ހުޅުމާލޭ ފޭސް ދޭއްގައި އިމާރާތްކޮށްފައިވާ ހައުސިން ޑިވޮލޮޕްމެންޓް ކޯޕަރޭޝަން(އެޗްޑީސީ)ގެ މައްޗަށް އަމުރު ނެރެދިނުމަށް އެދި، ހިޔާ ޔޫނިއަން އިން ސިވިލް ކޯޓަށް ހުށަހެޅި މައްސަލަ އެ ކޯޓުން މިއަދު ބޭރުކޮށްލައިފި އެވެ.
މި މައްސަލަ ކޯޓަށް ހުށަހެޅި ހިޔާ ޔޫނިއަން އިން އެދުނީ ހިޔާގެ ފްލެޓުތައް ހަވާލުކުރީ ފިނިޝިންގެ މަސައްކަތް ނުނިންމާ ކަމަށްވާތީ، ފްލެޓުތަކުގެ ކުލިން އެތަނުގެ ފިނިޝިން އަށް ދިޔަ 250،000ރ. ޖުމްލަ ފީގެ އަދަދުން އުނިކޮށް ދިނުމަށް ނުވަތަ އެ އަދަދު ހަމަވަންދެން ކުލި ނުނެގުމަށެވެ.
އެ އަމުރުގެ އިތުރުން، ހިޔާ ޔޫނިއަން އިން ވަނީ ހިޔާ އެއްބަސްވުމުގައިވާ ގާނޫނާ ހިލާފު މާއްދާތަކާމެދު ގޮތެއް ނިންމައިދިނުމަށް ވެސް އެދިފަ އެވެ.
ސިވިލް ކޯޓުން މި މައްސަލަ ބޭރުކޮށްލާފައިވަނީ ހިޔާ ޔޫނިއަންއަކީ ހިޔާ ފްލެޓް އެއްބަސްވުމުގެ ބައިވެރިއަކަށް ނުވާތީ ކަމަށް ބުނެ އެވެ. އެހެންކަމުން، އެ ދައުވާ ކުރުމުގެ ގާނޫނީ ހައިސިއްޔަތު އެ ޖަމިއްޔާއަށް ލިބިގެން ނުވާ ކަމަށް ކޯޓުން ވަނީ ބުނެފަ އެވެ.
އެ ކޯޓުގެ ހުކުމުގައި ބުނެފައިވާ ގޮތުގައި މި މައްސަލައިގައި ހިޔާ ޔޫނިއަނުން ހުށަހެޅި ޕެޓިޝަނަކީ ދައުވާ ކުރުމުގެ ހައްގު ހިޔާ ޔޫނިއަންއަށް ލިބިދޭ ޕެޓިޝަނެއް ނޫން ކަމަށެވެ.
ސިވިލް ކޯޓުގައި މި މައްސަލަ ބެއްލެވި ގާޒީ ރިޒްމީނާ އިދްރީސް ނެރުއްވި ހުކުމުގައިވަނީ އެހެންކަމުން، މި މައްސަލަ ކޯޓުގައި އިތުރަށް ކުރިއަށް ނުގެންދެވޭނެ ކަމަށް ބުނެފަ އެވެ.
