މަޖީދިއްޔާ ސްކޫލުގެ ތަރައްގީއަށް ކުރާ މަސައްކަތްތަކަށް އެހީ ފޯރުކޮށްދިނުމާއި މަޖީދިއްޔާއިން ކިޔަވާ ދަރިވަރުންގެ ގުޅުން ގާއިމްކުރުމަށް އެކުލަވާލާފައިވާ 'މަޖީދިއްޔާ މުސްކުޅި ދަރިވަރުންގެ ޖަމިއްޔާ' ގެ ހިންގާ ކޮމިޓީގެ މަގާމްތަކަށް ކުރިމަތިލާން ހުޅުވާލައިފި އެވެ.
މިދިޔަ ހައެއްކަ އަހަރު އެ ޖަމިއްޔާގެ ހަރަކާތްތައް ނުހިންގައި މަޑުޖައްސާފައި އޮތުމަށްފަހު، އިއްޔެ އެ ޖަމިއްޔާއިން ވަނީ މަސައްކަތްތައް އަލުން ފަށައި، އިންތިޒާމްތައް ހަމަޖެއްސުމަށް، ޖުލައި މަހުގެ 20 ވަނަ ދުވަސް ކަނޑައަޅައި، އަހަރީ ޖަލްސާ އެއް ތާވަލުކޮށް، ޖަމިއްޔާގެ މަގާމު ތަކަށް ކުރިމަތިލާން ބޭނުންވާ މީހުންނަށް އެ ފުރުސަތު ހުޅުވާލާފަ އެވެ. - ހިންގާ ކޮމިޓީގެ މަގާމަކަށް ކުރިމަތިލެވޭނީ މަޖީދިއްޔާގެ މުސްކުޅި ދަރިވަރުންނަށް އެކަންޏެވެ.
މަޖީދިއްޔާގެ 1973 ވަނަ އަހަރުގެ ބެޗް ގައި ކިޔަވާ ވިދާޅުވި، އަދި ތައުލީމީ ދާއިރާގެ ހިދުމަތްތެރިޔާ ޑރ އަންވަރު އަހުމަދު ވިދާޅުވީ، މމދ ކޮމިޓީގެ އަހަރީ ޖަލްސާގައި މުހިއްމު ތިން ކަމެއް ހިނގާނެ ކަމަށެވެ. އަދި އުންމީދު ކުރަނީ ކުރިއަށް އޮތްތަނުގައި އެ ޖަމިއްޔާގެ މަސައްކަތްތަކަކީ މަޖީދިއްޔާގެ ދަރިވަރުންނަށް ތަރައްގީ އާއި ސްކޫލަށް ކުރިއެރުން ހޯދަން ކުރިއަށްވުރެ ބޮޑަށް ހަރަކާތްތެރި ޖަމިއްޔާ އަކަށް ވެގެން ދިއުން ކަމަށެވެ.
"އެންމެ މުހިއްމު ތިން ކަމަކަށް އޮންނާނީ ޖަމިއްޔާގެ މިހާރުގެ މަސައްކަތްތައް ހިނގާ ގޮތުގެ ރިޕޯޓް ހުށަހެޅުމާއި އެއަށް ވާހަކަ ދެއްކުން. ދެން މަގާމުތަކަށް މެންބަރުން ހޮވާނީ ވެސް އެ ޖަލްސާގައި. ތިން ވަނަ ކަމެއްގެ ގޮތުގައި ކުރިއަށް ޖަމިއްޔާގެ ކަންކަން ރާވާނެ ގޮތުގެ ޕްލޭން ވެސް ކުރެވިގެންދާނެ،" ޑރ އަންވަރު ވިދާޅުވި އެވެ.
ޑރ އަންވަރު އަކީ އެ ޖަމިއްޔާގެ ދެ މަސްއޫލުވެރިންގެ ތެރެއިން އެއް ބޭފުޅެވެ. ޖަމިއްޔާގެ އިސް އަދި ދެވަނަ މަސްއޫލުވެރިޔަކީ ތައުލީމީ ދާއިރާ އަށް ދިގު މުއްދަތަކަށް ހިދުމަތްކުރެއްވުމަށްފަހު ރިޓަޔާވެ ވަޑައިގެން ހުންނެވި، އިބްރާހިމް އިސްމާއިލް އެވެ.
ކުރިމަތިލުމަށް ހުޅުވާލާފައިވާ މަގާމްތައް
- ރައީސް
- ނައިބު ރައީސް (2)
- ސެކްރެޓަރީ
- ނައިބު ސެކެރެޓަރީ
- ހަޒާންދާރު
- ހަޒާންދާރުގެ ނައިބު
- އިންތިޒާމް ސެކްރެޓަރީ
- އިންތިޒާމް ސެކްރެޓަރީގެ ނައިބު
- އިތުރު މެންބަރުން (8)
މި މަގާމްތަކަށް ޝައުގުވެރިވާ ފަރާތްތަކުން ޖުލައި މަހުގެ ތިނެއްގެ ކުރިން ސްކޫލުން އެކަމަށް ހަމަޖައްސާފައިވާ އޮންލައިން ފޯމާއި ލިޔެކިޔުންތައް ހުށަހެޅުމަށް އަންގާފައިވެ އެވެ.
