މިދިޔަ އަހަރު އޮގަސްޓު މަހު ފެށި ދިރާސީ އާ އަހަރުގެ ކިޔެވުން ނިމި ދަރިވަރުންގެ ބޮޑު ޗުއްޓީ މިއަދު ފެށިއްޖެ އެވެ.
މާލެ އާއި އަތޮޅުތަކުގެ ސްކޫލްތަކުގައި ކިޔެވުން ނިމި ބައެއް ސްކޫލްތަކުގައި މިހާރު ވަނީ ރިޕޯޓް ފޯމް ދީފަ އެވެ. އެކަމަކު އެޑިއުކޭޝަނުން ހަމަޖައްސާފައިވާ ގޮތުން, ދަރިވަރުންގެ ޗުއްޓީ ފެށޭނީ މިއަދުން ފެށިގެންނެވެ.
ކޮވިޑާ ގުޅިގެން އެކަޑަމިކް ކަލަންޑަރަށް ބޮޑެތި ބަދަލުތަކެއް 2020ވަނަ އަހަރު ގެނަ އެވެ. އެންމެ ބޮޑު އެއް ބަދަލަކީ ދިރާސީީ އަހަރު، އަހަރުގެ ފަހުކޮޅަށް ނުނިންމައި، އަހަރުގެ ޖޫންއާ ހިސާބަށް އިތުރުކުރުމެވެ. އެއާއެކު، ދެން ކޮންމެ އަހަރެއްގެ ވެސް ބޮޑު ޗުއްޓީ އަހަރުގެ މެދުން ފަށާ ގޮތަށް ހަމަޖެއްސުމެވެ.
ބޮޑު ޗުއްޓީއަށްފަހު، ސްކޫލްތަކުގައި އަލުން ކިޔެވުން ފެށޭނީ އަންނަ އޯގަސްޓުމަހުގެ ހަތް ވަނަ ދުވަހު އެވެ.
ދިރާސީ އަހަރުގެ ޗުއްޓީ އާއެކު, ކުރިއަށް އޮތީ ބޮޑު އީދު ކަމުން ކޮވިޑުގެ ފިޔަވަޅުތަކަށް ސަމާލުވުމަށް އެޗްޕީއޭން ވެސް ވަނީ އިލްތިމާސް ކޮށްފަ އެވެ. އެއީ މި ދުވަސްވަރު ކޮވިޑް ފެތުރޭ މިންވަރު އިތުރު ވެފައި ވާތީ އެވެ.
ރާއްޖޭގެ ކޮވިޑް ހާލާތު
އެޗްޕީއޭއިން އާންމުކުރި ތަފާސްހިސާބުތަކުން ދައްކާ ގޮތުގައި، ޖޫން 19 އިން 25 އާ ހަމައަށް މުޅި ރާއްޖޭން 1202 މީހުން ކޮވިޑަށް ޕޮޒިޓިވްވެފައިވެ އެވެ. އެގެ ތެރޭގައި ހިމެނެނީ މާލެ ސަރަހައްދުން ޕޮޒިޓިވްވި 528 މީހަކާއި އަތޮޅުތެރޭގެ ރަށްތަކުން 452 މީހެއްގެ އިތުރުން ސަފާރީތަކާއި ރިސޯޓްތައް ހިމެނޭހެން އެހެނިހެން ތަންތަނުން 222 މީހެކެވެ.
ވެއެތުވެދިޔަ ހަފްތާގައި ކޮވިޑަށް ޕޮޒިޓިވްވެފައި ވަނީ ކޮވިޑަށް ޓެސްޓުކުރި މީހުންގެ ތެރެއިން 35 ޕަސަންޓު މީހުންނެވެ. ސާމްޕަލް ޕޮޒިޓިވިޓީއަކީ އެތަނެއްގައި ބަލި ފެތުރޭ މިންވަރު ދެނެގަތުމަށް އެހީތެރިވެދޭ އެންމެ މުހިންމު އެއް ފެކްޓާ އެވެ.
އަނެއް ފެކްޓާއަކީ، ބަލި ޖެހޭ މީހުންގެ ތެރެއިން ހޮސްޕިޓަލުގައި އެޑްމިޓް ކުރާ މީހުންގެ އަދަދެެވެ. މިދިޔަ ހަފްތާއަށް ބަލާލި ނަމަވެސް ޖުމްލަ 51 މީހަކު ވަނީ ކޮވިޑް ޖެހިގެން ހޮސްޕިޓަލުގައި އެޑްމިޓްކޮށްފަ އެވެ.
ހަމައެއާއެކު ވޭތުވެދިޔަ ހަފްތާތެރޭގައި ކޮވިޑް ބަލީގައި ފަސް މީހަކު މަރުވެފައިވާ ކަމަށް ވެސް އެޗްޕީއޭއިން އާންމުކުރި ތަފަސްހިސާބުތަކުން ދައްކަ އެވެ. އޭގެ ތެރޭގައި އުމުރުން ދުވަސްވީ މީހުންގެ އިތުރުން ޒުވާނުން ވެސް ހިމެނެ އެވެ.
