ވަކީލު ކަމުގެ ލައިސަންސް ހޯދުމަށް ފުރިހަމަކުރަން ޖެހޭ ބާ އިމްތިހާނު ކުރިން ވެސް ތާވަލުކޮށްފައިވާ ތާރީހަށް ބަދަލެއް ނުގެނެސް ބާއްވަން ބާ ކައުންސިލްގެ އެކްސްކޯއިން ރޭ ނިންމައިފި އެވެ.
ބާ ކައުންސިލުން ނެރުނު ބަޔާނެއްގައި ވަނީ، އަންނަ ހޮނިހިރު ދުވަހު ބާއްވާ އިމްތިހާނާ ގުޅިގެން ބައެއް ދަރިވަރުންގެ ހުރި ކަންބޮޑުވުންތަކާ ގުޅިގެން އެކްސްކޯއިން އިއްޔެ ބައްދަލުކޮށް މަޝްވަރާ ކޮށްފައިވާ ކަމަށެވެ.
ގާނޫނީ ވަކީލުންގެ ހުއްދަ ދޫކުރުމާ ބެހޭ ގަވާއިދުގައި އިމްތިހާނު ބޭއްވުމަށް ކަނޑައެޅިފައިވާ ތާރީހުގެ 90 ދުވަސް ކުރިން އެ ތާރީހު އިއުލާން ކުރަން ބަޔާންކޮށްފައި އޮންނަކަން ފާހަގަ ކުރި އެވެ. އެ ގޮތުގެ މަތިން މާޗު މަހު ވަނީ ޖޫން 25 ގައި އިމްތިހާން އޮންނާނެ ކަން އިއުލާން ކޮށްފަ އެވެ.
"...އެހެންކަމުން 25 ޖޫން 2022 ގައި ބޭއްވުމަށް އިމްތިޒާމު ކުރާ ބާ އިމްތިހާނުގެ ތާވަލަށް އެއްވެސް ބަދަލެއް ގެންނަން ޖެހޭ ސަބަބެއް މެދުވެރިވެފައި ނެތް ކަމަށް ވަނީ ކަނޑައަޅައިފަ،" ބާ ކައުންސިލްގެ އެކްސްކޯއިން ނެރުނު ބަޔާނުގައި ބުނެފައިވެ އެވެ.
ބާ ކައުންސިލުން ބުނީ އިމްތިހާނު ކުރެވޭނެ ގޮތް އެ ކައުންސިލުން ގެންދިޔައީ ދުރާލާ އަންގަމުން ކަމަށެވެ. އެހެންވުމާ އެކު ވެސް އިމްތިހާނު ފަސްކުރަން ޖެހޭ ސަބަބެއް ނެތް ކަމަށް އެ ކައުންސިލުން ބުންޏެވެ.
މިގޮތުން، 2020 ވަނަ އަހަރުން ފެށިގެން އެ ކައުންސިލުން ބާއްވަން މަސައްކަތް ކުރަމުންދާ އިމްތިހާނެއް ކަން ވެސް ބާ ކައުންސިލުގެ ބަޔާނުގައި ފާހަގަކޮށްފައިވެ އެވެ.
އެންމެ ފުރަތަމަ އޭޕްރީލް 23، 2020 ގައި އިމްތިހާނު ކުރެވޭ ދާއިރާތައް ބާ ކައުންސިލުން ގެޒެޓް ކުރިކަމާއި، 2022 ވަނަ އަހަރުގެ މެދުތެރެއަށް އިމްތިހާން ފަސްކުރެވިފައިވާ ކަން ސެޕްޓެމްބަރު 2021 ގައި އިއުލާންކޮށް ދެވަނަ ފަހަރަށް ވެސް އިމްތިހާނު ކުރެވޭ ދާއިރާތައް ގެޒެޓްކުރިކަން ބާ ކައުންސިލުން ބުނެފައިވެ އެވެ.
މީގެ އިތުރުން ބާ އިމްތިހާނުގެ ތަފްސީލީ ސިލަބަސް ވެސް މި އަހަރުގެ ޖެނުއަރީ މަހު 600 އަށް ވުރެ ގިނަ ދަރިވަރުންނާއި ގާނޫނީ ފަންނަށް ވަނުމުގެ ޝައުގުވެރިކަން ހުރި ފަރާތްތައް ހިމެނޭ ޕްލެޓްފޯމެއްގައި ހިއްސާކޮށްފައިވާ ކަން ވެސް ބާ ކައުންސިލުން ފާހަގަ ކުރި އެވެ.
ބާ އިމްތިހާނާ ގުޅޭ މައްސަލައެއް ސިވިލް ކޯޓަށް ވެސް ވަނީ ހުށަހަޅައިފަ އެވެ. ސިވިލް ކޯޓަށް މައްސަލަ ހުށަހެޅި ވަކީލުން ވަނީ ބާ އިމްތިހާނު ފަސްކުރުމުގެ ވަގުތީ އަމުރަކަށް ވެސް އެދިފަ އެވެ. އެކަމަކު އެ އަމުރެއް ކޯޓުން ނެރެ ނުދިނެވެ.
އިމްތިހާނުގައި ބައިވެރިވާ ދަރިވަރުންގެ މައިގަނޑު ކަންބޮޑުވުމަކަށް އޮތީ މިހާރު ކަނޑައަޅާފައިވާ ފީ އަގުު ބޮޑުވުމެވެ. އެއީ 10،000ރ. ގެ ފީ އެކެވެ.
މި ކަންބޮޑުވުންތައް ދަރިވަރުންގެ ފަރާތުން ވަނީ ރައްޔިތުންގެ މަޖިލީހުގެ ޖުޑިޝަރީ ކޮމިޓީގެ ސަމާލު ކަމަށް ވެސް ގެނެސްފަ އެވެ. ކޮމިޓީން ވެސް ވަނީ އެ ކަންބޮޑުވުންތަކަށް ރިއާޔަތްކޮށް އިމްތިހާނު ފަސްކޮށްދޭން ބާ ކައުންސިލްގައި އެދިފަ އެވެ.
ބާ ކައުންސިލްގެ އާ އެކްސްކޯއެއް ވެސް އިންތިހާބުކޮށްފައިވާއިރު، އާ އިންތިހާބީ އެކްސްކޯގެ މެންބަރުން ވެސް ރައްޔިތުންގެ މަޖިލީހުގެ ޖުޑިޝަރީ ކޮމިޓީއަށް ހާޒިރުވެ ވަނީ ވާހަކަ ދައްކައިފަ އެވެ. އެ މެންބަރުން ވެސް އެދިފައިވަނީ ބާ އިމްތިހާން ފަސްކޮށް އެ އެކްސްކޯގެ ބެލުމުގެ ދަށުން އިމްތިހާނު ބޭއްވޭ ގޮތަށް ހެދުމަށެވެ.
