ލަންޑަން، ޔޫކޭ (ޖޫން 6) - ރަޝިއާގެ ވެރިރަށް މޮސްކޯގައި ހުންނަ އެމެރިކާގެ އެމްބަސީ ބަންދު ނުކުރުމަށް އެމެރިކާ އިން ރަޝިއާއަށް ކަނޑައަޅާފައި ހުންނަވާ ސަފީރު ޖޯން ސަލިވަން އެދިވަޑައިގެންފި އެވެ.
ޔޫކްރެއިނަށް ހަމަލާ ދީ އެ ގައުމު ހިފުމަށް ރަޝިއާ އިން ކުރަމުންދާ ހަނގުރާމައާ ގުޅިގެން އެމެރިކާ އާއި އެ ގައުމާ ދެމެދު ވަނީ ނުތަނަވަސްކަން އުފެދިފަ އެވެ. މިއީ ސޯވިއެޓު ޔޫނިއަން އުވުނު ފަހުން ރަޝިއާގެ ތާރީހު ބަދަލުކޮށްލާނެ ހަނގުރާމައެއްގެ ގޮތުގައި ރައީސް ލެޑިމިއަ ޕުޓިން ވަނީ ސިފަކުރައްވާފަ އެވެ.
"ވާހަކަ ދެއްކޭނެ ގޮތްތަކެއް އަބަދުވެސް އޮންނަން ޖެހޭނެ. ޑިޕްލޮމެޓިކް ގުޅުން ކަނޑާލައިގެން ނުވާނެ،" ކުރީގެ ރައީސް ޑޮނާލްޑް ޓްރަމްޕްގެ ސަރުކާރުގައި ރަޝިއާއަށް ފޮނުވި ސަފީރު ސަލިވަން ވިދާޅުވި އެވެ.
ސޯވިއެޓު ޔޫނިއަން އާ 1933 ގައި ޑިޕްލޮމެޓިކް ގުޅުން ގާއިމުކުރި ފަހުން ދެގައުމުގެ ގުޅުން މިހާތަނަށް އެއްވެސް ހާލަތެއްގައި ކަނޑާލާފައެއް ނުވެ އެވެ. ފިނި ހަނގުރާމައިގެ ދުވަސްވަރު ވެސް ދުނިޔޭގެ އެންމެ ބޮޑު ދެ ބާރުގެ ގުޅުން ކެނޑިފައެއް ނުވެ އެވެ.
ނަމަވެސް، ސަލިވަން ވަނީ ދެ ގައުމުން ވެސް އެމްބަސީތައް ބަންދުކުރުމުގެ ފުރުސަތު އޮތް ކަމަށް ވިދާޅުވެފަ އެވެ. އެހެނަސް، އެއީ ހެދޭނެ ބޮޑު ގޯހެއްގެ ގޮތުގައި އޭނާ ސިފަކުރެއްވި އެވެ.
"އެމެރިކާ އިން އެމްބަސީ ބަންދުކުރަނީ އެތަނުގައި މަސައްކަތްކުރެވޭނެ ވަރަށް ރައްކާތެރިކަން ނެތުމުން،" ސަލިވަން ވިދާޅުވި އެވެ.
