ދިވެހިންގެ ތެރޭގައި މަޝްހޫރުވެފައިވާ މެލޭޝިއާގެ ވިޕްރޯ އުންޒާ ގްރޫޕްގެ އެންޝޯންޓާ ބްރޭންޑްގެ ފޭކް ޕްރޮޑަކްޓެއް ރާއްޖޭގައި ވެސް ވިއްކަމުންދާކަން ފަޅައި އަރައިފި އެވެ.
އުންޒާ ގްރޫޕުން ނެރެފައިވާ ބަޔާނެއްގައި ބުނެފައިވާ ގޮތުގައި އެ ކުންފުނިން ރަޖިސްޓްރީ ކޮށްފައިވާ ޓްރޭޑްމާކާ އެއްގޮތަށް ނަމަވެސް އޭގެ އަސްލު އޮޅުން އަރާ ގޮތަށް އުފައްދަނީ ތުރުކީގެ ހިޒިރިގޫ ކޮޒްމެޓިކުންނެވެ.
"ވުމާއެކު އެ ކުންފުންޏާ ދެކޮޅަށް ތުރުކީގެ ކޯޓުގައި މި ކުންފުނީގެ ފަރާތުން ދައުވާކޮށް ފުރަތަމަ މަރުހަލާގެ ދައުވާ މި ކުންފުންޏަށް ވަނީ ކާމިޔާބު ކުރެވިފަ އެވެ. އަދި މިހާރު ވެސް އިތުރު ދައުވާތައް ދަނީ ކުރިއަށެވެ." އުންޒާ ގްރޫޕްގެ ބަޔާނުގައިވެ އެވެ.
އެ ކުންފުނީގެ ނަމުގައި ރަޖިސްޓްރީ ކޮށްފައިވާ ޓްރޭޑްމާކްގެ އުފެއްދުންތައް ރައްކާތެރިކޮށް ހިމާޔަތް ކުރުމަށް ގާނޫނީ ގޮތުން އަޅަންޖެހޭ ހުރިހާ ފިޔަވަޅެއް ތުރުކީގެ ކޯޓުތަކަށް ހުށަހަޅައިގެން ކުރިއަށް ގެންދާ ކަމަށް އުންޒާ ގްރޫޕުން ބުނެ އެވެ.
އެންޝޯންޓާ ބްރޭންޑްގެ ލޯގޯގެ ދަށުން ތުރުކީގައި އުފައްދާ އަދި ރާއްޖޭގެ ބާޒާރުގައި ވެސް މިހާރު ވިއްކަމުންދާ އެ އުފެއްދުންތަކަކީ ސިއްހީ ގޮތުން ލިބިދާނެ ގެއްލުންތަކަށް ރައްކާތެރި ކުރުމަށް އަޅަންޖެހޭ ވަރަށް ފިޔަވަޅުތައް އަޅައި، ކޮލިޓީ ކަށަވަރު ކުރެވިފައިވާ ތަކެތި ނޫންކަމަށް އުންޒާއިން ބުނެ އެވެ.
"އެ އުފެއްދުންތަކުގެ ކޮލިޓީ ކަށަވަރު ކުރެވިފައި ތަކެތި ނޫން ކަމަށް އެންމެހާ ފަރާތްތަކުގެ ސަމާލު ކަމަށް ދަންނަވަމެވެ. އަދި އެފަދަ ތަކެތި ބޭނުންކޮށްގެން އެއްވެސް ފަރާތަކަށް ލިބިދާނެ އެއްވެސް ގެއްލުމަކަށް މި ކުންފުންޏާއި، މި ކުންފުނީގެ ފަރާތުން އެ ތަކެތި ރާއްޖޭގެ ބާޒާރުގައި މާކެޓުކޮށް ޑިސްޓްރިބިއުޓް ކުރުމުގެ އެކްސްކްލޫސިވް ލިބިފައިވާ ފަރާތަށް ޒިންމާވެވެން ނޯންނާނެ ވާހަކަ ދަންނަވަމެވެ." ބަޔާނުގައިވެ އެވެ.
އެންޝޯންޓާގެ އުފެއްދުން ރާއްޖެ އެތެރެކޮށް ވިއްކުމުގެ ހުއްދަ އުންޒާ ކުންފުނިން ދީފައިވަނީ ލިލީ އެންޓަޕްރައިޒަސްއަށެވެ.
