ކުރިން ވެސް ރާވާފައިވާ ގޮތަށް މި އަންނަ ހޮނިހިރު ދުވަހަށް ބާ އިމްތިހާން ބާއްވަން ނިންމާފައިވާ ނިންމުން ތަކުރާރުކޮށް ދެމެހެއްޓުމަށް ފަހު، އެންމެ ފަހުން އެ އިމްތިހާން އަންނަ ނޮވެމްބަރު މަހަށް ފަސްކުރަން ބާ ކައުންސިލުން ނިންމައިފި އެވެ.
ބާ ކައުންސިލުން މިރޭ ނެރުނު ނޫސްބަޔާނެއްގައި ވަނީ ބާ އިމްތިހާންގެ ޝެޑިއުލަށް ބަދަލު ގެނެސް، އެ އިމްތިހާން ދެން އޮންނާނީ މި އަހަރުގެ ނޮވެމްބަރު މަހުގެ 19 ވަނަ ދުވަހު ކަމުގަ އެވެ.
ހޮނިހިރު ދުވަހު ބާއްވާ ބާ އިމްތިހާނުގައި ބައިވެރިވާން ރަޖިސްޓްރީވި ދަރިވަރުންގެ އިތުރަށް ރަޖިސްޓްރީވުމަށް ފަހު ނަން ނެގި ދަރިވަރުންނަށް ވެސް ނޮވެމްބަރު މަހު ބާއްވާ އިމްތިހާނުގައި ބައިވެރިވެވޭނެ ކަމަށް ބާ ކައުންސިލުން ބުނެފައިވެ އެވެ.
މީގެ އިތުރަށް އެ ތާރީހަށް އިމްތިހާނުގައި ބައިވެރިވެވޭ އިތުރު ދަރިވަރުންނަށް ރަޖިސްޓްރީވާން ހުޅުވާލާނެ ކަމަށް ވެސް ބާ ކައުންސިލުން މިރޭ ބުނެފައިވެ އެވެ.
މިއީ 2020 ވަނަ އަަހަރުން ފެށިގެން ބާ ކައުންސިލުން ބާއްވަން މަސައްކަތް ކުރަމުން ދިޔަ އިމްތިހާނެކެވެ. އަދި އޭޕްރީލް 23، 2020 ގައި އިމްތިހާނު ކުރެވޭ ދާއިރާތައް ބާ ކައުންސިލުން ގެޒެޓް ވެސް ކުރި އެވެ.
ނަމަވެސް, 2022 ވަނަ އަހަރުގެ މެދުތެރެއަށް އިމްތިހާން ފަސްކުރެވިފައިވާ ކަން ސެޕްޓެމްބަރު 2021 ގައި އިއުލާން ކުރި އެވެ. އަދި މި އަހަރުގެ މާޗު މަހު އެ އިމްތިހާން ޖޫން މަހުގެ 25 ވަނަ ދުވަހު އޮންނާނެ ކަން އިއުލާން ކޮށްފައިވެ އެވެ.
އިމްތިހާނުގައި ބައިވެރިވާ ދަރިވަރުންގެ މައިގަނޑު ކަންބޮޑުވުމަކަށް އޮތީ މިހާރު ކަނޑައަޅާފައިވާ ފީ އަގުު ބޮޑުވުމެވެ. އެއީ 10،000ރ. ގެ ފީ އެކެވެ.
މި ކަންބޮޑުވުންތައް ދަރިވަރުންގެ ފަރާތުން ވަނީ ރައްޔިތުންގެ މަޖިލީހުގެ ޖުޑިޝަރީ ކޮމިޓީގެ ސަމާލު ކަމަށް ވެސް ގެނެސްފަ އެވެ. ކޮމިޓީން ވެސް ވަނީ އެ ކަންބޮޑުވުންތަކަށް ރިއާޔަތްކޮށް އިމްތިހާނު ފަސްކޮށްދޭން ބާ ކައުންސިލްގައި އެދިފަ އެވެ.
ބާ ކައުންސިލްގެ އާ އެކްސްކޯއެއް ވެސް އިންތިހާބުކޮށްފައިވާއިރު، އާ އިންތިހާބީ އެކްސްކޯގެ މެންބަރުން ވެސް ރައްޔިތުންގެ މަޖިލީހުގެ ޖުޑިޝަރީ ކޮމިޓީއަށް ހާޒިރުވެ ވަނީ ވާހަކަ ދައްކައިފަ އެވެ. އެ މެންބަރުން ވެސް އެދިފައިވަނީ ބާ އިމްތިހާން ފަސްކޮށް އެ އެކްސްކޯގެ ބެލުމުގެ ދަށުން އިމްތިހާނު ބޭއްވޭ ގޮތަށް ހެދުމަށެވެ.
