ރާއްޖޭގެ ވޮލީބޯޅަ އަށް ރަނގަޅު ބަދަލެއް ގެނެސް ބޭނުންވާ ކުރިއެރުންތައް ހޯދަން ބޭނުންވާ ކަމަށްވަންޏާ ވޮލީ އާއިލާގެ އެންމެންގެ އެއްބާރުލުން ދޭންޖެހޭ ކަމަށް އޮއްފު އެފްސީ އަދި ގައުމީ ބީޗްވޮލީބޯޅަ ޓީމުގެ އެސިސްޓަންޓް ކޯޗު މުހައްމަދު ރިޝްވާން ބުނެފި އެވެ.
މި ފަހަރުގެ ވޮލީބޯޅަ ސީޒަން ކުރިއަށްދަނީ ޑްރާފްޓް ސިސްޓަމެއް މެދުވެރިކޮށް، އިންޑިއާގެ ޕްރައިމް ވޮލީބޯލް ލީގުގައި ކުޅޭ މޮޅު 18 ކުޅުންތެރިން ރާއްޖޭގެ ހަ ކްލަބަށް ބަހައިގެންނެވެ. އެއީ ޓީމަކަށް ބޭނުންވާ ތިން މަގާމަކަށް ބިދޭސީ ތިން ކުޅުންތެރިން ލިބޭ ގޮތަށެވެ. މިއީ ރާއްޖޭގެ ކުޅިވަރު އެސޯސިއޭޝަނުން މި ކަހަލަ ގޮތެއްގައި ކުރާ ފުރަތަމަ ތަޖުރިބާ އެވެ. މި އަށް ބަދަލެއް ގެންނަން ޖެހޭ ކަންކަމުގެ ރިވިއުއެއް ސީޒަން ނިމުމުން ހަދާނެ ކަމަށް ވީއޭއެމުން ވެސް ވަނީ ބުނެފަ އެވެ.
ސިޓީ އަތުން އިއްޔެ ބަލިވި މެޗަށް ފަހު ރިޝްވާން ބުނީ ރެފްރީންގެ ނިންމުންތައް ހުންނަނީ ވަރަށް "އެއްބާރުލުން ކުޑަ" ގޮތަކަށް ކަމަށާއި މުބާރާތް ފެށުނުއިރުއްސުރެ މެޗުތައް ހަލާކުވެގެންދާ އެއް ސަބަބަކީ އެއީ ކަމަށެވެ.
"އެއްބާރުލުން ދީގެން މިކަން ކުރާކަށް ނޫޅޭ މިހާރު ޓީމުތައް ހަމަ ފުނޑެނީ، އަނގައިން ބުންޏަސް ކާޑު ދައްކަނީ، އެއްވެސް ކަަހަލަ ސަޕޯޓެއް ނުދޭ، މީތި އަސްލު ރަނގަޅުކުރަން ބޭނުންވަނީ ވޮލީ އަށް ޓަކައި، މިސާލަކަށް ނާދޭ މިތަނަކަށް ބަލާކަށް މީހަކު، މިތާނެތް 10 މީހުން ވެސް ހަމަނުވޭ، ފެށުންއިރު އޮތީ ތަންކޮޅެއް ރަނގަޅަށް، ވަރަށް ފޯރީގައި ދިޔަ އެއްޗެއް ބައެއް މީހުން އަސްލު މި ގޯސްކުރަން ވެގެން މަސައްކަތް ކޮށްފައި މި އޮތީ،" ރިޝްވާން ބުންޏެވެ.
