އުރީދޫ ދިވެހި ޕްރިމިއާ ލީގުގައި މިއަދު ހަވީރު ކުޅުނު މެޗުގައި ކްލަބް ގްރީން ސްޓްރީޓްސް އިން 3-1 އިން ސުޕަ ޔުނައިޓެޑް ސްޕޯޓްސް (ސަސް) ބަލިކޮށްފި އެވެ.
މި ނަތީޖާއާ އެކު ލީގުގެ ހަތް ވަނައިގައި އޮތް ގްރީން ސްޓްރީޓްސް އާއި ހަ ވަނައިގައި އޮތް ސަސް ވަނީ ޕޮއިންޓުގެ ގޮތުން އެއްވަރުވެފަ އެވެ. ގްރީން ސްޓްްރީޓްސް އާއި ސަސް އަށް ވެސް ވަނީ 13 މެޗުން 14 ޕޮއިންޓް ލިބިފަ އެވެ. ސަސް ކުރީގައި އޮތީ ލަނޑުގެ ތަފާތުންނެވެ.
މިއަދު ގްރީން ސްޓްރީޓްސް އަތުން ސަސް މޮޅުވިނަމަ ލީގުގެ ފަސް ވަނަ އަށް ޖެހިލުމުގެ ފުރުސަތު އޮތެވެ. އެކަމަކު، ބަލިވުމުން އެ ފުރުސަތު ގެއްލުނީ އެވެ. ފަސް ވަނައިގައި ވެލެންސިއާ އޮތީ 13 މެޗުން 16 ޕޮއިންޓް ހޯދައިގެންނެވެ.
ސަސް އިން މިއަދުގެ މެޗަށް ނުކުތްއިރު ފުރަތަމަ އެގާރައިގައި ވަނީ ޒުވާން ގައުމީ ޓީމުގެ ކީޕަރު، ޔޫސުފް މީސަމް އަބްދުﷲ އަށް ފުރުސަތު ދީފަ އެވެ. ސަސްގެ އެއް ވަނަ ކީޕަރު މުހައްމަދު ޝަފީއު (ޗެކް) މި ވަގުތު ހުރީ ޓީމާ ދުރުގަ އެވެ. ގްރީން ސްޓްރީޓްސް އިން ވަނީ އެ ޓީމާ އެންމެ ފަހުން ޓްރާންސްފާ މާކެޓްގައި ގުޅުނު، ޕެނަމާގެ ވިންގް، ހެނާންޑޭޒް އަވީލާ ހުއާން ކާލޯސް އަށް ފުރަތަމަ އެގާރައިން ފުރުސަތު ދީފަ އެވެ.
މެޗު ފަށައިގެން ސަސް އިން ވަނީ ކުރިއަށް ޖެހިގެން ކުޅެ ގޯލެއް ޖެހޭތޯ އެޓޭކްތަކެއް ކޮށްފަ އެވެ. އެ ގޮތުން ސަސްގެ އިބްރާހިމް އަތީގް (އިއްބެ) އާއި އަހުމަދު ހަމީދު (އައްމަޑޭ) ފޮނުވާލި ބޯޅަތައް ދިޔައީ ގްރީން ސްޓްރީޓްސްގެ ގޯލާ އަމާޒުނުވެ އެވެ.
ފުރަތަމަ ހާފުގެ މެދަކާހަމައިން ހިނގި ފައުލަކަށް ފަހު ގްރީން ސްޓްރީޓްސްގެ ކެޕްޓަން، ރިލްވާން ވަހީދު (ރިލޭ) އާއި ސަސްގެ ކެޕްޓަން ޔަސްފާދު ހަބީބު (މުލަކޭ) ދެމެދުގައި ހިތްހަމަނުޖެހުންތަކެއް ހިނގިއިރު، މެޗުގެ ރެފްރީ ސިނާން ވަނީ ރިލޭ އަށް ރީނދޫ ކާޑު ދައްކައިފަ އެވެ. އޭގެ ފަހުން ރިލޭ ކުރި ފައުލުތަކަކަށް އިތުރު ރީނދޫ ކާޑެއް ދައްކަން ސަސްގެ ކުޅުންތެރިންނާއި ބެންޗުން ވަނީ އެޕީލްކޮށްފަ އެވެ.
