ޕެރިސް (ޖޫން 27) - ބްރެޒިލްގެ ތަރި ނޭމާ އިޓަލީގެ ޔުވެންޓަސް އަށް ބަދަލުވާން މަޝްވަރާކޮށްފައިވާ ކަމަށް މީޑިއާ ރިޕޯޓްތައް ބުނެފި އެވެ.
ދާދިފަހުން ބޭއްވި ޕީއެސްޖީގެ ނޫސްވެރިންގެ ބައްދަލުވުމެއްގެ ތެރެއިން އެ ކްލަބްގެ ރައީސް ނާސިރު އަލް-ހެއްލާފީ ގާތުގައި އަމާޒުވި އެއް ސުވާލަކީ ނޭމާގެ މުސްތަގުބަލު އޮތީ ކޮން ޓީމަކާ އެކުގައިތޯ އެވެ. އަދި ނޭމާ ވިއްކާލަން ޕީއެސްޖީން މަޝްވަރާ ކުރާކަމަށް ދެކެވޭ ވާހަކަތަކުގައި ހަގީގަތެއް އެބައޮތޯ އޮޅުންފިލުވަން ނޫސްވެރިން ބޭނުންވި އެވެ.
"ނޭމާ، ޕީއެސްޖީ ދޫކޮށްލައިފާނެތޯ؟ ތީގެ އަށް ސީދާ ޖަވާބެއް ދޭކަށް ނޭނގޭ. އެކަމަކު، އަހަންނަށް އެނގޭހާ ވެސް ކަމަކީ ބައެއް ކުޅުންތެރިން އެބަޖެހޭ ކްލަބުން އެ ކުޅުންތެރިއަކަށް ކޮށްދޭ ކަންތައްތަކުގެ ބަދަލުދޭން، ކުޅުން ރަނގަޅުކުރަން،" ހެއްލާފީ ވިދާޅުވި އެވެ.
ހެއްލާފީގެ މި ވާހަކަތަކާ ގުޅިގެން ނޭމާ، 30، ގެ ހިތްހަމަނުޖެހުން ބޮޑުވެ، އޭނާ މިހާރު ބޭނުންވަނީ ޕީއެސްޖީ ދޫކޮށްލާށެވެ.
މީގެ ފަސް އަހަރު ކުރިން 2017 ވަނަ އަހަރު، ދުނިޔޭގެ ރެކޯޑް ފީއެއް ކަމަށްވާ 234 މިލިއަން ޑޮލަރަށް ބާސެލޯނާ ދޫކޮށް ޕީއެސްޖީ އަށް ސޮއިކުރި ނޭމާ މި ވަގުތު އެ ކްލަބާ އެކު ކޮންޓްރެކްޓްގައި ހުރީ 2025 ވަނަ އަހަރުގެ ޖޫން މަހުގެ ނިޔަލަށެވެ.
އެކަމަކު، ނޭމާ މިހާރު ބޭނުންވަނީ މި ފަހަރުގެ ޓްރާންސްފާ މާކެޓްގެ ތެރޭގައި ކްލަބް ބަދަލުކުރާށެެެވެ. ނޭމާ ވިއްކާލަން މަދުވެގެން ޕީއެސްޖީން 100 މިލިއަން ޑޮލަރުގެ ފީއެއް ޑިމާންޑްކުރާނެ އެވެ.
ފްރާންސާއި އިޓަލީގެ މީޑިއާ ރިޕޯޓްތައް ބުނާގޮތުން ޔުވެންޓަސް އާއި ނޭމާ ވަނީ ދާދި ފަހުން ޓްރާންސްފާގެ މަޝްވަރާތަކެއް ކުރިއަށް ގެންގޮސްފަ އެވެ. އިންްގްލެންޑްގެ ޗެލްސީން ވެސް ނޭމާ އަށް ޝައުގުވެރިވާއިރު، ކޮންމެ ޓީމަކަށް ވެސް މި ވަގުތު ނޭމާ ގަންނަން އޮތް ހުރަހަކީ އޭނާގެ ސީޒަނެއްގެ މުސާރަ ބޮޑުވުމެވެ. ނޭމާ މި ވަގުތު ހުރީ އަހަރަކު، 30 މިލިއަން ޑޮލަރުގެ މުސާރަ އަކަށެވެ.
ޕީއެސްޖީ އަށް ކުޅެދިން 144 މެޗުން ނޭމާ ވަނީ އެ ޓީމަށް 100 ގޯލު ޖަހައި، 60 ގޯލު ޖަހަން ފުރުސަތު ތަނަވަސްކޮށްދީފަ އެވެ.
