ގަރްދޭޒް، އަފްގާނިސްތާން (ޖޫން 22) - އަފްގާނިސްތާނުގެ ރަށްފުށުގެ ހިސާބަކަށް އައި ބާރުގަދަ ބިންހެލުމެއްގައި މަރުވި މީހުންގެ އަދަދު 920 އަށް ވުރެ މައްޗަށް އަރައިފި އެވެ.
އަފްގާނިސްތާނުގެ ކާރިސާތަކާ ބެހޭ މިނިސްޓަރު ބުނީ މަރުވި މީހުންގެ އަދަދު 920 އަށް އަރާފައިވާ ކަމަށެވެ. އޭގެ ކުރިން ލަފާކުރި އަދަދަކީ 300 އެވެ.
"އެތައް ސަތޭކަ ގެތަކެއް ބިމާ ހަމަވެ، 300 މީހުން ޝަހީދުވެގެން ހިނގައްޖެ. އަދި 500 އަށް ވުރެ ގިނަ މީހުންނަށް އަނިޔާވެއްޖެ،" އަފްގާނިސްތާނުގައި ވެރިކަން ކުރާ ތާލިބާނުންގެ އެންމެ އިސް ލީޑަރު ހިބާތުﷲ އަހުންދްޒާދާގެ ބަޔާނެއްގައި ބުންޏެވެ.
އެ ބަޔާނުގައިވާ ގޮތުން މަރުވި މީހުންނާއި އަނިޔާވި މީހުންގެ އަދަދުތައް މަތިވާނެ ކަމަށް ބެލެވެ އެވެ. އިމާރާތްތަކުގެ ދަށުން މީހުން ސަލާމަތް ކުރެވޭތޯ މިހާރު ވެސް ދަނީ މަސައްކަތް ކުރަމުންނެވެ.
ބަޔާން ނެރުނުތާ އިރުކޮޅެއް ފަހުން ކާރިސާތަކާ ބެހޭ މިނިސްޓަރު ބުނީ މަރުވި މީހުންގެ އަދަދު 920 އަށް ވުރެ މަތިވެފައިވާ ކަަމަށެވެ.
"މިހާތަނަށް ހުރި މައުލޫމާތަށް ބަލާއިރު 920 މީހުން ޝާހީދުވެ، 600 މީހުންނަށް ވަނީ އަނިޔާވެފައި،" ޝަރަފުއްދީން މުސްލިމް ބުންޏެވެ.
އެ ބިންހެލުން އައީ 5.9 މެގްނިޓިއުޑް ބާރުމިނުގަ އެވެ. ބިންހެލުން އައި އިރުމަތީ ސަރަހައްދަކީ ވަރަށް ފަގީރު އަދި އިންފްރާސްޓްރަކްޗާ މަދު ހިސާބެކެވެ.
ސޯޝަލް މީޑިއާގައިި ދައުރުވާ ވީޑިއޯ އާއި ފޮޓޯއިން ފެންނަނީ ޗަކައިން ބިނާކޮށްފައިވާ ގެތަކަށް ގެއްލުންވެފައިވާ މަންޒަރެވެ. ބައެއް މީހުން އަސްކަރީ ހެލިކޮޕްޓަރެއްގައި ސަަލާމަތް ކުރާ މަންޒަރު ވެސް ފެނެ އެވެ.
އަފްގާނިސްތާން އޮންނަ ސަރަހައްދަށް ވަރަށް ގިނައިން ބިންހެލުން އާދެ އެވެ. އެގޮތުން 2015 ވަނަ އަހަރު އައި 7.5 ބާރުމިނުގެ ބިންހެލުމެއްގައި ޕާކިސްތާނާއި އަފްގާނިސްތާނުން 380 މީހުން މަރުވި އެވެ.
