ހުޅުމާލޭ ފޭސް ޓޫ އަވަށުގައި ހައުސިން ޑިވެލޮޕްމަންޓު ކޯޕަރޭޝަން (އެޗްޑީސީ)ން އިމާރާތްކުރަމުން އަންނަ ވިނަރެސް މަޝްރޫއުގެ ޓަވަރުތަކުގެ 100 ފްލެޓް މާލޭގައި ދިގު މުއްދަތަކަށް ދިރިއުޅެމުންދާ ރަށްވެހިކަން ނެތް ފަރާތްތަކަށް ހާއްސަ ކުރަން ނިންމައިފި އެވެ.
އެ ޕްރޮޖެކްޓުގެ ދަށުން އިމާރާތްކުރާ 10 ޓަވަރުގައި ތިން ކޮޓަރީގެ 1،344 ހައުސިން ޔުނިޓަށް ކުރިމަތިލެވޭ ގޮތަށް ސަރުކާރުން ކުރިން ނިންމާފައިވަނީ މާލޭގައި ރަށްވެހިކަން އޮންނަތާ 15 އަހަރުވެފައިވާ ފަރާތްތަކަށެވެ.
ނަމަވެސް މިއަދު ފްލެޓްތަކަށް ކުރިމަތިލާން ހުޅުވާލި އިރު، އުސޫލުގައި ވަނީ މާލޭގައި ރަށްވެހިކަން ނެތަސް އަދި ރަށްވެހިކަން އޮވެ ރަށްވެހިކަން އޮންނަތާ 15 އަހަރު ނުވިއަސް 100 ފްލެޓަކަށް ކުރިމަތިލެވޭ ގޮތަށެވެ. އެކަމަކު މާލޭގައި ދިރިއުޅޭތާ 15 އަހަރުވެފައި ވުމަކީ ޝަރުތެކެވެ.
އެ ފްލެޓްތަކަށް ކުރިމަތިލާއިރު މާލޭގައި 15 އަހަރު އުޅެފައިވާ ކަމުގެ ހެކި ވެސް ހުށަހަޅަން ޖެހެ އެވެ. މި ގޮތުން ސްކޫލަށް ވެއްދި ކަމުގެ ލިޔުމާއި ސްކޫލް ނިންމި ކަމުގެ ލިޔުމާއި ވަޒީފާގައި އުޅޭ ކަމުގެ ލިޔުމާއި އަދި އެކަން ހެކި ކޮށްދޭނެ އެހެނިހެން ލިޔުން ވެސް ހުށަހަޅަން ޖެހެ އެވެ.
މަހަކަށް ޖުމުލަ 61،000 ރ. އަށް ވުރެ މަތީ އާމްދަނީއެއް ލިބޭ ފަރާތްތަކަށް މި ސްކީމްގައި ބައިވެރިއެއް ނުވެވެ އެވެ. އަދި މާލޭގައި އަމިއްލަ ފްލެޓެއް، އެޕާޓްމަޓްމަންޓްއެއް، 600 އަކަފޓުގެ ބިމެއް، ނުވަތަ ސަރުކާރުގެ ކުރީގެ މަޝްރޫއަކު ފްލެޓެއް ލިބިފައިވާ މީހުނަށް ވެސް މި ސްކީމްގައި ބައިވެރިއެއް ނުވެވެ އެވެ.
ވިނަރެސްއަކީ ޗައިނާ މެޝީނަރީ އިންޖިނިއަރިން ކޯޕަރޭޝަން (ސީއެމްއީސީ) އާ ހަވާލުކޮށްގެން އެޗްޑީސީން ކުރިޔަށް ގެންދާ "މިކްސްޑް ރެޒިޑެންޝަލް ކޮމްޕްލެކްސް" ބޯހިޔާވަހިކަމުގެ ޕްރޮޖެކްޓްއެކެވެ.
އެއީ މެދު މިނުގެ ފުދުންތެރިކަން ހުރި އާއިލާތަކަށާއި ފަންނީ ވަޒީފާތަކުގައި އުޅޭ މީހުންނަށް އަމާޒުކޮށްގެން، ފިނިޝިންއާއި އިންޓީރިއާ ނިންމާފައި ހަވާލުކުރާ ފެންވަރު ރަނގަޅު ފްލެޓްތަކެއް ކަމަށް އެޗްޑީސީން ވަނީ ބުނެފަ އެވެ.
ފްލެޓުތަކަށް ފައިސާ ދެއްކޭނެ ގޮތްތަކާގުޅޭ މައުލޫމާތު ދިނުމުގެ ސެޝަނެއް ކުރިއަށް ގެންދަން ނިންމާފަ އެވެ. އަދި ފްލެޓުގެ "މޮކްއަޕް" އެޕާޓްމެންޓު ދައްކާލުން ވެސް މީގެ ތެރޭގައި ކުރިއަށް ދާނެ އެވެ. މި ކަމަށް ޝައުގުވެރިވާ ފަރާތްތަކުން އެޗްޑީސީ ޕޯޓަލް މެދުވެރިކޮށް ރެޖިސްޓްރީވާން މިހާރު ވަނީ ހުޅުވާލާފަ އެވެ.
ވިނަރެސް ފްލެޓުތައް މިވީހާ ދުވަހަކަށް އާންމުންނަށް ވިއްކަން ހުޅުވާ ނުލާ އޮތީ، ހިޔާ ފްލެޓުތައް ދޫކޮށްލި މީހުންނަށާއި ގުޅީފަޅުން ފްލެޓް ގަތް މީހުންނަށް ފުރުސަތު ދިނުމަށެވެ.
މި އަހަރުގެ ޖުލައި މަހަށް ނިންމަން އަމާޒު ހިފާފައިވާ މި ފްލެޓްތަކަށް ހިޔާ ފްލެޓުތައް ދޫކޮށްލި މީހުންނަށާއި ގުޅީފަޅުން ފްލެޓް ގަތް މީހުންގެ ތެރެއިން ކުރިމަތިލީ 288 މީހުން ކަމަށް އެޗްޑީީސީން ބުނެފައިވެ އެވެ.
