މި ފަހަރުގެ ވޮލީ ބޯޅަ ސީޒަނަށް ޕޮލިސް ކްލަބުން އެކުލަވާލާފައިވާ ޓީމުގައި ހިމެނޭ ދިވެހި ކުޅުންތެރިންގެ އުމުރަށް ބަލާނަމަ އުޅެނީ އެވްރެޖްކޮށް 20-22 އަހަރާ ދެމެދުގަ އެވެ. ޑްރާފްޓް ނައިޓަށް ޕޮލިހުން ނުކުތީ އެ ޓީމުގެ ޒުވާން ކުޅުންތެރިންނަށް ފުރުސަތު ދެވޭނެ ގޮތަށް ވިސްނައި، ދެން، ބޭނުންވާ މަގާމުތަކަށް ކުޅުންތެރިން ނަގާށެވެ. އެ ގޮތުން އެ ޓީމުން ފުރަތަމަ ނެގީ ސެޓަރު، މުއްތުސާމީ އަޕަވޫ އެވެ.
ޕޮލިހުގެ ކޯޗު ފަތުހުﷲ ވަހީދު (ފައްލޯ) ބުނީ އެ ޓީމުން ފުރަތަމަ ސެޓަރު ނަގަން ނިންމީ ރަނގަޅަށްކަން މިހާރު ސާބިތުވަމުން އަންނަ ކަމަށެވެ.
"އެއީ ބެކްބޯން، ފުރަތަމަ ކުޅުންތެރިއަކު ނަގަން ލިބުނީމަ، ސެޓަރު ނަގަން ނިންމި ނިންމުމަކީ ވެސް އެއީ. ހަމަ ޓީމެއްގެ ގޮތުގައި ކުޅެން އެ ފުރުސަތު ހޯދަން ވެގެން. އެހެންވީމަ އެކަން. އިރާދަކުރެއްވިއްޔާ ވަރަށް ރަނގަޅަށް ފާހަގަކުރެވިގެން އެބަދޭ،" ދެ މެޗެއްގެ މޮޅު ކުޅުންތެރިޔާގެ މަގާމު ހޯދި މުއްތުސާމީއާ ބެހޭގޮތުން ރޭގެ މެޗަށް ފަހު ފައްލޯ ބުންޏެވެ.
"އެންމެ ފުރަތަމަ ވެސް ބަށްޓަން ކޮށްގެން އޮތީ ޒުވާން ކުޅުންތެރިންނަށް އަމާޒުކޮށްގެން މި ޓީމު، އެހެންވީމަ، އެ ކުޅުންތެރިން ލައްވާ އަޅުގަނޑުމެން ބޭނުންވާ ގޭމް ކުޅެވޭ ވަރުގެ ސެޓަރެއް އެހެރީ ހޯދާފައި،"
ޕޮލިސް ކްލަބްގެ ކުޅުންތެރިން ގައުމީ ސަލާމަށް ހުއްޓިލައިގެން: (ވ.3) ޕޮލިހަށް ކުޅޭ އިންޑިއާ ގައުމީ ޓީމުގެ ސެޓަރު، މުއްތުސާމީ: މުބާރާތުގެ ދެ މެޗެއްގެ މޮޅު ކުޅުންތެރިޔާގެ މަގާމު ވަނީ ހޯދާފައި.-- ފޮޓޯ: އިމޭޖަސް.އެމްވީ/ ނައުޝަމް ވަހީދު
މުބާރާތުގެ ފޯމެޓް ރޭވިފައި އިން ގޮތުން އެއް ވަނަ ހޯދާ ޓީމަކަށް ފައިނަލުގެ ސީދާ ޖާގަ ލިބޭނެ އެވެ. ފައިނަލުގެ އަނެއް ޖާގަ ލިބޭނީ ދެ ވަނަ އާއި ތިން ވަނަ ކުޅެގެން މޮޅުވާ ޓީމަކަށެވެ.
