ރައްޔިތުންގެ މަޖިލީހުގެ މިއަދުގެ ޖަލްސާގައި ވަނީ މަރުގެ ހުކުމް ތަންފީޒު ކުރުމާމެދު މި ސަރުކާރުން ގެންގުޅޭ ސިޔާސަތު ބެލުމަށް ހޯމް މިނިސްޓަރު އިމްރާން އަބްދުﷲ ހާޒިރުކޮށްފަ އެވެ.
މިނިސްޓަރު ވަނީ އެކަމާ ގުޅިގެން މި ސަރުކާރުން އަމަލު ކުރަމުން އަންނަ ސިޔާސަތަކީ "އެކަމާ ގުޅޭ ގޮތުން މިހާރު ވެސް އަމަލު ކުރަމުން އަންނަ މޮރިޓޯރިއަމް ދެމެހެއްޓުން" ކަމަށް ވިދާޅުވެފަ އެވެ.
މަހިބަދޫ ދާއިރާގެ މެންބަރު އަހުމަދު ތޯރިގްގެ އެ ސުވާލަށްފަހު، އިތުރު ސުވާލު ކުރަން ހުޅުވާލި ފުރުސަތުގައި ތޯރިގް ވަނީ އުނގޫފާރު ދާއިރާގެ ކުރީގެ މެމްބަރު އަދި ދީނީ އިލްމުވެރިޔާ ޑރ. އަފްރާޝީމް އަލީ އަވަހާރަކޮށްލި މީހުންނަށް މަރުގެ ހުކުމް ތަންފީޒު ކުރުމާ ގުޅޭ ގޮތުން ސުވާލުކުރައްވާފަ އެވެ.
އެހެންނަމަވެސް، މަޖިލީހުގެ ރިޔާސަތުގައި އިންނެވި ރައީސް މުހައްމަދު ނަޝީދު ވަނީ އެއީ އިމްރާން މަޖިލީހަށް ހާޒިރުކުރި ސަބަބާ ގުޅޭ ސުވާލެއް ނޫން ކަމަށް ވިދާޅުވެފަ އެވެ. އަދި ޖަވާބު ދިނުމުގެ ފުރުސަތު އަރުވާފައި ވެސް ނުވެ އެވެ.
ތޯރިގަށް ފަހު އިތުރު ބައެއް މެންބަރުން ވެސް ވަނީ އެކަމާ ގުޅޭ ބައެއް ސުވާލުތައް ކުރައްވާފަ އެވެ. އެގޮތުން ކާށިދޫ ދާއިރާގެ މެންބަރު އަބްދުﷲ ޖާބިރު ވެސް ވަނީ މަރުގެ ހުކުމާ ގުޅޭ ސުވާލެއް ކުރައްވާފަ އެވެ. އެހެންނަމަވެސް އެ ފުރުސަތު ވެސް ރިޔާސަތުން ދީފައިނުވެ އެވެ.
އޭގެ ފަހުން ކުޑަހުވަދޫ ދާއިރާގެ މެމްބަރު އަހުމަދު އާމިރާއި ޕީޕީއެމްގެ ނައިބު ރައީސް އަދި ނައިފަރު ދާއިރާގެ މެމްބަރު އަހުމަދު ޝިޔާމް ވެސް ވަނީ ސުވާލުކުރަން ލިބިވަޑައިގެންނެވި ފުރުސަތުގައި މި ސަރުކާރުން މަރުގެ ހުކުމް ތަންފީޒު ކުރާނެތޯ ނުވަތަ ނޫންތޯ ސުވާލުކޮށްފަ އެވެ.
އެހެންނަމަވެސް، އެއީ ވެސް "ވަޒީރުގެ ސުވާލާ ގުޅުންހުރި" ސުވާލަކަށް ނުވާތީ އެ ފުރުސަތު ދީފައި ނުވެ އެވެ.
މަރުގެ ހުކުމާ ގުޅިގެން އިދިކޮޅު މެންބަރުން ކުރެއްވި ސުވާލުތަކަށް ފުރުސަތު ދީފައިނުވާއިރު، އެމްޑީޕީގެ މެންބަރުން ވަނީ ރަށްރަށުގެ ޕޮލިސް ސްޓޭޝަންތަކާ ގުޅޭ ގޮތުން ސުވާލުކުރައްވާފަ އެވެ. އަދި އެ ފުރުސަތު ރިޔާސަތުން ފަހިކޮށްދީފައި ވެސް ވެއެވެ.
"...މިތާނގައި ޕޮލިސް ސްޓޭޝަން އަޅާ ވާހަކައާ މަރުގެ މައްސަލަތައް ކިހާވަރެއްގެ ގުޅުމެއް އޮތީމާތޯ މިހާރު ބައެއް މެންބަރުންނަށް ފުރުސަތު ދެއްވަމުން މިދަނީ،" ނިޒާމީ ނުކުތާއެއް ނަންގަވައި، ހިތްހަމަނުޖެހުން ފާޅުކުރައްވަމުން ތޯރިގް ވިދާޅުވި އެވެ.
