ގައުމީ ވޮލީބޯޅަ ލީގުގެ އެންމެ ފަހުގެ ޗެމްޕިއަން ދިވެހި ސިފައިންގެ ކްލަބް، މި ފަހަރުގެ މުބާރާތުގައި ކުޅުނު ދެ ވަނަ މެޗުން މިއަދު ހަވީރު ސީދާ ތިން ސެޓުން އޮއްފު އެފްސީ ބަލިކޮށްފި އެވެ.
ސިފައިން ވަނީ ފުރަތަމަ މެޗުގައި އިއްޔެ ހަވީރު ކްލަބް ވެމްކޯ އަތުން ފަހަތުން އަރައި މޮޅުވެފަ އެވެ. ދެ ވަނަ މެޗު މެޗުން މިއަދު މޮޅުވިއިރު، މި ފަހަރު ލީގުގެ ފުރަތަމަ ދެ މެޗުން މޮޅުވެފައި އޮތީ ދެ ޓީމެކެވެ. އެއީ އެންމެ ފަހުން ބޭއްވި އެސޯސިއޭޝަން ކަޕްގެ ޗެމްޕިއަން ސްޕޯޓްސް ކްލަބް ސިޓީ އާއި ސިފައިންނެވެ.
ސިޓީ އާއި ސިފައިންނަށް ހަ ޕޮއިންޓް ލިބިފައިވާއިރު، ވެމްކޯ އަށް ވަނީ ތިން ޕޮއިންޓް ލިބިފަ އެވެ. އޮއްފު، ޕޮލިސް ކްލަބް އަދި ގުޑީސް ސްޕޯޓްސް ކްލަބަށް އަދި ޕޮއިންޓެއް ނުލިބެ އެވެ. އޮއްފު ދެ މެޗު ކުޅުނުއިރު، ޕޮލިހާއި ގުޑީސް އަދި ކުޅުނީ އެންމެ މެޗެކެވެ. މުބާރާތުގައި މިރޭ ކުޅޭ މެޗުގައި ޕޮލިސް ކްލަބް ކުޅޭނީ ގުޑީސްއާ އެވެ.
ސިފައިންގެ ޝޯން ޓީ ޖޯން (ކ) އޮއްފުގެ ގުރޫ ޕްރަސަންތު އަތްމަތިން ޝޮޓެއް ފޮނުވާލަނީ--- ފޮޓޯ: އިމޭޖަސް.އެމްވީ
ޒުވާނުންގެ މަރުކަޒު އެތެރެ ކޯޓުގައި މިއަދު ކުޅުނު މެޗުގެ ސެޓުތައް ދިވެހި ސިފައިންގެ ކްލަބުން ގެންދިޔައީ 25-21، 25-23 އަދި 25-15 އިންނެވެ.
ވެމްކޯއާ ދެކޮޅަށް ފުރަތަމަ މެޗު ނިންމާލި ހިސާބުން ދެއްކި ހިތްވަރު، މިއަދުގެ މެޗުގައި ސިފައިންގެ ފަރާތުން މެޗު ފެށިގެން ފެނިގެންދިޔަ އެވެ. ސިފައިންގެ ޓީމުގެ ބިދޭސީ ކުޅުންތެރިޔާ، ޝޯން ޓީ ޖޯން މި މެޗުގެ މޮޅު ކުޅުންތެރިއަކަށް ހޮވުނީ ގިނަ ޕޮއިންޓްތަކެއް ހޯދައިދީގެންނެވެ. ސިފައިންގެ ކެޕްޓަން، ސެޓަރު ހުސެއިން ޝާހިދު (ޝާޑު) ހިތްލައިދިން ބޯޅަތަކުގެ ބޭނުން އެ ޓީމުގެ އާދަމް ނަސީމް (އެޑަމް) އާއި ޝޯން ޓީ ޖޯންގެ އިތުރުން މަނޫ ޖޯސެފް ވެސް ވަނީ ރަނގަޅަށް ހިފައިފަ އެވެ.
ފުރަތަމަ ދެ ސެޓު ފަހުކޮޅާ ހަަމައަށް ދިޔައީ ވަރަށް ވާންކޮށެވެ. އޮއްފުގެ ސެޓަރު، އަލީ މައުރޫފް (މާއްޓޭ) ދިން ބޯޅަތަކުން އެ ޓީމުގެ ބިދޭސީ ކުޅުންތެރިޔާ، ގުުރޫ ޕްރަސަންތު ވަނީ ރަނގަޅު ބޯޅަތަކެއް ފޮނުވާލައިފަ އެވެ. އޮއްފުގެ ބިދޭސީ އަނެއް ކުޅުންތެރިއާ، ޖޯން ޖޯސެފް ވެސް ރަނގަޅު ޝޮޓްތަކެއް ފޮނުވާލެވޭތޯ ބެލިއިރު، ސިފައިން ޑިފެންސް ބޯޅަތަކުގައި ވެސް މުހިންމު ވަގުތުގައި ވަނީ ކޮންފިޑެންސާ އެކު ކުޅެފަ އެވެ.
ސިފައިންގެ ލިބަރޯ، މުހައްމަދު މިމްރާހް ހަސަން (މިންމި) ވެސް ވަނީ ޑިފެންސް ބޯޅަތަކުގައި، ސެޓަރު ޝާޑުއާ ގުޅިގެން ޓީމުގެ ލީޑު ދަމަހައްޓައި، ސެޓުތައް ކާމިޔާބުކުރަން މޮޅަށް ކުޅެފަ އެވެ.
ފުރަތަމަ ދެ ސެޓާ ހިލާފަށް ސިފައިން ތިން ވަނަ ސެޓު ގެންދިޔައީ މާ ބޮޑު ޕްރެޝަރެއް ނެތި އެވެ.
ގައުމީ ވޮލީބޯޅަ ލީގުގައި މިރޭ 20:30 ގައި ފަށާ މެޗުގައި ޕޮލިސް ކުޅޭނީ ގުޑީސްއާ އެވެ. އެސޯސިއޭޝަން ކަޕްގެ ފުރަތަމަ މެޗުގައި ޕޮލިހުން ގުޑީސް ބަލިކުރީ 3-2 ސެޓުންނެވެ.
