މި ދައުރުގެ އެހެން ޖަލްސާތަކާ ހިލާފަށް، މިއަދު ފެނިގެން ދިޔައީ މަޖިލިސް ތަޅުން ވަރަށް ހޫނުކޮށެވެ. ރިޔާސަތުގެ ނިންމެވުމަކާ ގުޅިގެން ހިތްހަމަނުޖެހުން ފާޅުކުރުމަށްފަހު، އިދިކޮޅުން ވަނީ ޖަލްސާ ބޮއިކޮޓް ކޮށްފަ އެވެ.
އިދިކޮޅު މެންބަރުން ހިތްހަމަ ނުޖެހުނީ ސޯޝަލް މީޑިއާގައި މިހާރު ދައުރުވަމުން އަންނަ ސިޔާސީ ބައެއް ބޭފުޅުންކަމަށް ބެލެވޭ ބަރަހަނާ މަންޒަރު ފެންނަ ވީޑިއޯތަކާ ގުޅިގެން އިދިކޮޅުން ރައްޔިތުންގެ މަޖިލީހަށް ހުށަހެޅި ދެ ކުއްލި މައްސަލަ ބަލައިނުގަތުމަށް ނިންމުމުންނެވެ.
މަޖިލީހުގެ މިއަދުގެ ޖަލްސާ ފައްޓަވަމުން ރިޔާސަތުގައި އިންނެވި މަޖިލީހުގެ ރައީސް އަދި ކުރީގެ ރައީސް މުހައްމަދު ނަޝީދު ވިދާޅުވީ ބަރަހަނާ ފޮޓޯތައް އުފެދުނު ގޮތް ދަނެ ނުގަނެ، އެހެން މީހެއްގެ އަބުރަށް އުނިކަން އަންނާނެ ގޮތަށް ކަންކަން ކުރުން ރާއްޖޭގެ އުސޫލުތަކާއި ހަމަތަކާ ހިލާފު ކަމަށެވެ.
އޭގެ ފަހުން އެޖެންޑާގައި އޮތީ މިނިސްޓަރާ ސުވާލުކުުރުމެވެ. މިއަދުގެ ޖަލްސާގައި ދެ ސުވާލެއް ކުރުމަށް ޕްލޭނިން މިނިސްޓަރު މުހައްމަދު އަސްލަމް ހާޒިރުކޮށްފައިވެ އެވެ. ދެ ސުވާލު ވެސް ކުރައްވަން ނޯޓިސް ފޮނުވާފައިވަނީ އިދިކޮޅުގެ މެންބަރުންނެވެ.
ފުރަތަމަ ސުވާލުކުރައްވަން ނައިފަރު ދާއިރާގެ މެންބަރު އަހުމަދު ޝިޔާމަށް ފުރުސަތު ދެއްވުމުން، އޭނާ ވަނީ ކުއްލި މައްސަލަ އެޖެންޑާ ނުކުރުމުން އެކަމާ ވަރަށް ހިތްހަމަނުޖެހިގެން ވާހަކަ ދައްކަވާފަ އެވެ.
ވަގުތު ހަމަވީއިރު ވެސް ސުވާލު ކުރައްވާފައި ނުވާތީ ރިޔާސަތުން ނިންމީ ދެ ވަނަ ސުވާލު ކުރަން ފުރުސަތު ދިނުމަށެވެ.
ދެ ވަނަ ސުވާލު ހުށަހަޅުއްވަން ދިން ފުރުސަތުގައި، މާވަށު ދާއިރާގެ މެންބަރު މުހައްމަދު ސައީދު ވަނީ ސުވާލުކުރައްވަން ބޭނުން ނުވާ ކަމަށް ވިދާޅުވެފަ އެވެ.
"އަޅުގަނޑު ގަބޫލެއް ނުކުރަން މަޖިލިސް ތިޔަ ގެންދަނީ އިންސާފުވެރިކަމާއެކު ކަމަކަށް، އަޅުގަނޑު ނެތީން ވަޒީރާ ސުވާލުކުރާކަށް މިފަދަ މާހައުލެއްގައި،" ސައީދު ވިދާޅުވި އެވެ.
ސުވާލު ނުކުރަން ނިންމުމުން ވަޒީރު ވަނީ ޖަލްސާ ދޫކޮށް ވަޑައިގަންނަވާފަ އެވެ. އޭގެ ފަހުން މަޖިލިސް ވަރަށް ހޫނުވެގެން ދިޔައިރު، ކުޑަވަގުތުކޮޅަކަށް މެދުކަނޑާލާފައި ވެސް ވެ އެވެ.
ހަތް ބިލެއް ކޮމިޓީއަށް، އިދިކޮޅުގެ މައްސަލަތައް ބޭރު
މިއަދުގެ ޖަލްސާގައި ވަނީ ގިނަ ބިލްތަކެއް ބަލައިގަތުމަށް ވޯޓަށް އަހާފަ އެވެ. ޖުމްލަ ހަތް ބިލެއް ބަލައިގަނެ، ދިރާސާކުރުމަށް ކޮމިޓީއަށް ފޮނުވާފައިވެ އެވެ.
އޭގެ ތެރޭގައި ހިމެނެނީ ކުނި މެނޭޖު ކުރުމުގެ ބިލާއި ޖުޑިޝަލް ސާވިސްގެ ގާނޫނަށް ހުށަހެޅި އިސްލާހާއި ދައުލަތުގެ މާލިއްޔަތު ގާނޫނަށް ހުށަހެޅި އިސްލާހާއި ޔުޓިލިޓީ ރެގިއުލޭޓަރީ ގާނޫނަށް ހުށަހެޅި އިސްލާހާއި ޖިނާއީ އިޖުރާއަތުގެ ގާނޫނަށް ހުށަހެޅި އިސްލާހާއި ފަނޑިޔާރުންގެ ގާނޫނަށް ހުށަހެޅި އިސްލާހުގެ އިތުރުން ކޯޓުތަކުގެ ގާނޫނަށް ހުށަހެޅި އިސްލާހެވެ.
މަޖިލިސް ހާޒިރީ
ހާޒިރުވެވަޑައިގެންނެވީ: 25 މެމްބަރުން
ސަލާމުގައި: 00 މެމްބަރުން
މީގެ އިތުރުން ދެ ގައުމަކަށް ކަނޑައަޅާފައިވާ ނޮން ރެޒިޑެންޓް ސަފީރަކަށް ރުހުން ދިނުމަށް ވެސް ފާސް ކުރި އެވެ. އަދި އިންޑިއާ އައުޓް ހަރަކާތާ ގުޅިގެން ގައުމީ ސަލާމަތަށް ނުރައްކާވާ ހާލަތު ދިރާސާކޮށް 241 ކޮމިޓީން ފޮނުވި ރިޕޯޓު ވެސް ފާސްކޮށްފައިވެ އެވެ.
މަޖިލީހުން ވަނީ ލާމަރުކަޒީ ގާނޫނާ ގުޅިގެން ހުރި ކަންބޮޑުވުންތަކާ ގުޅިގެން އިދިކޮޅުން ހުށަހެޅި ބިލަކާއި ގަރާރެއް ބަލައި ނުގަނެ ބޭރުކޮށްލާފަ އެވެ.
މިއަދުގެ ފޮޓޯ
މިއަދުގެ ޖަލްސާގެ ތެރެއިން ރައީސް ނަޝީދު:
