ގައުމީ ވޮލީ ލީގު ކްލަބް ވެމްކޯ އާއި އޮއްފު އެފްސީ ބައްދަލުކުރާ މެޗުން މިއަދު ހަވީރު ފަށަން ތައްޔާރުވެއްޖެ އެވެ.
މި ފަހަރުގެ ގައުމީ ލީގު ކުޅޭނީ އެއް ބުރަށެވެ. އެ ގޮތުން މި މުބާރާތުގައި ވާދަކުރާނީ އެސޯސިއޭޝަން ކަޕްގެ ފައިނަލް ބުރުގައި ވާދަކުރި ހަ ޓީމެވެ. އެއީ އޮއްފު އާއި ވެމްކޯގެ އިތުރުން އެސޯސިއޭޝަން ކަޕްގެ ޗެމްޕިއަން ސްޕޯޓްސް ކްލަބް ސިޓީ، ގުޑީސް ސްޕޯޓްސް ކްލަބް، ޕޮލިސް ކްލަބް، އަދި އެންމެ ފަހުގެ ލީގު ޗެމްޕިއަން ދިވެހި ސިފައިންގެ ކްލަބް އެވެ.
ވޮލީބޯލް އެސޯސިއޭޝަން ކަޕަށް ފަހު ގައުމީ ވޮލީ ލީގުގެ ކުރިން ދިވެހި ކުޅުންތެރިންނަށް ޓީމު ބަދަލުކުރެވެ އެވެ. އެކަމަކު، މި ފަަހަރުގެ ވޮލީބޯޅަ ސީޒަން ކުރިއަށްދަނީ ބިދޭސީ ކުޅުންތެރިން އެސޯސިއޭޝަން މެދުވެރިކޮށް، "ޑްރާފްޓް ސިސްޓަމް" އެއްގެ ތެރެއިން ޓީމުތަކަށް ހަމަޖައްސައިދީގެން ކަމަށްވާތީ، ޓީމެއްގެ ކުޅުންތެރިއަކު އިންޖަރީއެއް ވިޔަސް އާ ކުޅުންތެރިއަކު ގެނެވޭ ގޮތަށް ގަވާއިދު ތަން ނުދެ އެވެ. އެސޯސިއޭޝަން ކަޕްގައި ތިން ޓީމެއްގެ ތިން ބިދޭސީ ކުޅުންތެރިއަކަށް އަނިޔާވެ، މި ސީޒަނުގައި ދެން ނުކުޅެވޭނެ އެވެ.
އިންޑިއާގެ ޕްރައިމް ލީގުގައި ކުޅޭ ފެންވަރު ރަނގަޅު 18 ކުޅުންތެރިންނާ އެކު ޓީމުތަކުން މި ފަހަރުގެ ވޮލީބޯޅަ ސީޒަނުގައި ކުޅޭއިރު، މެޗުތައް ދަނީ ވާދަވެރިކޮށެވެ. ގިނަ ޓީމުތަކުގެ ކޯޗުން ފާހަގަކުރާ ގޮތުގައި ކޮންމެ މެޗެއް ވާދަވެރިކޮށް ކުރިއަށްދާތީ، އެއްވެސް ޓީމަކަށް ވަކި މެޗެއް ފަސޭހަކޮށްލެވެން ނެތެވެ. ފޯރިގަދަ ވޮލީބޯޅަ ސީޒަނެއް ކުރިއަށް ދިއުމަކީ ވޮލީ ކުރިއަށް ގެންދަން ލިބޭ ފަސޭހައެއްގެ ގޮތުގައި ވީއޭއެމުން ދެކެ އެވެ.
ގައުމީ ލީގު މިއަދު ހަވީރު ވެމްކޯ އާއި އޮއްފުގެ މެޗުން ފަށާއިރު، މިރޭ، 20:30 ގައި ކުޅޭ މެޗުގައި ބައްދަލުކުރާނީ ސިޓީ އާއި ގުޑީސް އެވެ. ލީގުގެ މެޗުތައް އަންނަ މަހު ދެ ވަނަ ދުވަހާ ހަމައަށް ކުރިއަށްދާނެ އެވެ. އެ އަށް ފަހު ލީގުގެ ގަދަ ހަތަރު ޓީމުގެ މެދުގައި ގައުމީ މުބާރާތް އޮންނާނީ އަންނަ މަހުގެ 4-7 އަށެވެ.
