ފޭކް އެކައުންޓުތަކާއި ސްޕޭމް އެކައުންޓުތަކުގެ މައުލޫމާތު ހިއްސާ ނުކުރާތީ ޓްވިޓާ ގަންނަން ހުށަހަޅާފައިވާ 44 ބިލިއަން ޑޮލަރުގެ ބިޑު އަނބުރާ ގެންދާނެ ކަމުގެ އިޝާރާތެއް ބިލިއަނަރު އިލޮން މަސްކު ދީފި އެވެ.
މައުލޫމާތު ހިއްސާ ނުކުރުމަކީ އެގްރީމެންޓާ ހިލާފު ކަމެއް ކަމަށާއި ބޮޓް އެކައުންޓުތަކާ ބެހޭ މައުލޫމާތު ނުދޭނަމަ ބިޑު އަނބުރާ ގެންދިޔުމުގެ ހުރިހާ ހައްގެއް އޮތް ކަމަށް މަސްކު ވަނީ ޓްވިޓާއަށް ސިޓީއެއް މެދުވެރިކޮށް އަންގާފަ އެވެ.
އޭނާގެ މި ސިޓީއާ އެކު ޓްވިޓާގެ ހިއްސާގެ އަގު ވަނީ ވަރަށް ބޮޑަށް ވެއްޓިފަ އެވެ. އެގޮތުން، މަސްކު ހިއްސާއެއްގެ އަގު 5.5 ޕަސެންޓު ދަށްވެ 38.13 ޑޮލަރަށް ވަނީ ވެއްޓިފަ އެވެ. މަސްކު ހުށަހެޅީ ހިއްސާއަކަށް 54.20 ޑޮލަރެވެ.
ޓްވިޓާ އިން މަސްކުގެ ސިޓީއަށް މިހާތަނަށް އެއްވެސް ޖަވާބެއް ދީފައެއް ނުވެ އެވެ.
މިއީ ބިޑު އަނބުރާ ގެންދާނެ ކަން ލިޔުމުން މަސްކު ހާމަކުރި ފުރަތަމަ ފަހަރެވެ. މީގެކުރިން އޭނާ ވަނީ އެފަދަ އިޝާރާތްތަކެއް ޓްވިޓާ މެދުވެރިކޮށް ދީފަ އެވެ.
މެއި މަހުގެ ތެރޭގައި މަސްކު ވަނީ ފޭކް އަދި ބޮޓް އެކައުންޓުތަކުގެ މައުލޫމާތު ހިއްސާކުރަން ދެން އޭނާ ބިޑު ކުރިއަށް ނުގެންގޮސް މަޑުކުރާނެކަން ހާމަކޮށްފަ އެވެ.
މިއީ އެ ބިޑު އަނބުރާ ގެންދާނެކަން ހާމަވާ ކަމެއް ކަމަށް މާކެޓު ދިރާސާ ކުރާ ފަރާތްތަކުން ވަނީ ބުނެފަ އެވެ.
މަސްކަކީ ތެދު މައުލޫމާތު ހާމަކުރުމަށް ވަރަށް ބޮޑަށް ތާއިދުކުރާ މީހެކެވެ. އޭނާ ޓްވިޓާ ގަންނަން ވެސް ބޭނުންވަނީ ބޮޓު އެކައުންޓުތައް ނައްތާލުމަށެވެ.
މިވަގުތު ވެސް ޓްވިޓާގެ 9.6 ޕަސެންޓު ހިއްސާ އޮތީ މަސްކުގެ ބެލުމުގެ ދަށުގަ އެވެ. އޭނާއަކީ އެ ކުންފުނީގެ ދެވަނައަށް އެންމެ ބޮޑު ހިއްސާދާރެވެ.
