ވިއޭނާ، އޮސްޓްރިއާ (ޖޫން 11) - ޔުއެފާ ނޭޝަންސް ލީގުގައި މިރޭ އޮސްޓްރިއާއާ 1-1 އިން އެއްވަރުވެ، އެންމެ ފަހުގެ ޗެމްޕިއަން ފްރާންސުން މޮޅެއް ނުލިބި ތިން ވަނަ މެޗު ނިންމާލަން ޖެހިއްޖެ އެެވެ.
ސްޕެއިން ބަލިކޮށް، މިިދިޔަ އަހަރުގެ ނޭޝަންސް ލީގު ތަށި އުފުލާލި ފްރާންސް މި ފަހަރުގެ މުބާރާތް ފަށަން ޖެހުނީ 2-1 އިން ޑެންމާކް އަތުން ބަލިވެގެންނެވެ. ދެ ވަނަ މެޗުގައި ކްރޮއޭޝިއާއާ 1-1 އިން އެއްވަރުވިއިރު، މިރޭ ވެސް އެ ނަތީޖާ އިން މި ވަނީ އޮސްޓްރިއާއާ އެއްވަރުވެފަ އެވެ.
މި ގްރޫޕްގެ އަނެއް މެޗުން މިރޭ ކްރޮއޭޝިއާ ވަނީ 1-0 އިން ޑެންމާކް ދަނޑުގައި މޮޅުވެފަ އެވެ.
ނޭޝަންސް ލީގުގެ ޑިވިޝަން އެކެެއްގެ ގްރޫޕް އޭގެ އެއް ވަނައިގައި އޮތީ ތިން މެޗުން ހަ ޕޮއިންޓާ އެކު ޑެންމާކް އެވެ. ދެ ވަނައިގައި އޮތީ ތިން މެޗުން ހަތަރު ޕޮއިންޓާ އެކު އޮސްޓްރިއާ އެވެ. ތިން ވަނައިގައި އޮތް ކްރޮއޭޝިއާ އަށް ވެސް ތިން މެޗުން ހަތަރު ޕޮއިންޓް ލިބިފައިވާއިރު، ފްރާންސް އެންމެ ފުލުގައި އޮތީ ތިން މެޗުން ދެ ޕޮއިންޓް ހޯދައިގެންނެވެ.
އޮސްޓްރިއާ ދަނޑުގައި މިރޭ ކުޅުނު މެޗުގައި ފްރާންސަށް ފުރަތަމަ ހާފުގައި ލީޑުނަގައިދޭން ކަރިމް ބެންޒެމާ އަށް ރަނގަޅު ފުރުސަތެއް ލިބުނެވެ. މެޗުގެ 30 ވަނަ މިނިޓްގައި ހިލޭ ޖެހުމަކުން އޮސްޓްރިއާ އޭރިއާތެރެއިން ލިބުނު ބޯޅަ ބެންޒެމާ ފޮނުވާލި ނަމަވެސް އޮސްޓްރިއާ ކީޕަރު ޕެޓްރިކް ޕެންޓްޒް ވަނީ މަތަކޮށްފަ އެެވެ.
ރަލްފް ރަންގްނިކްގެ ކޯޗުކަމުގައި ކުޅޭ އޮސްޓްރިއާ އިން ފުރަތަމަ ހާފު ނިންމާލީ ލީޑުގައި އޮވެ އެވެ. އެ ޓީމުގެ ގޯލު ޖެހީ މެޗުގެ 37 ވަނަ މިނިޓްގައި އަންޑްރެއަސް ވައިމަން އެވެ. މިއީ ވައިމަން ގައުމީ ޓީމަށް ޖަހައިދިން ފުރަތަމަ ގޯލެވެ. އޮސްޓްރިއާގެ މާކޯ އާނައުޓޮވިޗް ދިން ބޯޅައެއް އޭރިއާތެރެއިން ރަނގަޅު ތަނަށް އަރައި، އެ ޓީމުގެ ކޮންރަޑް ލައިމާ ހުރަސްކޮށްލި ވަގުތު ހަމަޖެހިލާފައި ވައިމަން ވަނީ ގޯލަށް ބޯޅަ ފޮނުވާލައިފަ އެވެ.
ދެ ވަނަ ހާފުގައި ބަދަލު ކުޅުންތެރިއެއްގެ ގޮތުގައި ކުޅެން އަރައި، މެޗުގެ 83 ވަނަ މިނިޓްގައި ފްރާންސަށް އެއްވަރުކޮށްދިނީ ކީލިއަން އެމްބާޕޭ އެވެ. ކްރިސްޓޮފް އެންކުންކޫ ދިން ބޯޅައެއް ހިފައިގެން އޭރިއާތެރެއަށް ވަދެ، އެމްބާޕޭ ފޮނުވާލި ބޯޅަ އަމާޒުވީ ގޯލުގެ މަތީ ދާގަނޑަށެވެ.
ފްރާންސަށް ލީޑުނަަގައިދޭން ފޮނުވާލި ދެ ހަމަލާ ވެސް ހުއްޓުވީ މެޗުގައި މޮޅު ކުޅުމެއް ދެއްކި، އޮސްޓްރިއާގެ ކީޕަރު ޕެންޓްޒް އެވެ. އޭރިއާތެރެއިން ހުސްކޮށް ވަދެ، އެމްބާޕޭ ޖެހި ޝޮޓް ކީޕަރު ޕެންޓްޒް ގައިގައި ޖެހިފައި ބޭރުވީ ހުރަސްދަނޑީގައި ވެސް ޖެހިފަ އެވެ. އިތުރު ވަގުތުގައި އެމްބާޕޭ ނެގި ކޯނަރަކުން މަޓެއޯ ގެންޑޫޒީ ބޮލުން ޖެހި ބޯޅަ ވެސް މަތަކުރީ ކީޕަރު ޕެންޓްޒް އެވެ.
ޑެންމާކްގެ ކޯޕެންހާގެންގައި މިރޭ ކުޅުނު މެޗުން ކްރޮއޭޝިއާ މޮޅުވިއިރު، ހަމައެކަނި ގޯލު ޖެހީ ދެ ވަނަ ހާފުގައި މާރިއޯ ޕަސާލިޗް އެެވެ.
ނޭޝަންސް ލީގުގައި ދެން މި ގްރޫޕްގެ މެޗެއް އޮންނާނީ އަންނަ ހޯމަ ދުވަހު އެވެ. އެ ދުވަހު، ފްރާންސް އަމިއްލަ ދަނޑުގައި ކްރޮއޭޝިއާއާ ކުޅޭއިރު، އޮސްޓްރިއާ އިން ރަށުންބޭރުގައި ކްރޮއޭޝިއާއާ ބައްދަލުކުރާނެ އެވެ.
