ރައްޔިތުންގެ މަޖިލީހުގެ ރައީސް އަދި ކުރީގެ ރައީސް މުހައްމަދު ނަޝީދުގެ ކޮއްކޮ އަދި ގާނޫނީ ވަކީލު ނާޒިމް ސައްތާރު ދިފާއުކޮށް ލިބެން ޖެހޭ އަދަބެއް ހުއްޓުވަން މަސައްކަތް ނުކުރައްވާ ކަމަށް ނަޝީދު މިރޭ ވިދާޅުވެއްޖެ އެވެ.
ސޯޝަލް މީޑިއާގައި ނާޒިމް ކަމަށް ބެލެވޭ މީހަކު އިތުރު ފިރިހެނަކާ އެކު އެއް ޖިންސުން ގުޅުން ހިންގައި ބަދު އަހުލާގީ އަމަލު ހިންގާ މަންޒަރު ފެންނަ ވީޑިއޯއެއް ދަނީ ދައުރުވަމުންނެވެ. އެ މައްސަލައާއެކު ބްލެކްމެއިލް ކުރުމުގެ މައްސަލައެއް ފުލުހުން ދަނީ ތަހުގީގު ކުރަމުންނެވެ.
މަޖިލީހުގެ ރައީސްއަށް ސުވާލު ކުރެވޭ ގޮތަށް ކުރިއަށް ގެންދާ "އާސްކް ސްޕީކާ" ޕްރޮގްރާމްގައި އެ ވީޑިއޯއާ ގުޅޭ ގޮތުން ސުވާލު ކުރުމުން ނަޝީދު ވިދާޅުވީ އެއްވެސް މީހަކަށް ދޭން ޖެހޭ ހައްގު އަދަބެއް ހުއްޓުވަން އެމަނިކުފާނު މަސައްކަތް ނުކުރައްވާ ކަމަށެވެ.
"އެއް ގޮތަކަށް ވެސް އަޅުގަނޑުގެ ކޮއްކޮއަށް ލިބެން ޖެހޭ ހައްގު އަދަބެއް ނުދޭން އަޅުގަނޑު ނުދަންނަވާނަން، އަދި އެއްވެސް މީހަކަށް ލިބެން ޖެހޭ ހައްގު އަދަބު ލިބުން ހުއްޓުވުމަކަށް ވެސް އަޅުގަނޑު ނުދަންނަވާނަން،" ނަޝީދު ވިދާޅުވި އެވެ.
އެހެން ނަމަވެސް ކަމެއް ހިނގުމުން އެ ކަމުގެ ދެކޮޅު ނުބަލައި، އެއަށް ބަސް ބުނުމާއި އަދަބު ދޭން އުޅުމަކީ އިސްލާމީ ޝަރީއަތާއި ގާނޫނުތަކުގައި ވެސް އޮތް ގޮތެއް ނޫން ކަމަށް ނަޝީދު ވިދާޅުވި އެވެ.
"އަޅުގަނޑު ހަމައެކަނި މި ދަންނަވާ ވާހަކައަކީ ކަމެއް ހިނގާ އިރަށް އަޅުގަނޑުމެން އޭގެ ދެކޮޅު ނުބަލައި، ވާނުވާ ނޭނގި، އެ އަމަލު ކުރަން ފެށުމަކީ އިސްލާމީ ޝަރީއަތާއި ގާނޫނުތަކުގައި ވެސް އޮތް ގޮތެއް ނޫން،" ނަޝީދު ވިދާޅުވި އެވެ.
ބްލެކްމެއިލްގެ މައްސަލާގައި 43 މީހުންނާ ގުޅޭ ފޮޓޯ ނަގައި އަދި ބައެއް ފޮޓޯ އުފައްދާފައިވާ ކަމަށް ވެސް ނަޝީދު ވިދާޅުވި އެވެ. އަދި އެމަނިކުފާނުގެ އަތްޕުޅުގައި އެ މައްސަލާގައި ހުރި ބައެއް މައުލޫމާތުތައް ހިއްސާކޮށްފައިވާ ކަމަށް އެމަނިކުފާނު ވިދާޅުވި އެވެ.
އެ ވީޑިއޯއިން ފެންނަނީ ނާޒިމް ކަމަށް އޭނާ އިންކާރު ކުރެ އެވެ. ވީޑިއޯގެ މައްސަލައިގައި ނާޒިމް ފުރުން މަނާކޮށް އޭނާގެ ޕާސްޕޯޓް ވެސް ވަނީ ހިފަހައްޓައިފި އެވެ.
ވީޑިއޯގެ އިތުރަށް މީގެ އަހަރުތަކެއް ކުރިން ނާާޒިމް ކުރެއްވި ޓްވީޓެއްގައި ރަސޫލާއަށް ފުރައްސާކޮށްފައިވާ ކަމަށް ބެލެވޭ ވާހަކަތަކެއް ލިޔުއްވާފައި އޮތުމުން އެ މައްސަލަ ވެސް ފުލުހުން ގެންދަނީ ތަހުގީގު ކުރަމުންނެވެ.
