ހުލާސާކޮށް މަޖިލިސް: ދޮގު ވާހަކަ ދައްކާ ކަމުގެ ތުހުމަތާއެކު އީވާ އާއި ރޮޒެއިނާގެ ބަހުސެއް

ސަރުކާރު ހިންގާ މައި ޕާޓީ އެމްޑީޕީގެ އެތެރޭގައި އުފެދިފައިވާ ހިލާފުތަކަކީ މިހާރު ސިއްރެއް ނޫނެވެ. ދެ ފެކްޝަނަށް ތާއީދުކުރާ މެންބަރުންގެ މެދުގައި މަޖިލިސް ތަޅުމުގައި ވެސް އަބަދުވެސް އަންނަނީ ބަހުގެ ހަމަލާތައް ރައްދު ކުރަމުންނެވެ.

ރައްޔިތުންގެ މަޖިލީހުގެ މިއަދުގެ ޖަލްސާގައި ވެސް ވަނީ އައްޑޫ މީދޫ ދާއިރާގެ މެންބަރު ރޮޒައިނާ އާދަމް އާއި މަޖިލީހުގެ ރިޔާސަތުގައި އިންނެވި، މަޖިލީހުގެ ނައިބު ރައީސް އީވާ އަބްދުﷲ އާ ދެމެދު ބަހުސެއް ހިނގާފަ އެވެ.

އެގޮތުން، ނައިފަރު ދާއިރާގެ މެންބަރު އަހުމަދު ޝިޔާމަށް ބަހުސް ކުރައްވަން ލިބިވަޑައިގެންނެވި ފުރުސަތުގައި ރައީސް އިބްރާހިމް މުހައްމަދު ސޯލިހު އާ ގުޅޭ ގޮތުން ދެއްކެވި ވާހަކައަކަށް ހިތްހަމަނުޖެހިވަޑައިގެން، ރޮޒައިނާ ނިޒާމީ ނުކުތާ ނެންގެވި އެވެ. ރޮޒައިނާ ވިދާޅުވި ގޮތުގައި ޝިޔާމް ކުރެއްވީ މަޖިލީހުގެ ގަވައިދާ ހިލާފު ކަމެކެވެ.

"މި ތަނުގައި ނެތް މީހެއްގެ ވާހަކަ އަބުރު ކަތިލުމުގެ ބޭނުމުގައި ދޮގު ހަދައިގެން ދެއްކުމަކީ ހަގީގަތުގައި މަޖިލީހުގެ ގަވައިދު ވެސް ތަންދޭ ކަމެއް ނޫން،" ރޮޒައިނާ ވިދާޅުވި އެވެ.

އެހެންނަމަވެސް މަޖިލީހުގެ ރިޔާސަތުގައި އިންނެވި އީވާ، އެ މައްސަލައަކީ ނިޒާމީ ނުކުތާއެއްގެ ގޮތުގައި ބަލައިގެންފައެއް ނުވެ އެވެ. އޭގެ ބަދަލުގައި އީވާ ވަނީ ރޮޒައިނާ އިޝާރާތް ކުރެއްވި މަޖިލީހުގެ މާއްދާއެއް ކިޔައިދެއްވުމަށް އެދިވަޑައިގެންފަ އެވެ.

"މަޖިލީހުގެ ގަވައިދުގައި ނޯންނާނެ ތެދުބަހުން ވާހަކަ ދައްކާކަށް، އެހެންވީމާ ނިޒާމީ ނުކުތާއެއް ނޫން ކަން މެންބަރަށް އެނގިވަޑައިގަންނަވާނެ،" އީވާ ވިދާޅުވި އެވެ.

އީވާގެ ޖަވާބަށް ރައްދު ދެއްވުމަށް ރޮޒައިނާ ވަނީ އިތުރު ނިޒާމީ ނުކުތާއެއް ނަންގަފައިވަ އެވެ. ވިދާޅުވީ ދޮގު ހެދުމަކީ އިސްލާމް ދީނުގައި އޮންނަ ކަމެއް ނޫން ކަމަށެވެ. އަދި މަޖިލީހުގެ ގަވައިދުގައި ދީނާ ހިލާފު ކަންކަން ނުކުރުމަށް އޮންނަ ކަމަށެވެ.

ރޮޒައިނާގެ ދެވަނަ ނިޒާމީ ނުކުތާއާ ގުޅިގެން، އީވާ ވިދާޅުވީ ގަވައިދުގައި އޮންނަނީ އިސްލާމްދީނުގެ އަސްލަކާ ހިލާފުވާ ވާހަކަ ނުދެއްކޭނެ ކަމަށެވެ.

މިއަދުގެ ހާޒިރީ

• ހާޒިރުވެވަޑައިގެންނެވީ: 26 މެމްބަރުން

• ސަލާމުގައި: 03 މެމްބަރުން
• ރަސްމީ ދަތުރުފުޅުގައި: 01 މެންބަރުން

އޭގެ ފަހުން ވެސް، މެންބަރު ޝިޔާމް ބަހުސް ކުރައްވަމުން ދިޔަ ވަގުތު އެކި ފަހަރު މަތީން ރޮޒައިނާ ވަނީ ނިޒާމީ ނުކުތާ ނަންގަވައިގެން ރައްދު ދެއްވާފަ އެވެ. އެހެންނަމަވެސް ރިޔާސަތުން އެއްވެސް ނިޒާމީ މައްސަލައެއް ބަލައިގެންފައެއް ނުވެ އެވެ.

މިއަދުގެ ފޮޓޯ

ރައްޔިތުންގެ މަޖިލީހުގެ މިއަދުގެ ޖަލްސާގެ ތެރެއިން--