ނ. އަތޮޅު ރަށެއްގައި އިތުބާރު ހުރި މަގާމެއްގައި ހުރި މީހަކު ކުޑަކުއްޖަކާ އެކު ޖިންސީ އަމަލު ހިންގުމުގެ ދައުވާ އުފުލައި އެ މައްސަލަ ކޯޓަ ހުށަހެޅީ ގާނޫނުގައި ބަޔާންކުރާ މުއްދަތުގެ ފަހުން ކަމަށް ވާތީ އެ ދައުވާ ބޭރުކޮށްލަން ދަށު ކޯޓުން ނިންމާފައިވާ ނިންމުން ހައިކޯޓުން ދަމަހައްޓައިފި އެވެ.
މި ދައުވާ އެންމެ ފުރަތަމަ ހުށަހެޅީ ނ. މާފަރު މެޖިސްޓްރޭޓް ކޯޓަށެވެ. ނަމަވެސް ދައުވާ ރައްދުވާ ފަރާތުގެ އެދުމުގެ މަތިން, އެ ކޯޓުން މައްސަލަ އަނބުރާ ގެންދިއުމަށް ފަހު ކްރިމިނަލް ކޯޓަށް އެ މައްސަލަ ހުށަހެޅި އެވެ.
ކްރިމިނަލް ކޯޓުގެ ނިންމުމުގައި ވަނީ މި މައްސަލާގައި ދައުވާ ރައްދުވާ ފަރާތަކީ ތަހުގީގު މަރުހަލާގައި ބަންދުގައި ބަހައްޓާފައިވާ މީހަކަށްވާތީ، ގާނޫނުގައި ބުނާ ގޮތަށް ބަންދުގައި ބެހެއްޓުމަށް ފަހު ދޫކޮށްލެވޭ މީހެއްގެ މައްޗަށް 45 ދުވަސް ތެރޭގައި ދައުވާ ކުރަން ޖެހޭނެ އެވެ. އެކަމަކު މި މައްސަލާގައި ދައުވާ ކުރީ 145 ދުވަސް ފަހުން ކަމަށް ވާތީ ކޯޓުން ވަނީ މައްސަލަ ބޭރުުކޮށްލައިފަ އެވެ.
ނަމަވެސް ދައުލަތުން ގަބޫލު ކުރާ ގޮތުގައި މި މައްސަލަ ކޯޓަށް ހުށަހެޅުނުއިރު ޖިނާއީ އިޖުރާއަތުގެ ގާނޫނަށް އަމަލު ކުރަން ފަށާފައިނުވާތީ އެ ގާނޫނުގައި ބަޔާން ކުރާ މުއްދަތުތައް މި މައްސަލައަށް ހިނގައިގެން ނުވާނެ އެވެ. މީގެ އިތުރަށް މައްސަލަ ހުށަހެޅި ކޯޓު ބަދަލުކުރީ ދައުވާ ރައްދުވާ ފަރާތުގެ އެދުމުގެ މަތިން ކަމުން، އެ ފަރާތުން ދައުވާ ބޭރުކޮށްލަން ހުށަހަޅާ ހުށަހެޅުމުގައި ގާނޫނީ ބުރަދަނެއް ނެތް ކަމުގައި ދައުލަތުން ބުނެ އެވެ.
މި ނުކުތާތަކާއެކު ދައުލަތުން ހައި ކޯޓުގައި މައްސަލަ އިސްތިއުނާފް ކުރި އެވެ. ހައި ކޯޓުގައި މައްސަލަ ތިން ފަނޑިޔާރުންގެ ބެންޗަކުން ބެލިއިރު, މައްސަލަ ނިންމީ ދެ ފަނޑިޔާރެއްގެ އަގުލަބިއްޔަތުންނެވެ. އެއީ ފަނޑިޔާރު ފަނޑިޔާރު މުހައްމަދު ނިޔާޒް އާއި، ފަނޑިޔާރު ފާތިމަތު ފަރުހީޒާ އެވެ. ހުސައިން މަޒީދުގެ ރައުޔު ތަފާތެވެ.
ފަނޑިޔާރު މަޒީދުގެ ރައުޔަކީ, އެ މައްސަލަ އަލުން ބެލުމަށް ކްރިމިނަލް ކޯޓަށް ފޮނުވަން ޖެހޭ ކަމެވެ. ނަމަވެސް, އަނެއް ދެ ފަނޑިޔާރުންގެ ރައުޔަކީ މައްސަލަ ބޭރުކޮށްލަން ކްރިމިނަލް ކޯޓުން ނިންމި ނިންމުމަށް ތާއިދުކުރުމެވެ.
މާފަރު މެޖިސްޓްރޭޓް ކޯޓަށް މި މައްސަލަ ހުށަހެޅީ އޮގަސްޓް 6، 2020 ގަ އެވެ. އެ ކޯޓުން މައްސަލަ އަނބުރާ ގެނައުމަށް ފަހު ކްރިމިނަލް ކޯޓަށް ހުށަހެޅީ ޖެނުއަރީ 11، 2021 ގަ އެވެ.
ގާނޫނުގައި ބަޔާން ކުރާ މުއްދަތަށް ވުރެ ލަސް ކަމަށް ހައި ކޯޓުގެ ތިން ފަނޑިޔާރުން ވެސް އިއްތިފާގުވި އެވެ. އަދި ކްރިމިނަލް ކޯޓަށް މައްސަލަ ހުށަހަޅަން އެހާ ލަސްވި ސަބަބެއް ދަށު ކޯޓުގައި ދައުލަތަށް ބުނެދެވިފައި ނުވާ ކަން ފާހަގަވާތީ، ދަށު ކޯޓުގެ ނިންމުން ދަމަހައްޓަން ހައި ކޯޓުގެ އަމުރުގައިވެ އެވެ.
