ލަންޑަން (ޖޫން 30) - މިހާރު ކުރިއަށްދާ ގްރޭންޑް ސްލޭމް ޓެނިސް މުބާރާތް، ވިމްބަލްޑަންގެ ދެ ވަނަ ބުރުން އިނގިރޭސި ދެ ކުޅުންތެރިން ކަމަށްވާ އެންޑީ މަރޭ އާއި އެމާ ރަޑުކާނޫ ކަޓައިފި އެވެ.
އެމާ އާއި މަރޭ މި ފަހަރުގެ މުބާރާތަށް ކުރިމަތިލީ ބޮޑެތި ޓާގެޓްތަކަކާ އެކު، ކެރިއަރުގައި ކުރިއަށް ފިޔަވަޅެއް އެޅުމަށް އަމާޒުހިފައިގެންނެވެ. އެކަމަކު، ދެ ވަނަ ބުރުން ބަލިވުމުން ރޭންކިންގައި ވެސް ކުރިއަށްދާން ބޭނުންވާ ޕޮއިންޓް ޓާގެޓާ ހަމައަށް ވެސް ނުދެވުނީ އެވެ.
ސްކޮޓްލެންޑަށް އުފަން، މަރޭ، 35، ވިމްބަލްޑަން އިން ކެޓީ ދެ ވަނަ ބުރުގައި އެމެރިކާގެ ޖޯން އިސްނާ އަތުން 6-4 7-6 (7-4) 6-7 (3-7) 6-4 އިން ބަލިވުމުންނެވެ. އިންގްލެންޑްގެ އެމާ، 19، ދެ ވަަނަ ބުރުގައި ބަލިވީ ފްރާންސްގެ ކެރޮލީން ގާސިއާ އަތުން 6-3، 6-3 އިންނެވެ.
މިދިިޔަ އަހަރުގެ ވިމްބަލްޑަން މުބާރާތުން ގިނަ ބަޔެއްގެ ސަމާލުކަން ހޯދައި، ޔޫއެސް އޯޕަން ޗެމްޕިއަންކަން ހޯދި އެމާ، މި ފަހަރުގެ ވިމްބަލްޑަން އަށް އައީ ޗެމްޕިއަނެއްގެ ވިސްނުން އިސްކޮށް، އަލުން ކެެރިއަރު ޓްރެކަށް އެޅުވުމަށެވެ. އެކަމަކު، ދެ ވަނަ ބުރުން ކެޓުމުން ބޭނުންވާ އަމާޒަށް ނުދެވުނީ އެވެ.
"އަހަންނަށް ކޮންމެ ކަމެއް ވެސް އެއީ ދަސްކުރުމުގެ މަރުހަލާއެއް. މިއީ ވެސް ގިނަ ކަންކަން ދަސްވި މުބާރާތެއް، ކެރޮލީން އަކީ ވެސް މޮޅު ކުޅުންތެރިއެއް، އަހަންނަށް އޭނަ ކައިރީގައި މޮޅަށް ނުކުޅެވުނީ، މި ވަގުތު ހާލަތު އޮތްގޮތުން އަހަންނަށް މާ ބޮޑެތި އުންމީދުތަކެއް ހިފައިގެން ދެވެން ނެތް،" އެމާ ބުންޏެވެ.
އެމާ ބުނީ މިދިޔަ މަހުގެ ފްރެންޗް އޯޕަން އަށް ފަހު، އަނިޔާގެ މައްސަަލަތަކާ ހެދި ޝެޑިއުލްކޮށްގެން ޓްރެއިނިން ގެންދެވޭ ގޮތް ނުވުމުން ކުޅުމަށް އަސަރުކުރިކަން މި ފަހަރުގެ ވިމްބަލްޑަން މެޗުތަކުން އިހުސާސް ކުރެވުނު ކަމަށެެވެ. ވިމްބަލްޑަން އަށް އައިިއިރު، އެމާ ސީޑްކޮށްފައި އޮތީ 10 ވަނަ އަށެވެ.
