ވީއޭއެމް އެސޯސިއޭޝަން ކަޕްގައި މިރޭ ފަހަތުން އަރައި ޕޮލިސް ކްލަބް އަތުން 3-1 ސެޓުން މޮޅުވެ، ސްޕޯޓްސް ކްލަބް ސިޓީން ގަދަ ތިނެއް ކަށަވަރުކޮށް، ފައިނަލުގެ ސީދާ ޖާގައާ ދިމާލަށް މިސްރާބު ޖަހައިފި އެވެ.
އެސޯސިއޭޝަން ކަޕްގެ ފޯމެޓް އޮތްގޮތުން ލީގު ބުރުގެ އެއް ވަނަ އަށް ފައިނަލުގެ ސީދާ ޖާގައެއް ލިބޭނެ އެވެ. ފައިނަލުގެ އަނެއް ޖާގަ ލިބޭނީ، ލީގު ބުރުގެ ދެ ވަނަ އާއި ތިން ވަނަ ހޯދާ ޓީމެއް ކުޅޭ ސެމީން މޮޅުވާ ޓީމަކަށެވެ.
މިރޭގެ މެޗަށް ފަހު އެއް ވަނައިގައި އޮތީ ހަތަރު މެޗުން ނުވަ ޕޮއިންޓް ހޯދާފައިވާ ސިޓީ އެވެ. ދެ ވަނައިގައި އޮތް ވެމްކޯ އަށް ހަތަރު މެޗުން ވަނީ އަށް ޕޮއިންޓް ލިބިފަ އެވެ. ފުލުގައި ވިއްދާފައި އޮތް ސިފައިންނާއި ފުލުހުންނަށް ވަނީ ހަތް ޕޮއިންޓް ލިބިފަ އެވެ. ގަދަ ތިނެއްގެ އަނެއް ދެ ޖާގައަށް ވާދަކުރަނީ ޕޮލިހާއި ސިފައިން އަދި ވެމްކޯ އެވެ.
މާދަމާ ހަވީރު އޮއްފު އަތުން މޮޅުވެގެން ސިޓީ އަށް ފައިނަލުގެ ސީދާ ޖާގަ ހޯދޭނެ އެވެ. ލީގު ބުރުގައި ދެން ބާކީ އޮންނާނީ މާދަމާރޭ ވެމްކޯ އާއި ޕޮލިސް ކުޅޭ މެޗާއި އާދިއްތަ ދުވަހުގެރޭ ގުޑީސް އާއި ދިވެހި ސިފައިންގެ ކްލަބް ކުޅޭ މެޗެވެ.
ޒުވާނުންގެ މަރުކަޒު އެތެރެ ކޯޓުގައި މިރޭ ކުޅުނު މެޗުގެ ފުރަތަމަ ސެޓު ފަށައިގެން ސިޓީން ކޮންޓްރޯލް ނަގައިގެން ކުޅެން މަސައްކަތް ކުރި ނަމަވެސް ސެޓުގެ ފަހުކޮޅުގައި، ސިޓީގެ ކުޅުންތެރިންނަށް ހެދުނު ގޯސްތަކުގެ ފައިދާ ޕޮޮލިހުން ރަނގަޅަށް ނެގި އެވެ.
އެ ގޮތުން ޕޮލިހުގެ މާއިޝް އަހުމަދާއި އަކިން އައްމާލް ހޯދި ރަނގަޅު ޕޮއިންޓްތަކާ އެކު ޕޮލިހުން 25-22 އިން ފުރަތަމަ ސެޓު ގެންދިޔަ އެވެ.
ސިޓީ ޓީމުގެ ހަރްދީޕް (މ) ޕޮއިންޓެއް ހޯދުމަށް ފަހު އުފާފާޅުކުރަނީ.--- ފޮޓޯ: އަބްދުﷲ އިޔާން/ އަދަދު
އެކަމަކު، ފުރަތަމަ ސެޓަށް ފަހު ދެން މުޅި މަންޒަރު އެއްކޮށް ބަދަލުވި އެވެ. ސިޓީން ދެ ވަނަ ސެޓު ފަށައި އާދަޔާހިލާފު ހިތްވަރެއް ނެރެގެން ކުޅެން ފަށައި، ބޮޑު ލީޑެއް ނެގި އެވެ.
އެ ގޮތުން ސިޓީގެ ކެޕްޓަން، އަލީ ހުޒާމް (ހުޒަންޓެ) އާއި ބިދޭސީ ދެ ކުޅުންތެރިން ކަމަށްވާ، ވިނީތު ކުމާރާއި ވިނާޔަކް ރޯކާޑޭ ތަފާތު މޮޅަށް ކުޅެން ފެށިއިރު، އެ ޓީމުގެ ލިބަރޯ، އަހުމަދު ނަބީލް (ނައްބަ)ގެ ރަނގަޅު ޑިފެންސްތައް ވެސް ފެންނަން ފެށި އެވެ. ނަތީޖާ އަކަށްވީ ދެން ކުޅުނު ދެ ސެޓު، 13-25، 17-25 އިން ގެންގޮސް ސިޓީން މުޅި މެޗުގެ ކޮންޓްރޯލް ނެގި އެވެ.