"އެއްބާރުލުން ދޭން ޖެހޭ ހުރިހާ ފަރާތަކުން ވެސް މިކަން ކުރަން ބޭނުމިއްޔާ، ވޮލީ އަށް ހެޔޮ އެދެންޏާ އެންމެން އެއްބާރުލުން ދޭންޖެހޭ. މީގެ އަށް ވޮލީ ފެމިލީ އެބަޖެހޭ ސަޕޯޓް ދޭން. ދީގެން މިކަން ވާނީ، މިކަން ކަން އެބަޖެހޭ ރަނގަޅު ކޮށްލަން،"
ބައެއް ކްލަބްތަކުގެ ބިދޭސީ ކުޅުންތެރިންނަށް އަނިޔާވެ ފޮނުވާލަން ޖެހުނުއިރު، މި ފަހަރު އުސޫލު ހަމަޖެހިފައިވާ ގޮތުން އަނިޔާވެގެން ކުޅުންތެރިއަކަށް ނުކުޅެވިއްޖެނަމަ ބަދަލުގައި ކުޅުންތެރިއަކު ނުލިބެ އެވެ. އެކަމަކު، ޒަރޫރީ ކަމެއްގައި އެނބުރި ގައުމަށް ދާން ޖެހުމުން ވެމްކޯގެ ސެޓަރު ރަންޖިތު ސިންގްގެ ބަދަލުގައި އެ ޓީމަށް ސެޓަރެއް ވަނީ ގެނެސްދީފަ އެވެ.
އެސޯސިއޭޝަން ކަޕާއި ގައުމީ ލީގުގައި އޮއްފު އިން ޖުމްލަ އަށް މެޗު ކުޅުނުއިރު މޮޅުވީ އެއް މެޗުންނެވެ. އޮއްފު އިން ލީގާ ކުރިމަތިލިއިރު، އެންމެ ބޮޑު ގޮންޖެހުމަކީ އެ ޓީމަށް ގެނައި އިންޑިއާގެ ހުނަރުވެރި ކުޅުންތެރިޔާ، އަމިތު ގޫލިއާ އަށް އަނިޔާވެގެން ފޮނުވާލަން ޖެހުމެވެ.
"ވަރަށް ބޮޑަށް އިންޖަރީ އެބައުޅޭ، އަހަރެމެންގެ ވެސް އެއް ބޭރު މީހާ ފުރައިގެން އެ ދިޔައީ، ރިޕްލޭސްމަންޓެއް ވެސް ނުލިބުނު، މިއީ ދެން މި ފަހަރު ހެދިފައި އިން ގަވައިދު، ވެމްކޯ އަށް ވެސް އިންޖަރީ މައްސަލަ ދިމާވި، އެ މީހުންނަށް ކުޅުންތެރިއަކު ލިބިއްޖެ، ދެން، އަހަރެމެންނަށް އެ ވަރަށް ކުޅުންތެރިއަކު ހޯދަން ފައިޓް ނުކުރެވުނީ ކަންނޭނގެ،" ރިޝްވާން ބުންޏެވެ.
ލީގުގެ ފުރަތަމަ ތިން މެޗުން ބަލިވުމުން އޮއްފު އަށް ދެން ގަދަ ހަތަރަކަށް ވަދެ، ގައުމީ މުބާާރާތަށް ކޮލިފައިވެވޭނެ ފުރުސަތު ކުޑަ އެވެ. އެކަމަކު، ރިޝްވާންގެ ވިސްނުމަކީ އެ ޓީމަށް ދެން އޮތް ދެ މެޗުގައި ޕޮލިސް ކްލަބާއި ގުޑީސް ސްޕޯޓްސް ކްލަބް އަތުން ކާމިޔާބެއް ހޯދަން ކުރެވެން ހުރި މަސައްކަތެއް ކުރުން ކަމަށެވެ.
ސިފައިންނާ ދެކޮޅަށް އޮއްފު ކުޅުނު މެޗުގައި އެ ޓީމުގެ ހުސެއިން ސައީދު (ސެންޑީ)ގެ ފަރާތުން ފެނުނު ކަންތައްތަކަށް ފަހު އޭނާ ވަނީ އިއްޔެ އޮއްފުން ސިޓީއާ ކުޅުނު މެޗަށް ވަނީ ސަސްޕެންޑްކޮށްފަ އެވެ. ދެން، ކުޅޭ ދެ މެޗުގައި ސެންޑީ އަށް ކުޅެވޭނެ އެވެ.
