ހޯމަަ ދުވަހުން ފެށިގެން ސްރީލަންކާގައި ޕެޓްރޯލާއި ޑީސަލް ވިއްކާނީ ނަންބަރު ނުވަތަ ޓޯކަަން ދޫކޮށްގެން ކަމަށް ހަކަތައާ ބެހޭ މިނިސްޓަރު ކަންޗަނާ ވިޖެސޭކަރަ ވިދާޅުވެއްޖެ އެވެ.
ތެޔޮ އެތެރެ ކުރާނެ ޑޮލަރު ނެތިގެން ލަންކާގައި ތެލަށް ޖެހިފައިވާ އިރު، އުޅަނދުތަކަށް ޕެޓްރޯލާއި ޑީސެލް އަޅަން އެތައް ދުވަހެއް ވަންދެން ދިގު ކިޔުތަކުގައި ތިބެން ޖެހެ އެވެ.
އެ މައްސަލަ ހައްލު ކުރަން ތައާރަފް ކުރި ނިޒާމް ހިންގަން ފުލުހުންނާއި ސިފައިން އެހީ ވާނެ ކަމަށް ވިޖެސޭކަރަ ވިދާޅުވި އެވެ. އޭނާ ވިދާޅުވީ ތެޔޮ ގަންނަން ބޭނުންވާ މީހުންގެ ނަންބަރު ޖެހުމުން ފޯނު މެދުވެރިކޮށް އަންގާނެ ކަމަށެވެ.
މި ވަގުތު ލަންކާއިން ތެޔޮ ހުސްވެފައިވާ އިރު، އާ ޝިޕްމަންޓެއް އަންނާނެ ތާރީހެއް ނޭނގޭ ކަމަށް ވެސް ހަކަތައާ ބެހޭ މިނިސްޓަރު ވިދާޅުވި އެވެ.
ވިޖެސޭކަރަ އިތުރަށް ވިދާޅުވީ ރަޝިއާއިން ތެޔޮ އިމްޕޯޓް ކުރުމާއި އެހެން ކަންކަމާ ގުޅޭ މަޝްވަރާ ކުރުމަށް ދެ މިނިސްޓަރަކު ހޯމަ ދުވަހު ރަޝިއާއަށް ފުރާވަޑައިގަންނަވާނެ ކަމަށެވެ.
