ހުއްދަ ނެތި ހައްޖު ކުރަން އުޅޭ ކޮންމެ މީހަކަށް 2،665 ޑޮލަރުގެ ޖޫރިމަނާއެއް ކުރާނެ ކަމަށް ސައުދީ އަރަބިއްޔާއިން ބުނެފި އެވެ.
ޕަބްލިކް ސެކިއުރިޓީ ތަރުޖަމާނު ސާމީ އަލް ޝުވައިރާ ވިދާޅުވީ ހައްޖު މޫސުމުގައި އަޅުކަން ކުރިއަށްދާ ހުރިހާ ހިސާބެއްގައި ސަލާމަތީ ފައުޖުތައް އުޅޭނެ ކަމަށެވެ.
އޭގެ އިތުރުން ހައްޖުގެ އަޅުކަމާ ގުޅޭ ގޮތުން މަކަރާއި ހީލަތުން ފައިސާ ހޯދަން އުޅޭ ކަމުގެ ތުހުމަތުގައި މިހާތަނަށް 19 މީހުން ހައްޔަރުކޮށްފައިވާ ކަމަށް އޭނާ ވިދާޅުވި އެވެ.
މި އަހަރު ހައްޖުގެ އަޅުކަމުގައި ބައިވެރިވުމުގެ ހުއްދަ ލިބިފައި ވަނީ ސައުދީ އަރަބިއްޔާގެ އެތެރެއިންނާއި އެހެން ގައުމުތަކުން އެއް މިލިއަން މީހުންނަށެވެ.
ދެހާސް ނަވާރަ ވަނަ އަހަރު 2.5 މިލިއަން މީހުން ހައްޖުގެ އަޅުކަން އަދާކުރި އެވެ. ނަމަވެސް ކޮވިޑާ ގުޅިގެން ހައްޖުގެ އަޅުކަން އަދާކުރެވޭ މީހުންގެ އަދަދު ވަރަށް ބޮޑަށް ލިމިޓްކުރި އެވެ.
އެގޮތުން 2020 ވަނަ އަހަރު ހައްޖުގެ އަޅުކަން އަދާ ކުރުމުގެ ފުރުސަތު ލިބުނީ އެންމެ 1000 މީހުންނަށެވެ. އޭގެ ފަހުން 2021 ވަނަ އަހަރު ވެކްސިން ފުރިހަމަކޮށްފައިވާ އުމުރުން 65 އަހަރުން ދަށުގެ 60،000 މީހުންނަށް އެ ފުރުސަތު ލިބުނެވެ.
މި އަހަރު އެއް މިލިއަން މީހުންނަށް އެ ފުރުސަތު ދޭން ނިންމި ނަމަވެސް ޝަރުތުތަކުގެ ތެރޭގައި ކޮވިޑް ވެކްސިން ޖަހާފައިވުމާއި އުމުރުން 65 އަހަރުން ދަށުގެ މީހަކަށްވުން ހިމެނެ އެވެ.
ހައްޖުގެ އަޅުކަމަށް އެހެން ގައުމުތަކުން ސައުދީ އަރަބިއްޔާއަށް ދަތުރު ކުރާ މީހުން 72 ގަޑިއިރު ހަމަނުވާ ނެގެޓިވް ޕީސީއާރް ނަތީޖާއެއް ހުށަހަޅަން ޖެހޭނެ އެވެ.