ޕޮލިސް، މި ވަގުތު އެއް ވަނައިގައި އޮތީ ތިން މެޗުން މޮޅުވެގެން ހަތް ޕޮއިންޓް ހޯދައިގެންނެވެ. ދެ ވަނައިގައި އޮތް ކްލަބް ވެމްކޯ ދެ މެޗުން މޮޅުވިއިރު، ވަނީ ހަ ޕޮއިންޓް ލިބިފަ އެވެ. ދެން އޮތް ހަތަރު ޓީމަށް ބަލާއިރު، ސްޕޯޓްސް ކްލަބް ސިޓީ ދެ މެޗުން ތިން ޕޮއިންޓް ހޯދިއިރު، އޮއްފު ވަނީ ތިން މެޗުން ތިން ޕޮއިންޓް ހޯދައިފަ އެވެ. އެންމެ ފަހުގެ ޗެމްޕިއަން ދިވެހި ސިފައިންގެ ކްލަބް އާއި ގުޑީސް ސްޕޯޓްސް ކްލަބް ކުޅުނު ދެ މެޗުން ވެސް ވަނީ ބަލިވެފަ އެވެ.
ފުރަތަމަ ދެ މެޗުން ޕޮލިސް ވަނީ ފަސް ސެޓު ކުޅެގެން، ގުޑީސް ސްޕޯޓްސް ކްލަބާއި ދިވެހި ސިފައިންގެ ކްލަބް ބަލިކޮށްފަ އެވެ. އެ އަށް ފަހު ރޭ ވަނީ އޮއްފު އެފްސީ އަތުން 3-1 ސެޓުން މޮޅުވެފަ އެވެ. ޕޮލިހަށް ލީގު ބުރުގައި ބާކީ އޮތީ ސްޕޯޓްސް ކްލަބް ސިޓީ އާއި ކްލަބް ވެމްކޯގެ މެޗެވެ.
އޮއްފު އަތުން ފަސް ސެޓު ނުކުޅެ ހޯދި މޮޅާ އެކު ފައްލޯ ބުނީ އެ ކާމިޔާބު ފާހަގަކުރަނީ އެހެން ދުވަސް ދުވަހު ވެސް އެކަންކުރާ ގޮތަށް ކަމަށާއި އެއީ ކުޅުންތެރިންގެ މަސައްކަތާއި ކުރި ހިތްވަރުން ލިބުނު އެއްޗެއް ކަމަށެވެ.
"ފުރަތަމަ ދެ މެޗު އަޅުގަނޑުމެން ވަރަށް ހާޑްކޮށް. ފަސް ސެޓަށް ގޮސްގެން ނިމިފައިވާތީ ކުޅުންތެރިންގެ ވަރުބަލިކަން އެބަހުރި ކޮންމެ ވެސް ވަރަކަށް،" ފައްލޯ ބުންޏެވެ.
"ޓޯނަމެންޓްގެ ކުރީކޮޅުގައި މި ކާމިޔާބީތައް ލިބުން މިއީ އަޅުގަނޑުމެންގެ ޒުވާން ކުޅުންތެރިންނަށް ޓޯނަމެންޓްގެ ކުރިއަށް މި އޮތް ބައި ހިތްހަމަޖެހިގެން، އަދި ރަނގަޅުކުރަން ހުރި ކަންތައްތައް ރަނގަޅުކުރަން ލިބުނު ފުރުސަތެއް. އެހެންވީމަ ކުރިއަށް އޮތްތާގައި އޮތީ ގަދަ މެޗުތައް، ގަދަ ޓީމުތައް، މި ލިބުނު ފުރުސަތުތަކުގައި ގޯސްކޮށް ހުރި ކަންތައްތައް ރަނގަޅުކުރަން މަސައްކަތް ކުރާނީ،"
ޕޮލިހުގެ މެޗެއް ދެން އޮތީ ހުކުުރު ދުވަހުގެރޭގަ އެވެ. އެރޭ ޕޮލިސް ބައްދަލުކުރާނީ ސިޓީއާ އެވެ. އަދި ލީގު ބުރުގައި ޕޮލިސް ކުޅޭ ފަހު މެޗުގައި ވެމްކޯއާ ކުޅޭނީ ހޮނިހިރު ދުވަހުގެރޭގަ އެެވެ.
މުބާރާތުގައި މިއަދު ދެ މެޗެއް ކުޅޭނެ އެވެ. ހަވީރު 16:15 ގައި ފަށާ މެޗުގައި ވެމްކޯ އިން ކުޅޭނީ ދިވެހި ސިފައިންގެ ކްލަބާ އެވެ. މިރޭ ކުޅޭ މެޗުގައި ސްޕޯޓްސް ކްލަބް ސިޓީ ކުޅޭނީ ގުޑީސް ސްޕޯޓްސް ކްލަބާ އެވެ.
