ޕީޕީއެމް ކައުންސިލަށް ވާދަކޮށް ނުހޮވުނު އެ ޕާޓީގެ ހަރަކާތްތަކުގައި ވަރަށް އިސްކޮށް އުޅޭ ބައެއް މީހުން ޕީއެންސީ ކައުންސިލަށް އައްޔަން ކުރަން އެ ޕާޓީގެ ކައުންސިލުން މިދިޔަ ބުރާސްފަތި ދުވަހުގެ ރޭ ނިންމައިފި އެވެ.
ޕީއެންސީގެ ކައުންސިލްގައި މިހާރު ތިބި މެންބަރުން އެއްވެ ބޭއްވި ބައްދަލުވުމަކުން އެ ކައުންސިލަށް 19 މެންބަރަކު ވަނީ އައްޔަންކޮށްފަ އެވެ. އޭގެ ތެރޭގައި ގިނައީ ވެސް ޕީޕީއެމް ކައުންސިލަށް ކުރިމަތިލުމަށް ފަހު އެ އިންތިހާބުން ނާކާމިޔާބުވި މީހުނެވެ.
"[ޕީޕީއެމް ކައުންސިލުން ނާކާމިޔާބުވި] އެ މީހުން ވަނީ ޕީއެންސީއަށް ސޮއިކޮށްފައި، ދެން ޕީއެންސީގެ ކައުންސިލުން ބޭއްވި ބައްދަލުވުމަށް ނަންތައް ހުށަހަޅައިގެން، ކައުންސިލްގައި މިހާރު ތިބި މެންބަރުންގެ އިއްތިފާގުން ފާސްކުރީ ކައުންސިލަށް އައްޔަން ކުރަން،" ޕީޕީއެމްއާއި ޕީއެންސީ ކޯލިޝަންގެ ތަރުޖަމާނު ހީނާ ވަލީދު މި ނޫހަށް ވިދާޅުވި އެވެ.
ހީނާ ވިދާޅުވި ގޮތުގައި އެއީ ޕީއެންސީ ކައުންސިލްގައި ހުސްވެފައިވާ 19 ޖާގައެކެވެ. އޭގެ ތެރެއިން ޕީއެންސީ ކައުންސިލަށް އައްޔަން ކުރި 17 މީހުންނަކީ ޕީޕީއެމް ކައުންސިލަށް ކުރިމަތިލައިގެން ނާކާމިޔާބުވި މީހުންނެވެ.
މި 19 މެންބަރުންގެ އިތުރަށް ޕީއެންސީގެ ސެކްރެޓަރީ ޖެނެރަލްގެ މަގާމަށް ރައްޔިތުންގެ މަޖިލީހުގެ ފުވައްމުލަކު މެދު ދާއިރާގެ ކުރީގެ މެންބަރު ޝިފާގް މުފީދް (ހިސްޓޯ) ވެސް އައްޔަން ކުރި އެވެ. އޭނާއަކީ ވެސް ޕީޕީއެމް ކައުންސިލަށް ކުރިމަތިލައިގެން ނާކާމިޔާބުވި ބޭފުޅެކެވެ.
ޕީއެންސީއަކީ ކުރީގެ ރައީސް މައުމޫން އަބްދުލް ގައްޔޫމް ޕީޕީއެމުން ވަކިކުރުމަށް ފަހު އެ މައްސަލާގައި ކޯޓުން ގޮތެއް ކަނޑައެޅުމުގެ ކުރިން، އޭރު ޕީޕީއެމްގެ އިސް ބޭފުޅުން ބައިވެރިވެގެން އުފެއްދި ޕާޓީއެކެވެ. ކޯޓު މަރުހަލާ ނިމި ކުރީގެ ރައީސް އަބްދުﷲ ޔާމީނަށް ޕީޕީއެމް ލިބުމުން ވެސް ޕީއެންސީ ބޭއްވި އެވެ.
މިހާރު އެއް އޮފީހެއްގައި ދެ ޕާޓީ ހިންގަމުން އަންނަނީ އެއްކޮށެވެ. ދެ ޕާޓީގެ ޖޮއިންޓް ކައުންސިލެއް ވެސް އޮވެ އެވެ. ދެ ޕާޓީގެ ހަރަކާތްތަކާއި ނިންމުންތައް އެ ޖޮއިންޓް ކައުންސިލުން ވެސް ނިންމަ އެވެ. ދެ ޕާޓީގެ ދެމެދުގައި ވަނީ ކޯލީޝަން އެއްބަސްވުމެއް ވެސް ގާއިމްކޮށްފަ އެވެ.
