ބޯކޮށް ވާރޭ ވެހި ފެންބޮޑުވުމުގެ ސަބަބުން ހިނގި އެކި ހާދިސާތަކުގައި އިންޑިއާ އަދި ބަންގްލަދޭޝް އިން 60 އަށްވުރެ ގިނަ މީހުން މަރުވެއްޖެ އެވެ.
ވިއްސާރަ މޫސުމާ އެކު ވާރޭ ވެހޭ މިންވަރު އެތެރެވެ ނުރައްކާތެރި ގިނަ ހާދިސާތަކެއް ވަނީ ހިނގާފަ އެވެ. އޭގެ ސަބަބުން އެތައް މިލިއަން މީހުން ހާލުގައި ވަނީ ޖެހިފަ އެވެ. ދެ ގައުމުގެ ކަމާބެހޭ އިދާރާތަކުން ދަނީ މީހުން ސަލާމަތް ކުރުމުގެ މަސައްކަތް ކުރަމުންނެވެ.
ކުރިއަށް އޮތް ދުވަސްތަކުގައި ވާރޭ ވެހޭ ވަރު އިތުރުވާނެ ކަމަށް ބުނެ ފެންބޮޑުވާނެ ކަމުގެ އިންޒާރު މޫސުމާ ބެހޭ އިދާރާތަކުން ވަނީ ދީފަ އެވެ.
ބަންގްލަދޭޝްގެ އޮފިޝަލުން ބުނާ ގޮތުގައި މިއީ 2004 ވަނަ އަހަރުގެ ފަހުން ފެންބޮޑުވުމުގެ ސަބަބުން މިހާ ބޮޑެތި ގެއްލުންތަކެއް ލިބުނު ފުރަތަމަ ފަހަރެވެ. މިކަމުގެ އަސަރު އެންމެ ބޮޑަށް ކޮށްފައި ވަނީ އެ ގައުމުގެ އިރުއުތުރު ސްޓޭޓުތަކަށެވެ.
ބައެއް ސްކޫލުތައް ވަގުތީ ބޯހިޔާވަހިކަމަށް ބަދަލުކޮށްފައިވާ އިރު ސިފައިންގެ ގިނަ އަދަދެއްގެ ބަޔަކު ވަނީ މީހުން ސަލާމަތް ކުރަން ނެރެފަ އެވެ.
ބަންގްލަދޭޝްއާ އިންވެގެން އޮންނަ އިންޑިއާގެ އައްސާމް ސްޓޭޓަށް ޖެހިޖެހިގެން ފަސް ދުވަހު ވާރޭ ވެހި ފެންބޮޑުވުމުން 1.8 މިލިއަން މީހުން ވަނީ ހާލުގައި ޖެހިފަ އެވެ.
ފާއިތުވެދިޔަ އަހަރުތަކުގައި އިންޑިއާ އަދި ބަންގްލަދޭޝްއަށް ވެސް ވަނީ މޫސުމީ ބަދަލުތަކާ އެކު ބޮޑެތި ގެއްލުންތަކެއް ލިބިފަ އެވެ.
