޭރަށްހިންގާނަމަ ލޮނުޕެކެޓް ބޭނުން ކުރުން
މިއާއެކު ޑރ. މުހައްމަދު އަލީ ވަނީ ލޮނު ޕެކެޓު ތައްޔަރުކުރާނެ ގޮތުގެ އިރުޝާދު ވެސް ހިއްސާކުރައްވާފަ އެވެ. އޭނާ ވިދާޅުވީ ލޮނު ޕެކެޓު ތައްޔާރުކުރަން ވާނީ ކައްކާ ހިހޫކޮށްފައި ހުންނަ އެއް ލީޓަރުގެ ފެނަށް އެއް ޕެކެޓް އަޅައިގެން ކަމަށެވެ. އަދި ލޮނުޕެކެޓް ތައްޔާރު ކުރާތާ 24 ގަޑިއިރުތެރޭ ހުސްނުވާ ބައި އުކާލުމަށްފަހު އަލުން ތައްޔާރު ކުރުމަށް ވެސް އޭނާ އިރުޝާދު ދެއްވި އެވެ.
ޑރ. މުހައްމަދު އަލީ އިތުރަށް ވިދާޅުވީ ހޮޑުލެވޭނަމަ އެންމެ ފުރަތަމަ ބޭނުން ކުރާންވީ ހޮޑު މަނާކުރާބޭސް ކަމަށާއި ލޮނުޕެކެޓު ބޭނުންކުރަން ފަށާނީ ބޭސް ބޭނުންކުރަތާ 30 މިނިޓް ތެރޭގައި ކަމަށެވެ. އަދި ހޮޑު މަނާކުރާ ބޭސް ބޭނުން ކުރާތާ 30 މިނިޓް ތެރޭގައި ހޮޑު ލެވިއްޖެނަމަ, ހަމަ ކުރިން ބޭސް ދިން ވަރަށް ހޮޑު މަނާކުރާ ބޭސް ބޭނުން ކުރުމަށް އޭނާ ވަނީ އިރުޝާދު ދެއްވާފަ އެވެ.
މީގެ އިތުރުން ޑރ. މުހައްމަދު އަލީ ވިދާޅުވީ ހޮޑުލައި ބޭރަށް ހިންގާ ދުވަސްވަރު، ކިރު އަޅާފައި ހުންނަ އެއްޗިހި ބޭނުންކުރުމުން ގިނައިން ބޭރަށްހިންގުން އެކަށީގެންވާ ކަމަށެވެ.
އުދައިގެ އަސަރު
ރާއްޖެއަށް މިހާރު ކުރަމުންދާ ވިއްސާރާގައި އުދައިގެ އަސަރު 34 ރަށަކަށްކޮށް، 450 އަށް ވުރެ ގެއަކަށް ވަނީ ގެއްލުންވެފަ އެވެ.
ގެތަކަށް ލިބުނު ގެއްލުންތަކުގެ ސަބަބުން ބައެއް އާއިލާތަކަށް ވަނީ ވަގުތީ ބޯހިޔާވަހިކަން ފޯރުކޮށްދީފަ އެވެ. އެންޑީއެމްއޭއިން ބުނީ މިވަގުތު ތިން ރަށަކުން ހަ އާއިލާއެއް ވަގުތީ ބޯހިޔާވަހިކަމުގައި އެބަތިބި ކަމަށެވެ. ހަމައެއާއެކު އިޖާބަ ދިނުމަށް ބޭނުންވާ ތަކެއްޗާއި ބޯހިޔާވަހިކަން ބޭނުންވާ ފަރާތްތަކަށް އެހީ ފޯރުކޮށްދިނުމުގެ މަސައްކަތް ސިފައިންނާ ކައުންސިލް އިދާރާތަކާއި ގުޅިގެން ކުރަމުންދާ ކަމަށެވެ.
އުދަ އެރި ރަށްތަކުގެ ތެރެއިން، ހާލުގައި ޖެހުމުގެ ސަބަބުން އާއިލާތަކަށް ބޯހިޔާވަހިކަން ފޯރުކޮށްދެމުންދަނީ އައްޑުއާއި، ތ. ތިމަރަފުއްޓާއި، ގދ. މަޑަވެއްޔެވެ. މަޑަވެލީގެ ހަތަރު އާއިލާއެއް، ތިމަރަފުށީގެ އެއް އާއިލާ އަދި އައްޑޫގެ އެއް އާއިލާއަށް ވަގުތީ ބޯހިޔާވަހިކަން ފޯރުކޮށްދެމުން ދަނީ އިއްޔެއިން ފެށިގެންނެވެ.
އުދައިގެ އަސަރު ގދ، ރަތަފަންދޫ 110 ގެއަކަށް ކޮށްފައިވާއިރު، ތ. މަޑިފުށީގެ 60 ގެއަށް، ތ. ކިނބިދޫގެ 58 ގެއަށް އަދި އައްޑޫ ސިޓީ މަރަދޫއާއި މަރަދޫފޭދޫގެ 80 ގެއަކަށް ވަނީ ކޮށްފަ އެވެ.
