އަންގާރަ ދުވަހުން ފެށިގެން ޖުލައި 10 ވަނަ ދުވަހާ ހަމައަށް ސްރީލަންކާގައި އެއްވެސް ޕްރައިވެޓް އުޅަނދަކަށް ތެޔޮ ނުވިއްކަން އެ ގައުމުގެ ވަޒީރުންގެ މަޖިލީހުން ފާސްކޮށްފި އެވެ.
ކެބިނެޓް ތަރުޖަމާނު މިނިސްޓަރު ބަންދުލަ ގުނަވަރްދަނެ ވިދާޅުވީ އަންގާރަ ދުވަހުން ފެށިގެން ތެޔޮ ވިއްކާނީ ހަމައެކަނި ޒަރޫރީ ކަންކަމަށް ބޭނުންވާ އުޅަނދުތަކަށް ކަމަށެވެ.
އޭގެ އިތުރުން ތެޔޮ ނުލިބި ކުރިމަތިވެފައިވާ މައްސަލަ ހައްލު ކުރެވެންދެން ހުރިހާ އޮފީހަކުން ވެސް ޖުލައި 10 ވަނަ ދުވަހާ ހަމައަށް މުވައްޒަފުން ގޭގައި ތިބެގެން މަސައްކަތް ކުރެވޭނެ ގޮތް ހެދުމަށް ނިންމި އެވެ.
ގުނަވަރްދަނެ ވިދާޅުވީ ޕަބްލިކް އަދި ޕްރައިވެޓް ސެކްޓާއިން ވެސް އެ ނިންމުމާ އެއް ގޮތަށް އަމަލު ކުރުމަށް އެދޭ ކަމަށެވެ. ތެޔޮ ލިބޭނީ ހަމަައެކަނި ސިއްހީ ދާއިރާ އާއި ކާބޯތަކެތި އުފުލުން ފަދަ ޒަރޫރީ ކަންކަމަށް ކަމަށް އޭނާ ވިދާޅުވި އެވެ.
ސިލޯން ޕެޓްރޯލިއަމް ކޯޕޮރޭޝަން (ސީޕީސީ) ޓްރޭޑް ޔޫނިއަނުން ޑެއިލީ މިރާ ނޫހަށް ބުނީ މިހާރު ގައުމުގައި ހުރި 1،100 ޓަނުގެ ޕެޓްރޯލާއި 7،500 ޓަނުގެ ޕެޓްރޯލުން އެންމެ ދުވަހަކަށް ވެސް ނުފުދޭނެ ކަމަށެވެ.
ޕްރައިވެޓް އުޅަނދުތަކަށް ތެޔޮ ވިއްކުން ހުއްޓާލި އިރު، ތެލުގެ އާ ޝިޕްމަންޓެއް ލިބޭނެ ދުވަހެއް ނޭނގެ އެވެ.
