މިއުނިކް (ޖޫން 7) - ބަޔާން މިއުނިކަށް ކުޅުމުގެ ޝައުގުވެރިކަން މިހާރު ނެތް ކަމަށް ރޮބަޓް ލެވަންޑޯސްކީ ބުނެފި އެވެ.
އަންނަ އަހަރު ޖޫން މަހުގެ ނިޔަލަށް ބަޔާންގެ ކޮންޓްރެކްޓްގައި ހުރި ލެވަންޑޯސްކީ އަންނަ ސީޒަނުގައި ބަޔާނުން ނުފެނިދާނެ ކަމަށް ވަނީ މި ފަހަރު ޖަރުމަނު ލީގުގެ ފަހު މެޗަށް ފަހު ބުނެފަ އެވެ.
އެކަމަކު، ބަޔާންގެ ސްޕޯޓިން ޑިރެކްޓަރު ހަަސަން ސަލިހަމްދްޒިޗް ބުނީ ކޮންޓްރެކްޓެއް އޮއްވައި، ބަޔާނުން ލެވަންޑޯސްކީ ދޫކޮށްލުމުގެ ވިސްނުމެއް ނެތް ކަމަށެވެ.
ތަކުރާރުކޮށް އެކި ޕްލެޓްފޯމްތަކުގައި ލެވަންޑޯސްކީ، 33، އަންނަނީ ބަޔާން ދޫކޮށްލަން ބޭނުންވާ ކަމަށް ބުނެ، އޭނާގެ ޝުއޫރު ފާޅުކުރަމުންނެވެ. އެ ގޮތުން، އޮނެޓް ސްޕޯޓްސް ޕޮޑްކާސްޓްގައި ވާހަކަ ދައްކަމުން ލެވަންޑޯސްކީ ބުނީ މި ވަގުތަށް އޭނާ ބޭނުމީ ކޮންމެ ގޮތެއް ހަދާފައި ވިޔަސް ބަޔާން ދޫކޮށްލުމަށް ކަމަށެވެ.
"އިންސާފުވެރިވުމާއި އިހުތިރާމް ދިނުން އެއީ ކުރާ މަސައްކަތަށް ވުރެ މާ މުހިންމު ކަމެއް. އެންމެ މުހިންމީ އެކުގައި މީގެ އަށް ހައްލެއް ހޯދުން. އަހަރެން ބަޔާނަށް ކުޅެން ދެން ބޭނުމެއް ނޫން. އެ ޝައުގުވެރިކަމެއް ނެތް، އަހަރެންގެ ގައި ތެރެއިން ބައެއް މަރުވި ކަހަލަ، ބަޔާނަށް ކުޅުމުގެ ޖޯޝެއް ނެތް، އެހެން ދިމާލަކުން ފުޓްބޯޅައިގެ އިމޯޝަނާ އެކު ކުރިއަށްދާން އެބަޖެހޭ،"
ޖަރުމަނުގެ މީޑިއާ ރިޕޯޓްތައް ބުނާގޮތުން ބަޔާންގެ ވިސްނުން ހުރީ ކޮންޓްރެކްޓް ނިމެންދެން ލެވަންޑޯސްކީ ލައްވައި ބަޔާނަށް ކުޅުވުމަށެވެ. އަދި އެހާތަނަށް ކުރެވުނު ވަރަކަށް ލެވަންޑޯސްކީގެ ކޮންޓްރެކްޓް އާ ކުރަން މަސައްކަތް ކުރުމަށެވެ. ބަޔާނުން ލެވަންޑޯސްކީ އަށް އިތުރު ދެ އަހަރުގެ ކޮންޓްރެކްޓެއް ދޭން އޮތީ ތައްޔާރަށެވެ.
އެކަމަކު، ލެވަންޑޯސްކީ ހުރީ ކްލަބް ދޫކޮށްލަން ކުރަން ޖެހުނު ކޮންމެ ކަމެއް ކުރަން ތައްޔާރަށެވެ. އެކަމަކު، ފުރަތަމަ ވިސްނުމަކީ ރިވެތި އުސޫލުގެ ތެރެއިން ކްލަބް ބަދަލުކުރުން ކަމަށް ލެވަންޑޯސްކީ ވަނީ ބުނެފަ އެވެ.
"އަހަރެން މި އުޅެނީ ކްލަބަށް ނުވާނެ ވަރުގެ ކަމެއް ކުރާކަން ނޫން. ވަރަށް ބައިވަރު ކާމިޔާބު އަހަރުތަކެއް ހޭދަކޮށްފިން އަހަރެން ބަޔާނުގައި ހުރެ، ދެން ބޭނުމީ އެހެން ޗެލެންޖެއް،" ލެވަންޑޯސްކީ ބުންޏެވެ.
ބަޔާން ދޫކޮށްލަން ބޭނުންވާ ކަމަށް ބުނެ، ލެވަންޑޯސްކީ ތަކުރާރުކޮށް މީޑިއާގައި ވާހަކަ ދައްކާތީ ބަޔާންގެ ރައީސް ހާބާޓް ހައިނިއާ ވަނީ ހިތްހަމަނުޖެހުން ފާޅުކުރައްވައިފަ އެވެ. ހައިނިއާ ވިދާޅުވީ ލެވަންޑޯސްކީއާ މެދު ގޮތެއް ނިންމާނީ ކްލަބްގެ މަސްލަހަތު އިސްކުރުމަށް ފަހު ކަމަށާއި ކްލަބަކަށް ވުރެ ކުޅުންތެރިއެއްގެ ހައިބަތު ބޮޑުނުވާނެ ކަމަށެވެ.
ޕޮލެންޑްގެ ލެޗް ޕޮޒްނަން އަށް ކުރިން ކުޅުނު ލެވަންޑޯސްކީ ބޮޑަށް ފާހަގަވާން ފެށީ 2010 ވަނަ އަހަރު ޑޯޓްމަންޑަށް ބަދަލުވި ހިސާބުންނެވެ. ފަހުން 2014 ވަނަ އަހަރު ބަޔާން އަށް ބަދަލުވުމަށް ފަހު މިހާތަނަށް ވަނީ ލަނޑު ޖެހުމުގެ ގިނަ ރެކޯޑްތަކެއް މުގުރާލައިފަ އެވެ. ލެވަންޑޯސްކީ ވަނީ މިހާތަނަށް ބަޔާނަށް ކުޅެދިން 373 މެޗުން 343 ގޯލު ޖަހައިފަ އެވެ. ބަޔާނާ އެކު 19 ތަށި ހޯދިއިރު، އޭގެ ތެރޭގައި ޗެމްޕިއަންސް ލީގާއި ކްލަބް ވޯލްޑް ކަޕް އެއް ފަހަރު ޖަރުމަނު ލީގު އަށް ފަހަރު ހިމެނެ އެވެ.
ލެވަންޑޯސްކީގެ ސޮއި ހޯދަން ބާސެލޯނާ އާއި ޗެލްސީ އަދި ޓޮޓެންހަމް ހޮޓްސްޕާސް އިން މަސައްކަތް ކުރާ ކަމަށް ރިޕޯޓްތައް ބުނެ އެވެ.