ގްރީން ސްޓްރީޓްސް އަށް ލީޑުނަގައިދިނީ މެޗުގެ 31 ވަނަ މިނިޓްގައި ރިލޭ އެވެ. ހާފުގެ މެދެއްހާ ހިސާބުން ރިލޭ ފޮނުވާލި ބޯޅަ ގޯލަށް ވަނީ ކީޕަރު މީސަމް އަތްމަތިން އޮއްސިގެން ގޮހެވެ. ގޯލު ރޮނގަށް ވުރެ މާ ކުރިއަށް މީސަމް ޖެހި ހުރި ވަގުތު ބަލައި، ރިލޭ ވަނީ ގޯލަށް ބޯޅަ ވައްދާލައިފަ އެވެ. ގްރީން ސްޓްރީޓްސްގެ ލީޑުފުޅާކޮށްދޭން މެޗުގެ 43 ވަނަ މިނިޓްގައި ހުއާން ކާލޯސް ހުސްކޮށް ވަދެ ޖެހި ބޯޅަ ކީޕަރު މީސަމް ވަނީ މަތަކޮށްފަ އެވެ.
ފުރަތަމަ ހާފުގެ އިތުރު ވަގުުތުގައި ސަސް އަށް އެއްވަރުކޮށްދިނީ އަހުމަދު އައިހަމް އެވެ. މިއީ ސަސްގެ ފުރަތަމަ އެގާރައިގައި އައިހަމް ކުޅޭ ފުރަތަމަ މެޗެވެ. މުލަކޭ ހިލޭ ޖެހުމަކުން ނެގި ބޯޅައެއް ސަސް ގޯލާ ދިމާލަށް ދަނިކޮށް، ގްރީން ސްޓްރީޓްސްގެ ޑިފެންޑަރު މުހައްމަދު ސާއިފް ޖައްސާލުމުން ލިބުނީ އައިހަމް އަށެވެ. އޭނާ ވަނީ ހަމަޖެހިލާފައި ގޯލަށް ބޯޅަ ވައްދާލައިފަ އެވެ.
ގްރީން ސްޓްރީޓްސް އިން ދެ ވަނަ ހާފް ފަށައިގެން ރަނގަޅަށް ކުޅެ، އަލުން ލީޑުނަގަން ރަނުގެ ފުރުސަތެއް ހޯދި އެވެ. އެ ގޮތުން މެޗުގެ 53 ވަނަ މިނިޓްގައި ގްރީން ސްޓްރީޓްސްގެ އަންސަރު އިބްރާހިމް (އަންކޮ) ހުސްކޮށްލާފައި ކުރިއަށް ކުޅުނު މޮޅު ބޯޅައެއް ހިފައިގެން އޭރިއާތެރެއަށް ވަދެ، ގްރީން ސްޓްރީޓްސްގެ ހަސަން ނަޒީމް ގާސިމް (ޗޯޓު) ޖެހި ބޯޅަ ކީޕަރު މީސަމް ވަނީ މަތަކޮށްފަ އެވެ.
މެޗުގެ 65 ވަނަ މިނިޓްގައި ގްރީން ސްޓްރީޓްސް އިން މެޗުގައި ދެ ވަނަ ފަހަރަށް ލީޑުނެގީ އަންކޮ ޖެހި ގޯލުންނެވެ. އަރިމަތިން ލިބުނު ހިލޭ ޖެހުމަކުން އަންކޮ ޖެހި ބޯޅަ ގޯލަށް ވަނީ އެ ޓީމުގެ އެހެން ކުޅުންތެރިއަކު ގައިގައި ނުޖެހި އެވެ. ކީޕަރު މީސަމް އެ ބޯޅަ ސަލާމަތްކުރަން އެރި ނަމަވެސް އޭނާ އަތުގައި ބޯޅަ ލައްވައިނުލައި ވަނީ ގޯލަށެވެ.
ގްރީން ސްޓްރީޓްސް އިން ވަނީ މެޗުގެ 83 ވަނަ މިނިޓްގައި ތިން ވަނަ ގޯލެއް ޖަހައިފަ އެވެ. މިއީ ރިލޭ ހިލޭ ޖެހުމަކުން ނެގި ހުރަހަކުން އަންކޮ ބޮލުން ޖައްސާލި ބޯޅަ ގޯލު ރޮނގުމައްޗަށް ހުރަސްވި ވަގުތު އަވީލާ ޖެހި ގޯލެކެވެ.
ސަސް އިން ދެ ވަނަ ހާފުގައި ގޯލެއް ޖަހަން ކުރި މަސައްކަތް ކާމިޔާބުވާ ގޮތެއްނުވި އެވެ. ސަސްގެ ކުުޅުންތެރިން ފޮނުވާލި ޝޮޓްތައް ގްރީން ސްޓްރީޓްސްގެ ޕާކިސްތާން ކީޕަރު ހަނީފް ސާގިބް ވަނީ މަތަކޮށްފަ އެވެ.
ލީގުގައި މިރޭ 9:00 ގައި ފަށާ މެޗުގައި މާޒިޔާ ސްޕޯޓްސް އެންޑް ރެކްރިއޭޝަން ކުޅޭނީ ޓީސީ ސްޕޯޓްސް ކްލަބާ އެވެ.
