ރަތް ކަނޑު ސަރަހައްދުގައި އޮންނަ އުރުދުންގެ އަގަބާ ބަނދަރުގަައި ވިހަ ގޭހެއް ލީކުވެ، 10 މީހުން މަރުވެ 251 މީހުންނަށް ފަރުވާދޭން ޖެހިއްޖެ އެވެ.
ޕަބްލިކް ސެކިއުރިޓީ ޑިރެކްޓޮރޭޓުން ދައުލަތުގެ މީޑިއާއަށް ބުނީ އެކަން ދިމާވީ ކްރޭނެއް ހަލާކުވެ، ކެމިކަލް ގުދަންކޮށްފައި ހުރި ކޮންޓެއިނަރެއް ބިން މައްޗަށް ވެއްޓުމުން ކަމަށެވެ.
ވީޑިއޯއިން ފެންނަނީ ލޮރީއެއްގައި އޮތް ކޮންޓެއިނަރެއް ކްރޭނަކުން އުފުލައި، ބަނދަރުކޮށްފައި އޮތް މަނަވަރެއްގެ ތެރެއަށް އެ ކޮންޓެއިނަރު ވެއްޓޭ މަންޒަރެވެ.
ކޮންޓެއިނަރު ވެއްޓުމާ އެކު މަނަވަރާއި ބަނދަރު ސަރަހައްދުގައި ރީނދޫ ދުން ނުވަތަ ގޭސް ފެތުރޭ މަންޒަރު ވެސް ފެނެ އެވެ. އެއާ އެކު މީހުން ސަލާމަަތް ވާން ދުވަން ފެށި އެވެ.
އެ ހާދިސާ ހިނގި ސަރަހައްދު ސާފު ކުރަން ހާއްސަ ޓީމެއް ފޮނުވާފައިވާ އިރު، ކޮންޓެއިނަރުން ލީކުވީ ކޮން ބާވަތެއްގެ ކެމިކަލެއް ކަމެއް ހާމަކޮށްފައެއް ނުވެ އެވެ.
އެ ކެމިކަލްގެ އަސަރު ކުރުމުން 200 އެއްހާ މީހުންނަށް ފަރުވާދެމުންދާ އިރު، ދެން ތިބި މީހުން ވަނީ ފަރުވާއަށް ފަހު ހޮސްޕިޓަލުން ދޫކޮށްލާފަ އެވެ.
