އިޒްރޭލުން ބޭނުން ވަނީ ފަލަސްތީނުގެ ބިމުގެ ފުރިހަމަ ކޮންޓްރޯލް ކަމަށާއި ދައުލަތެއް ގާއިމުކުރުމަށް ފަލަސްތީނުން ބޭނުންވާ ބިންތަކަށް ވެރިވެގަތުން އިޒްރޭލުން ހުއްޓާލަން ޖެހޭ ކަމަށް އދ. ގެ ހިއުމަން ރައިޓްސް ކޮމިޝަނުން އެކުލަވާލި މިނިވަން ކޮމިޝަނަކުން އެކުލަވާލި ރިޕޯޓެއްގައި ބުނެފި އެވެ.
ފަލަސްތީނުގެ ބިންތަކަށް ގަދަކަމުން ވެރިވަގަތުން ނިމުމަކަށް ގެންނަން އިޒްރޭލުން ބޭނުންނުވާ ކަމަށް އެ ރިޕޯޓުގައި ފާހަގަކޮށްފައިވެ އެވެ.
އެގޮތުން، އިޒްރޭލުގެ ސަރުކާރުން ފަލަސްތީނުގެ ރައްޔިތުން އެއްތަނުން އަނެއް ތަނަށް ދިޔުމަށް ހުރަސް އަޅައި އިޒްރޭލުގެ މީހުންނަށް އެތަނުގައި ވަޒަންވެރިވުމަށް ވާގިވެރިވަމުންދާ ކަމަށް އެ ރިޕޯޓުގައި ބުނެފައިވެ އެވެ. އަދި، އިޒްރޭލުގެ ރައްޔިތުންނާ ކައިވެނިކުރާ ފަލަސްތީނު މީހުންނަށް ވެސް އެއް ހަމައެއްގެ ތެރެއިން އަމަލުނުކުރާކަމުގެ ކަންބޮޑުވުން ފާޅުކޮށްފައިވެ އެވެ.
ހުޅަނގު އައްސޭރި ހިމެނޭހެން އިޒްރޭލުން ފަހުން ހިފި ބިންތަކުގައި 700،000 އަށްވުރެ ގިނަ އިޒްރޭލު މީހުން ދިރިއުޅެ އެވެ. ގާތްގަނޑަކަށް ތިން މިލިއަން ފަލަސްތީނު ރައްޔިތުން އުޅޭ ސަރަހައްދުގައި ހުންނަ އިޒްރޭލުގެ ގެތައް ހުންނަނީ ވަރަށް ބޮޑަށް ގާޑުކޮށްފަ އެވެ. އަދި، ދިރިއުޅެވެނީ ހަމައެކަނި ޔަހޫދީންނަށެވެ. މިއީ ބައިނަލްއަގްވާމީ ގާނޫނުތަކާ ހިލާފު ކަމެކެވެ.
މި ރިޕޯޓަށް ހަމާސް ޖަމާއަތުންނާއި ފަލަސްތީނުގެ ސަރުކާރުން ވަނީ މަރުހަބާ ކިޔާފަ އެވެ. އަދި، އިޒްރޭލުގެ އަމަލުތައް ތަހުގީގު ކުރުމަށް ގޮވާލާފައިވެ އެވެ.
އިޒްރޭލުގެ ފޮރިން މިނިސްޓްރީން ބުނީ އެއީ ވަގުތާއި ފައިސާ ބޭކާރު ކުރުމަށް ނެރުނު ރިޕޯޓެ ކަމަށްވެ. އިޒްރޭލުން މި ރިޕޯޓަށް މައުލޫމާތު ދީފައެއް ނުވެ އެވެ.