އިދިކޮޅު މެންބަރުން ސުވާލުކުރުމުގެ ފުރުސަތު ނުދިނުމުން، މެންބަރުން ވަނީ ހިތްހަމަނުޖެެހުން ފާޅުކުރައްވައި، ރިޔާސަތު ކުރިމައްޗަށް ވަޑައިގެން އަޑުގަދަ ކުރައްވާފައެވެ.
މަޖިލިސް ހަލަބޮލިވެފައިވުމުން، ރިޔާސަތުން ވަނީ ވަގުތު ހަމަވުމުގެ ކުރިން މިނިސްޓަރާ ސުވާލު ކުރުން ނިންމާލާފައިފަ އެވެ.
މިއަދުގެ ހާޒިރީ
- ހާޒިރުވެވަޑައިގެންނެވީ: 75 މެމްބަރުން
- ސަލާމުގައި: މެންބަރަކު ނެތް
ހައިކޯޓުގެ ފަނޑިޔާރު އަބްދުﷲ ހަމީދު ވަކިކުރުމުގެ މައްސަލަ އެޖެންޑާ ކޮށްފައި އޮތުމާއެކު، މިއަދުގެ މަޖިލީހުގެ ޖަލްސާއަކީ މި ދައުރުގައި މިހާތަނަށް ބޭއްވުނު ޖަލްސާތަކުގެ ތެރެއިން އެންމެ ހާޒިރީ ރަނގަޅު ޖަލްސާ އެވެ.
އެ މައްސަލައިގައި ކޮމިޓީން ނިންމި ގޮތުގެ ރިޕޯޓު މިއަދު ވަނީ ތަޅުމުގައި އިއްވާފަ އެވެ.
މި މައްސަލަ ޖުޑީޝަރީ ކޮމިޓީން ދިރާސާކުރުމަށްފަހު ނިންމާފައިވަނީ މައްސަލަ ޖުޑީޝަލް ސާވިސް ކޮމިޝަނުން ކުރިއަށް ގެންގޮސްފައިވަނީ އިޖުރާއަތާ ހިލާފަށް ކަމަށެވެ. އަދި މައްސަލަ އަނބުރާ ޖޭއެސްސީއަށް ފޮނުވާލަން ފެންނަ ކަމަށް ބުނެފައިވެ އެވެ.
ތަޅުމުގައި ބަހުސް ކުރިއަށް ދިޔައިރު، ބަހުސް ކުރެއްވި ގިނަ މެންބަރުން ވެސް ވަނީ މައްސަލަ އަނބުރާ ފޮނުވާލަން ފެންނަ ކަމަށް ވާހަކަ ދައްކަވާފަ އެވެ. އަދި އެމްޑީޕީން މިކަމުގައި ވިޕް ނެރެފައިވާތީ އެ ޕާޓީގެ މެންބަރުން ކަންބޮޑުވުން ފާޅުކޮށްފައި ވެސް ވެއެވެ.
އެހެންނަމަވެސް އެމްޑީޕީގެ ހުރިހާ މެންބަރުން ވެސް ވަނީ ވިޕްއާ އެއްގޮތަށް ވޯޓު ދެއްވާފަ އެވެ. އޭގެ ތެރޭގައި ޖުޑީޝަރީ ކޮމިޓީގެ މުގައްރިރު އިމްތިޔާޒް ފަހުމީ ވެސް ހިމެނެ އެވެ.
ފަނޑިޔާރު ހަމީދު ވަކިކުރަން ރައްޔިތުންގެ މަޖިލީހުން ފާސްކުރީ ވޯޓުގައި ބައިވެރިވެވަޑައިގެންނެވި 58 މެންބަރަކު ވޯޓުންނެވެ. ވަކިކުރަން ނުފެންނަ ކަމަށް ހަތް މެންބަރަކު ވޯޓު ދެއްވާފައިވެ އެވެ. ވަކި ކޮޅަކަށް ވޯޓު ނުދެއްވާ ތިން މެންބަރަކު ތިއްބެވެ.
މިއަދުގެ ފޮޓޯ
މިއަދުގެ ޖަލްސާގައި މައިނޯރިޓީ ލީޑަރު އަދި އޭދަފުށި ދާއިރާގެ މެމްބަރު އަހުމަދު ސަލީމް ބައިވެރިވެވަޑައިގަންނަވަނީ -ފޮޓޯ: މަޖިލިސް
މިއަދުގެ ކޯޓޭޝަން
މަޖިލިސް ރިޔާސަތުގައި އަހުމަދު ޒަކީ އިންނެވި އިރުގައި ވިދާޅުވެފައި އޮތް، ތިމަންނާއަކީ ހަމަ ތިތާގައި އިންނަ ގޮނޑި ކޮއްކޮއެކޭ، ތި ވިދާޅުވާހެން އަޅުގަނޑަކީ ތިބޭފުޅުން ހަމަ ވިދާޅުވާހާ ކަމެއް، ވިދާޅުވި ގޮތަކަށް ވިދާޅުވި ކަމެއް ވިދާޅުވި މިންވަރަަށް ކުރަން އިންމީހެއް، -- ރައީސް ނަޝީދު