ވިމްބަލްޑަންެ މެޗެއްގެ ތެރެއިން މަރޭ: އޭނާ އަށް މި ފަހަރުގެ މުބާރާތުގައި ވެސް ކުރިއަށް ނުދެވުނު.
މަޑުމަޑުން ފޯމަކަށް އެޅި، އެމާގެ ވިސްނުން ހުރީ އޮގަސްޓް ފަހު ކޮޅު ފަށާ ޔޫއެސް އޯޕަން އަންނަން ވާއިރަށް ރަނގަޅު ލެވަލެއްގައި ހުރުމަށެވެ.
އެމާ އެކޭ އެއްގޮތަށް ވިމްބަލްޑަން އިން ފިލާވަޅު ނަގައި، ޔޫއެސް އޯޕަންއާ މެދު އުންމީދުގައި ހުރި އަނެއް ކުޅުންތެރިއަކީ މަރޭ އެވެ.
ކުރިން ދުނިޔޭގެ ރޭންކިން އެއް ވަނައިގައި އޮތް މަރޭ މި ފަހަރުގެ ވިމްބަލްޑަން އަށް އައިއިރު އޮތް އަމާޒަކީ ރޭންކިން މައްޗަށް ގެންގޮސް، ގްރޭންޑް ސްލޭމް މުބާރާތްތަކުގައި ސީޑް ކުރެވޭ ކުޅުންތެރިއެއްގެ ލެވަލަށް ދިއުމަށެވެ.
މި ވަގުތު ދުނިޔޭގެ ރޭންކިން 52 ވަނައިގައި އޮތް މަރޭ ބުނީ ޔޫއެސް އޯޕަންގައި ސީޑްކުރެވޭ ކުޅުންތެރިއެއްގެ ލެވަަލަށް ނުދެވުނަސް އެ މުބާރާތުގައި ހާއްސަ ޓާގެޓްތަކެއް ކަނޑައަޅައިގެން މަސައްކަތް ކުރާނެ ކަމަށެވެ.
"ރޭންކިން ރަނގަޅު ކުރުން މި ވަގުތު އެންމެ ބޮޑު ޓާގެޓަކީ، ޔޫއެސް އޯޕަންގައި އެކަން ނުވިއްޔާ އަންނަ އަހަރުގެ އޮސްޓްރޭލިއަން އޯޕަންގައި މަސައްކަތް ކުރާނަން، މޮޅެތި ކުޅުންތެރިންނާ އެކު ނަތީޖާ ނެރެގެން އެކަން ވާން އޮތީ، މި އަހަރު އޮތް މުބާރާތްތަކުގައި އެކަން ކުރެވޭތޯ ބަލާނަން،" މަރޭ ބުންޏެވެ.
ވިމްބަލްޑަންގައި މަރޭ ޖުމްލަ 13 ފަހަރު ވާދަކުރިއިރު، ދެ ފަހަރެއްގެ މަތިން ވަނީ ޗެމްޕިއަންކަން ހޯދައިފަ އެވެ.
މި އަހަރުގެ ދެ ގްރޭންޑްސްލޭމް ޓެނިސް މުބާރާތް ކާމިޔާބުކުރި ސްޕެއިނުގެ ރަފައެލް ނަޑާލް ވަނީ މި ފަހަރުގެ ވިމްބަލްޑަންގައި ކުޅުނު ފުރަތަމަ މެޗުން ފްރާންސިސްކޯ ސެރުންޑޯލޯ ބަލިކޮށްފަ އެވެ. ދެ ވަނަ ބުރުގައި ނަޑާލް ކުޅޭ މެޗުގައި މިއަދު ނުކުންނާނީ ލިތުއޭނިއާގެ ރިކާޑަސް ބެރަންކީސްއާ ދެކޮޅަށެވެ.
