ސުޕްރީމް ކޯޓުން ދަމަހައްޓާ މަރުގެ ހުކުމްތައް ތަންފީޒު ނުކުރުމުގެ ބާރު ސަރުކާރަކަށް ނޯންނާނެ ކަމަށް ކުރީގެ ނައިބު ރައީސް އަދި ގާނޫނީ ވަކީލު ޑރ. މުހައްމަދު ޖަމީލް އަހުމަދު ވިދާޅުވެއްޖެ އެވެ.
މަރުގެ އަދަބު ތަންފީޒު ނުކުރުމާމެދު ރާއްޖޭން ގެންގުޅޭ ސިޔާސަތު ބަދަލުނުވާ ކަމަށާއި ޒަމާނުއްސުރެ ގެންގުޅޭ ސިޔާސަތަކީ މަރުގެ ހުކުމްތައް ތަންފީޒުނުކުރުން ކަމަށް ހޯމް މިނިސްޓަރު އިމްރާން އަބްދުﷲ މިއަދު ވަނީ މަޖިލީހުގައި ވިދާޅުވެފަ އެވެ. އެކަމަށް ކުރީ ސަރުކާރުގެ ބައެއް އިސްވެރިންގެ ފާޑުކިޔުން ވަނީ އަމާޒުވެފަ އެވެ.
"ދީނަށް ވުރެ އިމްރާންއަށް މަގާމު މުހިންމުވީ މިންވަރު މިއަދު ހާމަވެެއްޖެ، މާތް ﷲގެ ހުކުމަށް ގޮންޖެހީ؟، ސުޕްރީމް ކޯޓުން ދަމަހައްޓާ މަރުގެ ހުކުމްތައް ތަންފީޒު ނުކުރުމުގެ ބާރު ސަރުކާރަކަށް ނޯންނާނެ،" އިމްރާންގެ ވާހަކައާ ގުޅިގެން ނުރުހުން ފާޅުކުރައްވައި ޖަމީލް ކުރެއްވި ޓްވީޓުގައި ވިދާޅުވި އެވެ.
ޖަމީލް ވަނީ ސުޕްރީމް މަރަން ނިހާއީ ހުކުމް ކޮށްފައި ތިބޭ މީހުން ޖަލުގައި ގެންގުޅެނީ ކޮން ގާނޫނަކުން ބާރު ލިބިގެންތޯ ސުވާލު އުފައްދަވާފަ އެވެ.
އިމްރާން ވިދާޅުވީ ވޭތުވެދިޔަ ބައެއް ސަރުކާރުތަކުން މަރުގެ ހުކުމް ތަންފީޒު ކުރުން ސިޔާސީ ހަތިޔާރެއްގެ ގޮތުގައި ބޭނުން ކޮށްފައިވާ ކަމަށެވެ. އެގޮތުން އެކި ފަހަރު މަތީން އެކަމާ ގުޅޭ ވާހަކަ ދައްކާފައިވާ ކަމަށް ވިދާޅުވި އެވެ. އެހެންނަމަވެސް ދެވަނަ ޖުމްހޫރިއްޔާގެ އެއްވެސް ވެރިކަމެއްގައި މަރުގެ ހުކުމާ ގުޅިގެން އަމަލު ކުރަމުން އަންނަ ސިޔާސަތަށް އެއްވެސް ބަދަލެއް ގެނެސްފައި ނުވާ ކަމަށެވެ.
"ވޭތުވެދިޔަ ސަރުކާރުގައި އެކަން ތަންފީޒު ނުކޮށް އޮތީ މި މޭރުމުން ކަމުގައި އަޅުގަނޑު ދެކެން،" އިމްރާން ވިދާޅުވި އެވެ.
ކުރީ ސަރުކާރުން އެކަން ތަންފީޒު ކުރަން ނުކުރެވުނު ވާހަކަތަކަށް އެއިރުގެ އިސްލާމިކް މިިނިސްޓަރު ޑރ. މުހައްމަދު ޝަހީމް އަލީ ސައީދު ވަނީ ރައްދުދެއްވައިފަ އެވެ. ޝަހީމް ވިދާޅުވީ ކުރީ ސަރުކާރު ނިމުނުއިރު، މަރުގެ ހުކުމް ތަންފީޒު ކުރަން ބޭނުންވާ ހުރިހާ ތައްޔާރީތަކަކާއި ގަވައިދުތަކެއް ހުރީ ނިމިފައި ކަމަށެވެ.
"އޭގެ އެންމެހާ އުސޫލުތައް ކެބިނެޓުން ފާސްވެސް ކުރި، ސަރުކާރު ވައްޓާލަން ބޭރުގެ ބާރުތަކުން ބޭނުންވި އެއް ސަބަބު އެއީ،" ޝަހީމް ވިދާޅުވި އެވެ.
ޔާމީންގެ ސަރުކާރުގައި ލީތަލް އިންޖެކްޝަން ޖަހައިގެން މަރުގެ ހުކުމް ތަންފީޒު ކުރަން ނިންމައި އެކަމަށް ބޭނުންވާ ވަސީލަތްތަކާއި ސާމާނު ވެސް ގެނެސްފައިވާ ކަމަށް އޭރުގެ ހޯމް މިނިސްޓަރު އުމަރު ނަސީރު ވިދާޅުވެފައިވެ އެވެ.
އަދި މަރުގެ ހުކުމް ތަންފީޒު ކުރަން ފުރިހަމަ ކުރަންޖެހޭ އިޖުރާއަތްތައް ހިމެނޭ ތަފްސީލީ ގަވައިދެއް ވެސް އެކުލަވައިލި އެވެ. ނަމަވެސް، ޔާމީން ވެރިކަން ނިމުމާ ހަމައަށް އެކަމަށް އަމަލީ ސިފައެއް ގެނެސްފައެއް ނުވެ އެވެ.
ރާއްޖޭގައި މަރަން ހުކުމްކޮށްފައިވާ މީހުންގެ ތެރެއިން އިސްތިއުނާފުގެ ހުރިހާ މަރުހަލާތަކެއް ނިމިފައި މިވަގުތު ތިބީ ތިން މީހުންނެވެ.