ހަތަރު ވަނަ ސެޓު ފަށައިގެން ވެސް ސިޓީން ރަނގަޅު ކުޅުން ތަކުރާރުކުރަން ފެށި އެވެ. އެކަމަކު، މި ސެޓުގައި ސިޓީ އަށް ބޮޑު ލީޑެއް ލިބުނަނުދީ ޕޮލިހުން ހިތްވަރު ކުރި އެވެ. އެހެން ނަމަވެސް، ޕޮލިހަށް މައްސަލަ ދިމާވީ މެޗު 08-14 އިން ސިޓީ ކުރީގައި އޮއްވައި، ޕޮލިހުގެ ސެޓަރު، މުއްތުސާމީ އައްޕަވޫ ތަކުރާރުކޮށް ރެފްރީގެ ނިންމުންތަކާ ދެކޮޅު ހަދަން ފެށުމާ އެކު ރެފްރީ ވަނީ ވަކިވަކިން އޭނާ އަށް ދެ ރަތް ކާޑު ދައްކައިފަ އެވެ. އެ ހިސާބުން އޭނާ ބަދަލުކުރަން ޖެހުނުއިރު، ސިޓީ އަށް ވަނީ އެ ދެ ކާޑަށް ދެ ޕޮއިންޓް ދީފަ އެވެ. މުއްތުސާމީ ބާލަން ޖެހުމުން ޕޮލިހުގެ ކުޅުމަށް އަސަރުކުރިއިރު، ފަސޭހަކަމާ އެކު 14-25 އިން ހަތަރު ވަނަ ސެޓު ގެންގޮސް ސިޓީ މެޗުން މޮޅުވި އެވެ.
މެޗާ ބެހޭގޮތުން ސިޓީގެ ކޯޗު ނަލަ ހުސެއިން ޝަރީފް ބުނީ މިއީ ވަރަށް މުހިންމު މޮޅެއް ކަމަށެވެ. އަދި ގަދަ ތިނެއް ޔަގީންވީ ކުޅުންތެރިން ޓީމެއްގެ ގޮތުގައި މޮޅުވާން ކުރި މަސައްކަތް ރަނގަޅުވުމުން ކަމަށާއި ހާއްސަކޮށް ސިޓީ ޓީމުގެ ކެޕްޓަން ހުޒަންޓެ އާއި ދެން ތިބި ކުޅުންތެރިން ވެސް އެކުގައި ކުރި މަސައްކަތް ރަނގަޅުވުމުން ކަަމަށް ނަލަ ހުސެއިން ފާހަގަކުރި އެވެ.
ޕޮލިހުގެ ކޯޗު ފަތުހުﷲ ވަހީދު (ފައްލޯ) ބުނީ ފުރަތަމަ ސެޓުގައި، އެ ޓީމުގެ ސެޓަރު މުއްތުސާމީ އަށް އަނިޔާގެ މައްސަލައެއް ދިމާވެ ކުޅުމަށް އަސަރުކުރި ކަމަށެވެ. އަދި މެޗުގައި ޖުމްލަކޮށް ހިނގައިދިޔަ ބައެއް ކަންކަމާ މެދު ހިތްހަމަނުޖެހޭ ކަމަށާއި އެއީ އިންސާފުވެރިކޮށް ބައެއް ނިންމުންތައް ނުދިއުމުން ކަމަށް ފައްލޯ ވަނީ ބުނެފަ އެވެ.
ގަދަ ތިނެއް ހޯދަން ބޭނުންނަމަ ޕޮލިހުން މާދަމާ ވެމްކޯ އަތުން މޮޅުވާން ޖެހޭނެ އެވެ. ފައްލޯ ބުނީ ވެމްކޯ އަކީ ހުރިހާ ޑިޕާޓްމަންޓެއް ވެސް ވަރުގަދަކޮށް އޮތް ޓީމެއް ކަމަށާއި އެ ޓީމު އަތުން ކާމިޔާބެއް ހޯދަން ވަރަށް ރަނގަޅަށް ކުޅެން ޖެހޭނެ ކަމަށެވެ.
މާދަމާ ހަވީރު 16:15 ގައި ފަށާ މެޗުގައި ސިޓީން އޮއްފު އެފްސީއާ ބައްދަލުކުރާއިރު، މާދަމާރޭ 20:15 ގައި ކުޅޭ މެޗުގައި ވެމްކޯ ނުކުންނާނީ ޕޮލިހާ ދެކޮޅަށެވެ.
