ހައިކޯޓުގެ ފަނޑިޔާރުކަމުން ދެ ބޭފުޅަކު ވަކިވުމުން، އެމަގާމުތަކަށް ކުރިމަތިލާން ހުޅުވައިލި ފުރުސަތުގައި ދެބޭފުޅަކު ކުރިމަތިލައްވައިފި އެވެ.
ޖުޑިޝަލް ސާވިސް ކޮމިޝަން (ޖޭއެސްސީ) އިން މިއަދު ބުނީ ފަނޑިޔާރުންގެ މަގާމުތައް ހުސްވުމުން އެ މަގާމުތަކަށް ކުރިމަތިލާން މިދިޔަ މަހުގެ 26 ގައި ހުޅުވައިލި މުއްދަތު ހަމަވައިރު އެމަގާމުތަކަށް ކުރިމަތިލެއްވީ ދެ ބޭފުޅުން ކަމަށެވެ.
އެއީ ހ. ސޭންޑީބީޗް ހުޒައިފާ މުހައްމަދާއި އއ. ފެރިދޫ، ސިޔާމާމަންޒިލް ޝުކުރުﷲ ޝަކީލެވެ.
އެ ދެބޭފުޅުންގެ ތެރެއިން ހުޒައިފާ އަކީ މިހާރު ވެސް ފެމިލީ ކޯޓުގެ އިސް ގާޒީ އެވެ. މެލޭޝިއާ އިސްލާމިކް ޔުނިވާސިޓީ ކޯޕަރޭޓް ލޯގެ ދާއިރާގެ މާސްޓާސް ހައްދަވާފައިވާ ހުޒައިފާ އެމަގާމަށް އައްޔަންކުރީ މިދިޔަ މާޗްމަހު އެވެ. އޭނާ އަކީ ރާއްޖޭގެ ސުޕީރިއާ ކޯޓެއްގެ އިސްގާޒީއަކަށް އައްޔަންކުރި ފުރަތަމަ އަންހެން ބޭފުޅާ އެވެ.
ހައިކޯޓްގެ ފަނޑިޔާރުކަމަށް ކުރިމަތިލެއްވި ދެބޭފުޅުންގެ ތެރެއިން ޝުކުރުﷲ އަކީ ޕްރޮޒެކިއުޓާ ޖެނެރަލްގެ އޮފީހުގައި ދައުލަތުގެ ވަކީލެއްގެ ގޮތުގައި ކުރިން ފަސް އަހަރު ދުވަހު މަސައްކަތްކުރައްވާފައިވާ ބޭފުޅެކެވެ.
ހައިކޯޓުގެ ފަނޑިޔާރުންގެ ގޮތުގައި ތިއްބެވި ދެ ބޭފުޅަކު މަގާމުން އިސްތިއުފާދެއްވާފައި ވާއިރު ތިން ވަނަ ބޭފުޅަކު ވަނީ މަގާމުން ވަކިކޮށްފަ އެވެ. އިސްތިއުފާ ދެއްވީ މުހައްމަދު ސަމީރާއި އަބްދުއް ރައޫފް އިބްރާހީމެވެ. މަޖިލީހުން މިދިޔަ ހޯމަދުވަހު ވަކިކުރީ އަބްދުﷲ ހަމީދެވެ.
