ބުދަ ދުވަހު 6.1 މެގްނިޓިއުޑް ބާރު މިނުގައި އަފްގާނިސްތާނަށް އައި ބިންހެލުމަށް ފަހު އެ ގައުމުގެ ތާލިބާން ސަރުކާރުން އެހީއަށް އެދެފި އެވެ.
މިހާތަނަށް 1،000 އަށް ވުރެ ގިނަ މީހުން މަރުވެފައިވާ އިރު، 1،500 އަށް ވުރެ ގިނަ މީހުންނަށް އަނިޔާވެފައިވާ ކަމަަށް އޮފިޝަލުން ބުނެ އެވެ.
އެންމެ ބޮޑަށް އަސަރުކޮށްފައި ވަނީ އިރުދެކުނުގައި އޮންނަ ޕަކްތިކާ ޕްރޮވިންސަށެވެ. އދ. އިން ދަނީ ވަގުތީ ހިޔާ އާއި ކާބޯތަކެތި ފޯރުކޮށްދޭން މަސައްކަތް ކުރަމުންނެވެ.
މީހުން ސަލާމަތް ކުރުމުގެ މަސައްކަތް ހުރަސް އެޅިފައި ވަނީ ވަަސީލަތްތައް މަދުވުމާ އެކު ބޯކޮށް ވާރޭ ވެހެމުން ދާތީ އެވެ.
ރިޕޯޓުތައް ބުނާ ގޮތުން ބައެއް އަވަށްތައް ވަނީ އެއްކޮށް ސުންނާފަތިވެފަ އެވެ. މިއީ 20 އަހަރުގެ ތެރޭގައި އަފްގާނިސްތާނަށް އައި އެންމެ ބޮޑު ބިންހެލުމެވެ.
ބިންހެލުން އަައީ ހޯސްތު ސިޓީއާ 44 ކިލޯމީޓަރު ދުރުންނެވެ. އޭގެ އަސަރު ޕާކިސްތާނާއި އިންޑިއާގެ ބައެއް ހިސާބުތަކަށް ވެސް ކުރި އެވެ.
އިންސާނީ އަދި އިގްތިސާދީ ކާރިސާއެއްގައި އޮތް އަފްގާނިސްތާނަށް މި ވަރުގެ ބޮޑު ބިންހެލުމަކާ އެކު ރައްޔިތުންނަށް އެހީވެވޭނެ ގޮތެއް ނެތެވެ.
ތާލިބާނުންގެ އިސް އޮފިޝަލް އަބްދުލް ގަހާރް ބަލްކީ ބުނީ ބައެއް ގައުމުތަކާއި ޖަމިއްޔާތަކުން އެހީވި ނަމަވެސް، އިތުރު އެހީ ބޭނުންވާ ކަމަށެވެ.
"އެހީ އިތުރު ކުރަން ޖެހޭ. މިއީ ވަރަށް ބޮޑު ބިންހެލުމެއް. މި ވަރުގެ ބިންހެލުމެއް ނާންނަތާ އެތައް އަހަރެއް ވެއްޖެ،" އޭނާ ބުންޏެވެ.
އަފްގާނިސްތާން އޮންނަ ސަރަހައްދަށް ވަރަށް ގިނައިން ބިންހެލުން އާދެ އެވެ. އެގޮތުން 2015 ވަނަ އަހަރު އައި 7.5 ބާރުމިނުގެ ބިންހެލުމެއްގައި ޕާކިސްތާނާއި އަފްގާނިސްތާނުން 380 މީހުން މަރުވި އެވެ.
